ការបាត់បង់ប្តី ឬប្រពន្ធពិតជាមានសម្ពាធយ៉ាងខ្លាំងចំពោះមនុស្សវ័យចំណាស់ ។ ក្រុមអ្នកវិទ្យាសាស្ត្រ បាននិយាយថា មានហេតុផលវេជ្ជសាស្ត្រ ព្រមទាំងហេតុផល ផ្សេងៗទៀតដែលបណ្តាលឱ្យពួកគេមានបណ្តុំរោគសញ្ញាជំងឺខូចចិត្ត ។
ខណៈពេលដែលសមាសភាគសង្គមនៃអាការជំងឺខូចចិត្តសំដៅលើផលប៉ះពាល់យូរអង្វែងនៃការបាត់បង់ប្តី ឬប្រពន្ធ សមាគមបេះដូងអាមេរិក (AHA) កំណត់ស្ថានភាពជំងឺនេះថា ឈឺទ្រូងខ្លាំងមួយរំពេច ជាប្រតិកម្មតបទៅនឹងការកើនឡើងនៃអ៊័រម៉ូនស្ត្រេសអាចបង្កឡើងដោយព្រឹត្តិការណ៍ដែលធ្វើឱ្យមានភាពតានតឹងអារម្មណ៍ មានទាក់ទងជាមួយនឹងជំងឺធ្លាក់ទឹកចិត្ត សុខភាពផ្លូវចិត្ត និងជំងឺបេះដូង ។
នៅពេលមានបញ្ហានេះកើតឡើង ផ្នែកមួយនៃបេះដូងពង្រីកខ្លួនវា និងមិនលោតបានល្អទេ ប៉ុន្តែផ្នែកផ្សេងទៀតនៃបេះដូងនៅលោតធម្មតា។ នៅទីបំផុតមុខងារបេះដូងទាំងអស់ត្រឡប់ទៅធម្មតាវិញ ។
អាការជំងឺខូចចិត្តតែងតែត្រូវគេធ្វើរោគវិនិច្ឆ័យច្រឡំ ដោយសារតែរោគសញ្ញារបស់វាស្រដៀងគ្នានឹងជំងឺគាំងបេះដូង ។ ទោះជាយ៉ាងណាក្តី បើតាមសមាគមខាងលើ ជំងឺខូចចិត្តមិនបង្ហាញភស្តុតាងនៃការស្ទះសរសៃឈាមអារទែណាមួយនោះទេ ។
លោកស្រីវេជ្ជបណ្ឌិត Harmony Reynolds គ្រូពេទ្យឯកទេសជំងឺបេះដូង និងជាសាស្ត្រាចារ្យរងផ្នែកវេជ្ជសាស្ត្រនៅមជ្ឈមណ្ឌលវេជ្ជសាស្ត្រ NYU Langone និយាយថា ភាពតានតឹងរាងកាយ ដូចជាការរត់ម៉ារ៉ាតុង និងភាពតានតឹងក្នុងអារម្មណ៍ ដូចជាការទទួលបានដំណឹងអាក្រក់អាចបង្កឱ្យមានជំងឺនេះ ។
លោកស្រី Reynolds កាលពីពេល ថ្មីៗនេះបានសិក្សាវាយតម្លៃលើប្រព័ន្ធប៉ារ៉ាស៊ាំប៉ាទិច ដែលជួយឱ្យរាងកាយមានភាបស្ងប់ស្ងាត់បន្ទាប់ពីមានការឈ្លោះគ្នា ឬវាយតប់ ដែលវាដើរតួនាទីនៅក្នុងជងឺខូចចិត្ត ។
មិនថា រោគសញ្ញានៃជំងឺខូចចិត្តអាចជាមូលហេតុ នៃការស្លាប់របស់អ្នកដែលបាត់បង់មនុស្សជាទីស្រឡាញ់របស់ខ្លួនឬយ៉ាងណាទេលោកស្រី Reynolds បាននិយាយថា ៖ «មានមនុស្សជាច្រើនដែលកំពុងកើតទុក្ខ ឬមានអារម្មណ៍ថា បេះដូងរបស់គេកំពុងខ្ទេចខ្ទាំមិនបានទៅមន្ទីរពេទ្យទេ ខណៈដែលពួកគេគួរតែទៅរកគ្រូពេទ្យនៅពេលពួកគេមានរោគសញ្ញានេះ ។
ខ្ញុំពិតជាគិតថា រោគសញ្ញានៃជំងឺខូចចិត្តអាចជាមូលហេតុដែលធ្វើឱ្យនរណាម្នាក់ស្លាប់បន្ទាប់ពីបានឮដំណឹងអាក្រក់របស់ដៃគូរបស់គេ ប៉ុន្តែជាញឹកញាប់ជំងឺគាំងបេះដូងក៏កើតឡើង ភ្លាមៗបន្ទាប់ពីយើងទទួលបានដំណឹងអាក្រក់ ឬមានភាពតានតឹងខ្លាំងពេក » ៕
ចែករំលែកព័តមាននេះ