ខេត្តកំពង់ឆ្នាំង ៖ ក្រោយពីគ្រោះអគ្គិភ័យបានឆេះអស់ផ្ទះមួយខ្នងដោយគ្មានមូលហេតុ ស្ត្រីជាម្ចាស់ផ្ទះ បានលើកដៃសំពះ អំពាវនាវដល់សមត្ថកិច្ចគ្រប់ជាន់ថ្នាក់ និងអាជ្ញាធរខេត្
ខេត្តកំពង់ឆ្នាំង ៖ ក្រោយពីគ្រោះអគ្គិភ័យបានឆេះអស់ផ្ទះមួយខ្នងដោយគ្មានមូលហេតុ ស្ត្រីជាម្ចាស់ផ្ទះ បានលើកដៃសំពះ អំពាវនាវដល់សមត្ថកិច្ចគ្រប់ជាន់ថ្នាក់ និងអាជ្ញាធរខេត្ត សូមជួយស៊ើបអង្កេតករណីភ្លើងឆេះផ្ទះរបស់គាត់ផង ព្រោះគាត់បានសង្ស័យថាៈ មានគេលួចដុតផ្ទះគាត់ដោយគំនុំ។ ហេតុការអគ្គិភ័យនេះបានកើតឡើងកាលពីវេលាម៉ោង៧ និង៣០នាទីយប់ ថ្ងៃទី២៧ ខែមេសា ឆ្នាំ២០១៧ នៅភូមិថ្មី ឃុំផ្សារ ស្រុកបរិបូរណ៍ខេត្តកំពង់ឆ្នាំង ខណៈដែលស្ត្រីជាម្ចាស់ផ្ទះ មិននៅផ្ទះ។ ស្ត្រីរងគ្រោះបានរៀបរាប់ពីជីវិត ក្រុមគ្រួសារគាត់ដោយសង្ខេបថា គាត់មានឈ្មោះ រ័ត្ន ចន្ធូ អាយុ៣៦ឆ្នាំ។ នៅឆ្នាំ២០១១ គាត់បានរៀបការជាមួយប្តីម្នាក់ឈ្មោះ កៀត ប៊ុនណារិត អាយុ៣៧ឆ្នាំ។
ក្រោយពីរៀបការហើយប្តីប្រពន្ឋ គាត់បានរកស៊ីបានប្រាក់សាងសង់ផ្ទះ១ខ្នង មានទំហំ៦គុណនឹង៩ម៉ែត្រ ធ្វើពីឈើប្រក់សង្កសី ដោយសង់លើដីម្តាយឪពុកក្មេកចែកឲ្យ ពួកគាត់រួមរស់នៅជាមួយគ្នាបានប៉ុន្មានឆ្នាំប៉ុន្តែគ្មានកូនទេ ។ ស្រាប់តែកាលពីជាង៥ខែមុន ប្តីគាត់បានសុំគាត់លែងលះគ្នា តែគាត់មិនព្រម ពេលនោះប្តីគាត់បានប្តឹងលែងគាត់ដល់តុលាការ ហើយចាប់ពីពេលនោះមកប្តីគាត់បានចុះចោលផ្ទះ ទៅរកស៊ីនៅភ្នំពេញបាត់រហូតមិនដែលមកផ្ទះទេ ។ មុនពេលកើតហេតុប៉ុន្មានថ្ងៃគាត់បានចេញទៅ ប្រមូលទុកដាក់ស្រូវស្រែក្រោម ហើយពេលយប់បានមកដល់ផ្ទះ។ ពេលចេញពីផ្ទះគាត់បានបិទបារ៉ែតភ្លើងអស់ហើយមិនដែលបើកទេ ចំណែកភ្លើងចង្ក្រានក៏រឹតតែគ្មានដែរ។
ប៉ុន្តែនៅថ្ងៃកើតហេតុ ស្រាប់តែមានភ្លើងមកពីណាបានមកឆេះផ្ទះរបស់គាត់។ គាត់មិនអស់ចិត្តសោះ ហេតុនេះគាត់សូមឲ្យសមត្ថកិច្ចជួយស្រាវជ្រាវលើករណីគ្រោះអគ្គិភ័យ ឆេះផ្ទះគាត់ខ្ទេចនេះផង ។ ម្យ៉ាងវិញទៀត គាត់សូមអំពាវនាវដល់សប្បុរជន ជិតឆ្ងាយទាំងអស់សូមមេត្តាជួយ ដល់រូបគាត់ដែលកំពុងជួបការលំបាកនេះផង។ ពាក់ព័ន្ធបញ្ហានេះដែរ លោក ប៊ិន សុផាន មេឃុំផ្សារស្រុកបរិបូរណ៍បានបញ្ជាក់ថា ប្តីបានប្តឹងលែងលះប្រពន្ធ ដល់តុលាការ ហើយត្រូវបានតុលាការកោះហៅ ថ្ងៃទី៣ ខែឧសភានេះ។
ចំណែកករណីភ្លើងឆេះផ្ទះ ក្នុងនាមគាត់ជាអាជ្ញាធរឃុំ បានឲ្យសមត្ថកិច្ចស្រាវជ្រាវបញ្ហានេះតាមសំណូមពរស្ត្រីម្ចាស់ផ្ទះហើយ គាត់គ្មានតួនាទីអ្វីទេ ទុកឲ្យសមត្ថកិច្ចស្រាវជ្រាវចុះ តែតាមគាត់ដឹងស្ត្រីម្ចាស់ផ្ទះបានប្រាប់ថា គាត់បានបិទបារ៉ែតភ្លើងរាល់ដងពេលចាកចេញពីផ្ទះ។ គាត់មិនហ៊ានចោទខាងណាទេ តែតាមដឹងពេលទាស់លែងគ្នា២នាក់ប្តីប្រពន្ធឮថា ដីសង់ផ្ទះប្តីជាអ្នកយក ចំណែកផ្ទះឲ្យប្រពន្ធរុះយក តែតុលាការមិនទាន់សម្រេចក្តីថាម៉េចផង ស្រាប់តែផ្ទះឆេះខ្ទេចចឹងទៅ៕
ចែករំលែកព័តមាននេះ