រាជធានីភ្នំពេញ ៖ កម្លាំងប្រឆាំងការជួញដូរមនុស្ស និងការពារអនីតិជន នៃស្នងការនគរបាលរាជធានីភ្នំពេញ សហការជាមួយនគរបាលខណ្ឌដូនពេញ ធ្វើការឃាត់ខ្លួនមនុស្សប្រុសស្រីចំនួន៥នាក់ ពាក់ព័ន្ធទៅនឹង
រាជធានីភ្នំពេញ ៖ កម្លាំងប្រឆាំងការជួញដូរមនុស្ស និងការពារអនីតិជន នៃស្នងការនគរបាលរាជធានីភ្នំពេញ សហការជាមួយនគរបាលខណ្ឌដូនពេញ ធ្វើការឃាត់ខ្លួនមនុស្សប្រុសស្រីចំនួន៥នាក់ ពាក់ព័ន្ធទៅនឹងការជួញដូរមនុស្ស ក្នុងនោះមានបុរសជនជាតិចិនចំនួន២នាក់ និងស្ត្រីជនជាតិខ្មែរចំនួន៣នាក់នៅផ្ទះសំណាក់។ ប្រតិបត្តិការនេះដែរបានធ្វើឡើងកាលពីវេលាម៉ោង១និង៤៥នាទីរសៀល ថ្ងៃទី២១ ខែមេសា ឆ្នាំ២០១៧ នៅផ្ទះសំណាក់យីហោ «វ៉ាស៊ីងតោន» ទីតាំងផ្ទះលេខ ២AEo ផ្លូវលេខ១១៨ ភូមិ៩ ក្នុងសង្កាត់ផ្សារថ្មីទី១ ខណ្ឌដូនពេញ។
តាមប្រភពពីសមត្ថកិច្ចបានដឹងថា ក្រុមជនសង្ស័យទាំង៥នាក់ដែលឃាត់ខ្លួនមាន ១-ឈ្មោះ SHI FASONG ភេទប្រុស អាយុ៣៤ឆ្នាំ កាន់លិខិតឆ្លងដែនលេខ E89924746 (ជនជាតិចិន) ២-ឈ្មោះ ZHANG ZHADAO ភេទប្រុស អាយុ៣៣ឆ្នាំ កាន់លិខិតឆ្លងដែនលេខ E90037510 (ជនជាតិចិន) ៣-ឈ្មោះ ម៉ន ផាន់ណា ភេទស្រី អាយុ២៧ឆ្នាំ ភូមិបាត់ដាវ ឃុំបាត់ដាវ ស្រុកខ្សាច់កណ្តាល ខេត្តកណ្តាល (ជនជាតិខ្មែរ) ៤-ឈ្មោះ ថន សាន្ត ភេទស្រី អាយុ២៨ឆ្នាំ និង៥-ឈ្មោះ នួន ស៊ីវម៉ី ភេទស្រី អាយុ១៤ឆ្នាំ (ជនជាតិខ្មែរ) ទាំងពីរនាក់មានស្រុកកំណើតនៅភូមិស្រកែជាំ ឃុំស្រកែជាំ ស្រុកព្រះស្តេច ខេត្តព្រៃវែង។
តាមប្រភពដដែលបានបន្តទៀតថា ក្នុងប្រតិបត្តិការបង្ក្រាបបទល្មើសជួញដូរមនុស្សឆ្លងដែនដោយខុសច្បាប់នេះ បានធ្វើឡើងក្រោយពីទទួលបាននូវពាក្យបណ្តឹងពីស្ត្រីជាជនរងគ្រោះជាច្រើននាក់ ដែលបានរៀបការជាមួយនឹង បុរសជនជាតិចិន ហើយយកទៅលក់នៅឯប្រទេសចិននោះ។ ទើបកម្លាំងរបស់លោកធ្វើការស្រាវជ្រាវ និងឈានទៅដល់ការបង្ក្រាប ដោយបានធ្វើការឃាត់ខ្លួនបុរសជនជាតិចិនចំនួន២នាក់ និងធ្វើការរំដោះស្ត្រីជនជាតិខ្មែរចំនួន៣នាក់ ក្នុងនោះក៏មានក្មេងងស្ត្រីជាអនីតិជនម្នាក់ផងដែរ។
ក្រោយពីការចុះប្រតិបត្តិការបង្ក្រាបបទល្មើសជួញដូរមនុស្សខាងលើនេះ បុរសជនជាតិចិនទាំង២នាក់ និងស្ត្រីជនជាតិខ្មែរ៣នាក់ បានបញ្ជូនទៅកាន់ការិយាល័យប្រឆាំងការជួញដូរមនុស្ស និងការពារអនីតិជននៃស្នងការនគរបាលរាជធានីភ្នំពេញ ដើម្បីចាត់ការទៅតាមផ្លូវច្បាប់ជាបន្តទៅទៀត៕
ចែករំលែកព័តមាននេះ