ស្រីស្អាត ឆន ស្រីណេត ចេញទៅប្រកួតដណ្តើមមកុដកញ្ញាឯកទេសចរណ៍អន្តរជាតិហើយ
- ភ្នំពេញ
ស្រីស្អាត ឆន ស្រីណេត ចេញទៅប្រកួតប្រជែងដណ្តើមមកុដកញ្ញាឯកទេសចរណ៍អន្តរជាតិនៅម៉ាឡេស៊ីហើយ
រាជធានីភ្នំពេញ ៖ ដូចការគ្រោងទុក នៅទីបំផុតកញ្ញាឯកតំណាងកម្ពុជា ឆន ស្រីណេត បានចាកចេញពីប្រទេសកម្ពុជា ឆ្ពោះទៅកាន់ប្រទេសម៉ាឡេស៊ីហើយ នៅថ្ងៃទី១០ ខែវិច្ឆិកា ឆ្នាំ២០២២នេះ ក្នុងបេសកកម្មប្រកួតប្រជែងដណ្តើមមកុដ នៃកម្មវិធីបវរកញ្ញាទេសចរណ៍អន្តរជាតិ។
បេក្ខនារីដែលមានដើមកំណើតនៅកម្ពុជាក្រោមរូបនេះ បានបង្ហាញនូវភាពជឿជាក់យ៉ាងខ្លាំងសម្រាប់ការចេញប្រកួតជាលក្ខណៈអន្តរជាតិនាពេលនេះ ខណៈពេលដែលនាងក៏ដូចជាបេក្ខនារីជាប់លំដាប់រងទី១ នៃកម្មវិធី Miss Universe Cambodia 2021 ផងដែរ។
បើតាមគម្រោងកូនខ្មែរកម្ពុជាក្រោម កញ្ញា ឆន ស្រីណេត សម្រាប់ការចាកចេញទៅចូលរួមប្រកួតនៅក្នុងកម្មវិធីបវរកញ្ញាទេសចរណ៍ដែលរៀបចំធ្វើនៅឯប្រទេសម៉ាឡេស៊ី នាពេលនេះ កញ្ញានឹងនាំយកឈុតអប្សរា និងក្បាច់គុនល្បុកតោ យកទៅបង្ហាញនៅលើឆាកអន្តរជាតិផងដែរ។
យ៉ាងណា មហាជន ជាពិសេសបណ្តាអ្នកគាំទ្រជាច្រើនបាននាំគ្នាផ្តល់កម្លាំងចិត្ត និងជូនពរអោយ ឆន ស្រីណេត ទទួលបានជោគជ័យ និងនាំមុខមាត់ប្រទេសជាតិបង្ហាញនៅលើឆាកអន្តរជាតិ។
ជាការកត់សម្គាល់ កញ្ញា ឆន ស្រីណេត គឺជាបេក្ខនារីដំបូងគេបង្អស់ដែលមកពីទឹកដីកម្ពុជាក្រោម ដែលបានសម្រេចដាក់ពាក្យចូលរួមប្រកួតកម្មវិធីបវរកញ្ញាចក្រវាឡកម្ពុជា២០២១ (Miss Universe Cambodia 2021) ខណៈពេលការប្រកួតនេះ នាងបានជាប់លំដាប់រងទី១។ ឆន ស្រីណេត មានអាយុ២៤ឆ្នាំ កើតនៅភូមិមេរង ឃុំដើមជ្រៃ ស្រុកផ្នោដាច់ ខេត្តព្រះត្រពាំង កម្ពុជាក្រោម ប៉ុន្តែឪពុកម្ដាយរបស់នាងជាជនជាតិខ្មែរ។
បច្ចុប្បន្ននាងជាគ្រូបង្រៀនក្បាច់ហាត់ប្រាណ និងជាអ្នកបង្ហាញម៉ូត (Freelance) នៅរាជធានីភ្នំពេញ។ អំឡុងការចូលរួមប្រកួតនេះ កញ្ញាបានបង្ហាញពីគោលបំណងថា នាងសម្រេចដាក់ពាក្យចូលរួមប្រកួត ព្រោះពីមុនមកមិនទាន់មានស្ត្រីកម្ពុជាក្រោមរូបណា បានដាក់ពាក្យចូលរួមនោះទេ ហេតុនេះហើយនាងចង់បង្ហាញសមត្ថភាព និងភាពក្លាហានរបស់នាងឱ្យមហាជននៅលើទឹកដីកម្ពុជាក្រោម និងប្រទេសកម្ពុជា ក៏ដូចជាពិភពលោកបានដឹង និងបានស្គាល់ថា ស្ត្រីខ្មែរពិតមានភាពអង់អាចក្លាហានមិនបរទេសនោះទេ៕
ចែករំលែកព័តមាននេះ