ភ្នំពេញ៖ ទីបំផុត សង្រ្គាមរវាង Top Rapper ២ដួង ពិតជាកើតឡើងដូចការគិតរបស់អ្នកគាំទ្រ​ប្រាកដមែន ដោយនៅមុននេះបន្តិច តារារ៉េប ជួរមុខក្នុងប្រទេសកម្ពុជា លោក ជីដេវីត បានចេញបទ Rap ដែលមានចំណងជើងថា «ចុម អាអូនអត់ដេក» តបត្រឡប់ទៅវិញផាំងៗ គ្មានប្រណី ទៅកាន់តារារ៉េបជួរមុខដូចគ្នា ក្រោយលោកវណ្ណដា ចេញបទ Rap ដែលមាន​ចំណងជើងថា J+O ll ខណៈអត្ថន័យឃ្លាឃ្លោង និងប្រយោគនីមួយៗ សុទ្ធសឹងវាយប្រហាចំៗ ទៅកាន់គូស្នេហ៍អ្នកនាង ទេព បូព្រឹក្ស គឺលោក ជីដេវីត។

យ៉ាងណាមិញ បទ Rap «ចុម អាអូនអត់ដេក» ចេញមិនទាន់បាន ២ម៉ោងផង ចំនួន like កើនដល់ 110K ជាង និងខមិន 30k ជាង រីឯស៊ែជិត 40K ខណៈចំនួន​អ្នកចូលមើលកើនឡើងជិតដល់ 1M Views បាត់ទៅហើយ។

ដោយឡែក ក្រឡេកមកមើលមតិក្នុងខមិន និងមតិក្នុងការស៊ែវិញ ភាគច្រើនសុទ្ធនៅខាងលោក ជី ដេវីត ដោយមានការបញ្ចេញមតិឌឺដង និងផ្លែផ្កាយ៉ាងផុសផុល ទៅកាន់ហ្វេនលោកវណ្ណដា។ រីឯ​ហ្វេនលោកវណ្ណដាវិញ ក៏មិនធម្មតាដែរ ដោយនាំគ្នាធ្វើការប្រតិកម្មតបត្រឡប់ទៅវិញ​យ៉ាងកក្រើកតែម្ដង។

មិនតែប៉ុណ្ណោះ វីដេអូបទ J+O ll លោក វណ្ណដា និងវីដេអូបទ ចុម អាអូនអត់ដេក របស់លោក ជីដេវីត ត្រូវបានមហាជនអ្នកនិយមលេងបណ្ដាញសង្គម ក៏ដូចជាអ្នកគាំទ្រ បាននាំគ្នា​យកទៅចែករំលែកបន្តនៅលើបណ្ដាញសង្គម Tik Tok និង FaceBook អមជាមួយសំណេរ​ឌឺដងបញ្ឆិតបញ្ឆៀងគ្នាទៅវិញទៅមកឥតឈប់ឈរតែម្ដង៕