រាជធានីភ្នំពេញ ៖ ស្ត្រីជាអាជីវករលក់ខ្នុរម្នាក់បានជិះម៉ូតូ១គ្រឿងចេញពីផ្ទះទៅទៅលក់ដូរនៅក្នុងផ្សារចោមចៅ ហើយពេលទៅដល់គាត់មិនហ៊ានធ្វេសប្រហែសនោះឡើយគឺបានយកម៉ូតូ
រាជធានីភ្នំពេញ ៖ ស្ត្រីជាអាជីវករលក់ខ្នុរម្នាក់បានជិះម៉ូតូ១គ្រឿងចេញពីផ្ទះទៅទៅលក់ដូរនៅក្នុងផ្សារចោមចៅ ហើយពេលទៅដល់គាត់មិនហ៊ានធ្វេសប្រហែសនោះឡើយគឺបានយកម៉ូតូទៅផ្ញើនៅកន្លែងទទួលបញ្ញើមួយនៅក្នុងផ្សារនោះដែលមានយីហោ”សារ៉ន”។ ខណៈនោះបន្ទាប់ពីអ្នកទទួលបញ្ញើហែកប័ណ្ណបញ្ញើឲ្យ គាត់បានយកទុកដាក់ត្រឹមត្រូវរួចទើបចូលទៅក្នុងផ្សារដើម្បីលក់ខ្នុរ។ ប៉ុន្តែអ្វីដែលជាការហួសចិត្តបំផុតនោះគឺក្រោយពេលចាកចេញពីផ្សារ ដើម្បីយកម៉ូតូជិះទៅផ្ទះ ស្រាប់តែបាត់មិនឃើញឡើយទើបមានការភ្ញាក់ផ្អើល និងរត់រកការអន្តរាគមន៍ពីនគរបាលតែម្ដង។
ហេតុការណ៍នោះបានកើតឡើងកាលពីវេលាម៉ោង១១ព្រឹក ថ្ងៃទី១ ខែឧសភា ឆ្នាំ២០១៧ នៅក្នុងផ្សារចោមចៅ ស្ថិតនៅក្នុងភូមិព្រៃយីសាក់ សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។
ស្ត្រីរងគ្រោះជាម្ចាស់ម៉ូតូខាងលើនោះឈ្មោះ សុខ ឃីម អាយុ៤៥ឆ្នាំ មុខរបរលក់ខ្នុរនៅក្នុងផ្សារចោមចៅស្នាក់នៅភូមិព្រៃព្រីងខាងត្បូង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។ ចំណែកម៉ូតូរបស់គាត់ដែលបាត់ទៅនោះម៉ាកZoomer-x ពណ៌ទឹកប្រាក់ ពាក់ស្លាកលេខ ភ្នំពេញ 1FR-9002។
តាមប្រភពព័ត៌មានបានឲ្យដឹងថា នៅវេលាព្រឹកថ្ងៃកើតហេតុគាត់បានជិះម៉ូតូចេញពីផ្ទះទៅលក់ខ្នុរនៅក្នុងផ្សារចោមចៅនោះ លុះពេលទៅដល់គាត់បានយកម៉ូតូទៅផ្ញើនៅកន្លែងផ្ញើម៉ូតូយីហោ”សារ៉ន” នៅផ្សារនោះ។ ខណៈនោះអ្នកទទួលបញ្ញើបានហែកប័ណ្ណផ្ញើម៉ូតូឲ្យគាត់១សន្លឹក និងបានកឹបជាប់ម៉ូតូរបស់គាត់១សន្លឹកដែលមានលេខកូដ៦៤៦៨៥០២ បន្ទាប់មកគាត់បានទុកប័ណ្ណនោះយ៉ាងត្រឹមត្រូវរួចទើបដើរចូលទៅក្នុងផ្សារលក់ខ្នុរ។
ប្រភពដដែលបានបន្តថា គាត់បានលក់ខ្នុរនៅក្នុងផ្សារខាងលើនោះរហូតដល់វេលាម៉ោង១១ថ្ងៃត្រង់ ថ្ងៃដដែលទើបគាត់បានដើរចេញពីក្នុងផ្សារដើម្បីយកម៉ូតូក្នុងបំណងជិះទៅផ្ទះ។ ស្រាប់តែពេលនោះបាត់មិនឃើញម៉ូតូឡើយ ចំណែកប័ណ្ណផ្ញើរម៉ូតូគឺស្ថិតនៅជាប់ខ្លួនគាត់រហូត ខណៈបានបង្កឲ្យមានការភ្ញាក់ផ្អើលយ៉ាងខ្លាំង ដោយមិនដឹងថាយ៉ាងម៉េចទើបចោរលួចយកចេញពីកន្លែងផ្ញើបានដោយងាយៗបែបនេះទេ។មិនតែប៉ុណ្ណោះគាត់គឺជាអាជីវករលក់ដូរនៅក្នុងផ្សារមួយនោះ និងបានផ្ញើម៉ូតូនៅទីតាំងមួយនេះ៣ទៅ៤ឆ្នាំកន្លងមកហើយមិនដែលមានបញ្ហាបាត់បងម្ដងណាទេ ទើបតែពេលនេះប៉ុណ្ណោះដែលគាត់បានរងគ្រោះបាត់ម៉ូតូជាលើកទី១បែបនេះ។
ស្ត្រីចំណាស់ខាងលើបានបន្តទៀតថា ក្រោយពេលកើតហេតុភ្លាមខាងម្ចាស់ទីតាំងផ្ញើកង់ម៉ូតូមួយនោះបានប្រាប់គាត់ថានឹងចេញសំណងរាល់ការបាត់បង់នោះវិញ។ ប៉ុន្តែសងប៉ុន្មាននោះគាត់មិនទាន់ដឹងនោះទេ ព្រោះពួកគាត់មិនទាន់បានជួបគេដោះស្រាយគ្នានៅឡើយ ហើយរហូតដល់វេលាម៉ោង៤រសៀល ថ្ងៃដដែលនោះដោយសារតែម្ចាស់ទីតាំងខាងលើស្ងាត់ស្ងៀមមិនព្រមសង ធ្វើឲ្យគាត់មានការភ័យខ្លាចម្ចាស់ដាក់ទីតាំផ្ញើម៉ូតូមិនដោះស្រាយ ទើបរូបគាត់ និងសាច់ញាតិធ្វើដំណើរទៅកាន់ប៉ុស្តិ៍នគរបាលចោមចៅដើម្បីឱ្យជួយអន្តរាគមន៍តែម្ដង៕
ចែករំលែកព័តមាននេះ