នៅយប់ថ្ងៃទី១៦ ឈានចូលថ្ងៃទី១៧ ខែវិច្ឆិកា ឆ្នាំ២០២២ អ្នកគាំទ្ររបស់តារាចម្រៀងរ៉េបដ៏ល្បីល្បាញ លោក ជី ដេវីត ហាក់មានការខឹងសម្បារយ៉ាងខ្លាំង ក្រោយពេលឃើញមានគណនីមួយបានចូលទៅខមិនទាំងទទឹងទិស ទៅកាន់អាយដលរបស់ខ្លួន ដោយចោទប្រកាន់ទាំងមិនដឹងរឿងច្បាស់ បន្ទាប់ពី
រាជធានីភ្នំពេញ ៖ នៅយប់ថ្ងៃទី១៦ ឈានចូលថ្ងៃទី១៧ ខែវិច្ឆិកា ឆ្នាំ២០២២ អ្នកគាំទ្ររបស់តារាចម្រៀងរ៉េបដ៏ល្បីល្បាញ លោក ជី ដេវីត ហាក់មានការខឹងសម្បារយ៉ាងខ្លាំង ក្រោយពេលឃើញមានគណនីមួយបានចូលទៅខមិនទាំងទទឹងទិស ទៅកាន់អាយដលរបស់ខ្លួន ដោយចោទប្រកាន់ទាំងមិនដឹងរឿងច្បាស់ បន្ទាប់ពីតារាប្រុសរូបរាងស្រស់សង្ហា ខ្ពស់ស្រឡះរូបនេះ បានបង្ហោះរូបមួយសន្លឹកនៅក្នុង Instagram Story របស់ខ្លួន មិនទាន់បានប៉ុន្មានម៉ោងស្រួលបួលផង ស្រាប់តែគណនីនោះបាននិយាយបែបនេះថា «Pls Stop being a thier» ហើយពាក្យនេះផងដែរ គឺចង់មានន័យថា «សូមឈប់ធ្វើជាចោរ» ដោយមិនទុកចាំយូរ តារាប្រុសរូបនេះក៏បានតបទៅវិញទាំងចិត្តត្រជាក់ ហើយនិយាយពាក្យល្អៗយ៉ាងដូច្នេះថា «អរគុណបំណងល្អរបស់បង ខ្ញុំមិនដឹងថា បងហ្វេនខាងណាទេ តែសូមប្រើវិចារណញ្ញាណ»។
បន្ទាប់មកទៀត ជី ដេវីត ក៏បានបង្ហោះសារនៅក្នុងគណនីផេកហ្វេសប៊ុកផ្ទាល់របស់ខ្លួនបន្ត ដោយអស់ការអត់ធ្មត់តទៅទៀត លោកក៏បាននិយាយថា «មាត់របស់ឯង ឯងជាអ្នកខ្ចាក់មនុស្សគ្រប់គ្នាក្លាយជាជនរងគ្រោះដោយសារឯង ដោយប្រើប្រាស់ពាក្យមិនសមរម្យ និងមើលងា.យ និងកើតចិត្តវា.យតម្លៃអ្នកដទៃ ឬអាចក្លាយជាជនរងគ្រោះដោយសារមាត់ដ៏មានឥទ្ធិពលរបស់ឯង, ខ្ញុំបញ្ជាក់ប្រាប់ឯងនៅទីនេះ តាមរយៈសារមកក្រោយៗឃើញថា ឯងបានជាន់ដានខ្លួនឯងច្រើនណាស់។ ចោរ? ចោរ? ចោរ? តាំងពីរខែកក្កដា? លក់ ឬទិញរបស់ចោរក៏ជាចោរ? មុននេះ ខ្ញុំគួរតែចិត្តធ្ងន់ជាងនេះ សុំទោសខ្ញុំមិនអាចទ្រាំមើលពាក្យអសុរោះច្រើនទេ ទើបខ្ញុំលុប»។
ឃើញថា ដូចជាមិនចេះចប់មិនចេះហើយទាល់តែសោះ អស់ពីរឿងមួយចូលរឿងមួយខ្លាំងពេក ក៏មានហ្វេន ជី ដេវីត បាននាំគ្នាយកទៅបង្ហោះបន្ត និងចូលទៅខមិនលើកទឹកចិត្តលោកគ្រប់ៗគ្នា ហើយថែមទាំងលើកឡើងថា «ល្មមដល់ពេលហើយ មនុស្សរស់នៅផែនដីជាមួយគ្នា សន្សំតែសុខ តែបើគេមិនអោយសុខ គ្មានអ្នកណាចិត្តព្រះរហូតទេ ចោរមិនចោរថ្ងៃណាមួយនឹងដឹងច្បាស់ ត្រូវចាំថា កុំជាន់ដានខ្លួនឯងអោយសោះ ជីវិតដូចកង់រទេះវិលជុំ ស្រលាញ់បងថ្លៃណាស់កន្លងមកទ្រាំពេកហើយ i love GD» «សង្គមប្រចាំថ្ងៃ គឺបែបនេះ ចូលចិត្តនិយាយផ្អែម ចូលចិត្តមនុស្សសុភាព តែតាមពិតវាគ្រាន់តែជាការសម្តែងរបស់បុគ្គលតែប៉ុណ្ណោះ ហេតុអ្វីមនុស្ស? មនុស្សដែលនិយាយត្រង់ មនុស្សដែលនិយាយឆៅៗ មាត់មិនសូវផ្អែម បែរជាមិនមានអ្នកឱ្យតម្លៃ ហើយគិតថាសម្ដីគាត់ជាសម្ដីខ្យល់»។
យ៉ាងណាមិញ បើយើងក្រឡេកមកមើល នៅថ្ងៃទី១៥ ខែវិច្ឆិកា ឆ្នាំ២០២២ កន្លងទៅ យើងសង្កេតឃើញថា នៅសុខៗ វណ្ណដា ក៏បានបង្ហោះសារបង្ហាញការឈឺចាប់ និងសោកស្ដាយចំពោះបទចម្រៀងខ្លួនដែលបានបែកធ្លាយ ដោយបានធ្វើការបញ្ជាក់ថា «លោកសូមបោះចោលរាល់បទទាំងអស់ដែលបានបែកធ្លាយក្នុងថ្ងៃនេះ និងនៅពេលខាងមុខ ហើយសម្រាប់អ្នកដែលចែកចាយបទបែកធ្លាយរបស់លោកទាំង folder សូមបន្តស្តាប់ទៀតចុះ ព្រោះបុគ្គលនោះ បានបំផ្លាញបេះដូងលោករួចរាល់ហើយ»។
ចំណែកឯលោក ជី ដេវិត ក៏បានបង្ហាញសារដូចគ្នា និងពោលចំៗថា «ខ្លួនកំពុងរងការចោទប្រកាន់ដ៏អយុត្តិធម៌មួយ ទាំងដែលខ្លួនមិនបានប្រព្រឹត្តិខុស ដែលមើលទៅចង់បញ្ជាក់យ៉ាងច្បាស់ៗថា «លោកមិនបានលួចថតចម្លង ឬ copy អ្វីពីនរណាឡើយ»។
គួរបញ្ជាក់ផងដែរថា កាលពីកន្លងទៅ ពាក់ព័ន្ធទៅនឹងរឿងរ៉ាវ ដែលតារាចម្រៀងរ៉េបវ័យក្មេង វណ្ណដា បានចេញមុខប្រកាសច្បាស់ៗក្ដែងៗថា «បទចម្រៀង J+o ll របស់លោកបានបែកធ្លាយមុនចេញជាផ្លូវការ ដោយភ្លាមៗនោះ តារាប្រុសរូបនេះក៏បានបង្ហោះសារទាំងក្ដៅឆេវនៅក្នុងបណ្ដាញសង្គម Instagram Story ដាក់ទៅចំៗបែបនេះថា «បទ J+o ll របស់លោកបានបែកធ្លាយ និងត្រូវលួចយកដោយពួកថោកទាប បើជ្រុលជាលាក់ហើយ លោកនឹងជូនតាមសំណូមពរបុគ្គលដែលលួចបទលោកនោះ ហើយលោកក៏ប្រាប់ថា នរណាក៏ដោយដែលលួចបទលោក គឺអត់រួចខ្លួនទាំងអស់»។
ស្របពេលបង្ហាញសាររួច ជាមួយគ្នានោះ វណ្ណដា ក៏បានចេញបទចម្រៀង J+O ll នៅលើបណ្ដាញសង្គមភ្លាម ខណៈអត្ថន័យឃ្លាឃ្លោង និងប្រយោគនីមួយៗពិតជាចាក់ដោតហាក់និយាយចំៗទៅកាន់តារាចម្រៀងរ៉េបដូចគ្នានោះ គឺលោក ជី ដេវីត រហូតបង្កើតបានជារលកកំដៅពាសពេញបណ្ដាញសង្គម បង្កជាជម្លោះពាក្យសម្ដី តាមរយៈបទចម្រៀង ហើយ ជី ដេវីត ក៏បានបញ្ចេញនៅបទរបស់ខ្លួន រហូតមានការតបតគ្នាទៅវិញទៅមក តែមួយរយៈចុងក្រោយ សង្គ្រាម Top Rapper 2 ដួងនេះ ក៏បានស្ងប់ស្ងាត់ទៅវិញ ក្រោយអ្នកទាំងពីរចេញមុខបកស្រាយ ដើម្បីបញ្ចប់ជម្លោះរៀងៗខ្លួនផងដែរ៕
ចែករំលែកព័តមាននេះ