ចិន2នាក់ប្តី-ប្រពន្ធស្ពាយមាសដើរលក់ អាជីវករខ្មែរសង្ស័យឆបោក ក៏ដាក់អន្ទាក់ភ្លាម
រាជធានីភ្នំពេញ ៖ នគរបាលការិយាល័យព្រហ្មទណ្ឌកម្រិតធ្ងន់ នៃនាយកដ្ឋានព្រហ្មទណ្ឌក្រសួងមហាផ្ធៃ កាលពីរសៀលថ្ងៃទី៤ មេសា
រាជធានីភ្នំពេញ ៖ នគរបាលការិយាល័យព្រហ្មទណ្ឌកម្រិតធ្ងន់ នៃនាយកដ្ឋានព្រហ្មទណ្ឌក្រសួងមហាផ្ធៃ កាលពីរសៀលថ្ងៃទី៤ មេសា
រាជធានីភ្នំពេញ ៖ នគរបាលការិយាល័យព្រហ្មទណ្ឌកម្រិតធ្ងន់ នៃនាយកដ្ឋានព្រហ្មទណ្ឌក្រសួងមហាផ្ធៃ កាលពីរសៀលថ្ងៃទី៤ មេសា បានឃាត់ខ្លួនប្តីប្រពន្ធជនជាតិចិន២នាក់នៅក្នុងផ្សារស៊ីធីមល សង្កាត់វាលវង់ ខណ្ឌ៧មករា ដែលមានបំណងយកមាសក្លែងក្លាយប្រមាណ៣០ដុំ ទៅលក់ឲ្យក្រុមអាជីវករ ។ ជនទាំងពីរនាក់នោះ ប្ដីឈ្មោះ ZHANG JAI SHEN អាយុ៤៦ឆ្នាំ និងប្រពន្ធឈ្មោះ ZHONG XIV LONG អាយុ៤១ឆ្នាំ ។
ដើមចមដែលឈានដល់ការឃាត់ខ្លួនជនជាតិចិនប្តីប្រពន្ធពីរនាក់នោះ ត្រូវបានលោកវរសេនីយ៍ឯក ជាវ វិបុល ប្រធានការិយាល័យនគរបាលព្រហ្មទណ្ឌកម្រិតធ្ងន់ ក្រសួងមហាផ្ទៃបានឲ្យដឹងថា កាលពីថ្ងៃទី២៨ មីនា ជនសង្ស័យ២នាក់ប្តីប្រពន្ធនេះ បានចូលទៅក្នុងផ្សារស៊ីធីមល ក៏បានទាក់ទងជាមួយអាជីវករខ្មែរម្នាក់ ដែលចេះភាសាចិនលក់នៅទីនោះ ។ ចិន២នាក់ប្តីប្រពន្ធនេះបានរៀបរាប់ថា គេទើបមកពីខេត្តខ្វាងទុង ប្រទេសចិន ដើម្បីបើកក្រុមហ៊ុនមួយវិនិយោគនៅស្រុកខ្មែរ ។ ក្រោយពីបានជជែកគ្នាលេងរួចមក ប្តីប្រពន្ធ និងអាជីវករខ្មែរលក់ដូរនៅផ្សារស៊ីធីមល យកលេខទូរសព្ទ័គ្នាទៅវិញទៅមក ក៏ចេញបាត់ទៅ ។
លោក ជាវ វិបុល បន្តថា ពេលប្តីប្រពន្ធ២នាក់នោះទៅបាត់មួយរយៈ ស្រាប់តែមានការទាក់ទងតាមទូរស័ព្ទ មកអាជីករខ្មែរនៅផ្សារស៊ីធីមលថា គេ២នាក់ប្តីប្រពន្ធបានជីកដីធ្វើការដ្ឋានប៉ះចំកំណប់មាស ច្រើនសន្ធឹកសន្ធប់ច្រើនដុំ និងរាប់សិបគីឡូក្រាមទៀតផង ដូច្នេះចង់បានយោបល់ថា តើធ្វើយ៉ាងណា ឬរកវិធីយ៉ាងម៉េចបានផ្ញើមាសនោះទៅស្រុកគាត់ (ប្រទេសចិន) ។
អាជីវករខ្មែរនៅផ្សារស៊ីធីមល មិនឆោតល្ងង់ទេ គ្រាន់តែចិន២នាក់ប្តីប្រពន្ធទូរស័ព្ទនិយាយដូច្នោះភ្លាមក៏ដឹងភ្លាមថា នេះពិតជាល្បិចកលជនឆបោកទាំងស្រុង ពីព្រោះស្រុកខ្មែរមិនដែលមានកំណប់់មាសរាប់សិបគីឡូដូចគាត់និយាយនោះទេ ។ ពេលនោះអាជីវករក៏បានផ្តល់គំនិតវិញថា អ្នកឯងមិនអាចផ្ញើមាសទាំងដុំចេញទៅស្រុកចិនបានទេ ត្រូវយកមាសនោះមកលក់យកជាប្រាក់ដុល្លារសិន ហើយចាំយកប្រាក់នោះដាក់បញ្ចូលទៅក្នុងកុងធនាគារ ។
ពេលនោះប្តីប្រពន្ធធ្វើជាឆ្ងល់ប្រាប់អាជីវករ ថា មិនដឹងយកទៅលក់ឯណា ទើបអាជីវករបន្លុយថា យកមកភ្នំពេញគាត់ជួយលក់ ឲ្យតែប្រាកដជាមាសសុទ្ធ ។ នៅថ្ងៃទី០៣ មេសា ប្តីប្រពន្ធពីរនាក់បានស្ពាយមាសក្លែងក្លាយ ធ្វើដូចមាសស្នូក (មាសឆេងម៉េង) មកដល់ផ្សារស៊ីធីមល ប៉ុន្តែគេប្រើល្បិចយកមាសសុទ្ធ១ដុំមានទម្ងន់ប្រហែល២ជី មកឲ្យអាជីវករនោះធ្វើតេស្ដដុតមើលសុទ្ធឬមិនសុទ្ធ ដើម្បីឲ្យគេជឿទុកចិត្តថា មាសនោះសុទ្ធមែន ។ ទោះជាយ៉ាងនេះក្តី អាជីវករខ្មែរនៅតែមិនជឿទាំងស្រុងថា មាសមួយសាក់កាដូរនោះជាមាសសុទ្ធទាំងអស់ទេ ក្រោយពីធ្វើតេស្ដហើយចិនពីរនាក់ប្តីប្រពន្ធ និងអាជីវករបានបែកគ្នា ដោយអាជីវករបានកំណត់ថ្ងៃទី៤ មេសា និងយកប្រាក់មកទិញមាសក្លែងក្លាយពីចិនពីរនាក់ប្តីប្រពន្ធនោះ ។
លោកវរសេនីយ៍ឯក ជាវ វិបុល បន្តថា ពេលចិន២នាក់ប្តីប្រពន្ធចេញផុតទៅ អាជីវករម្នាក់នោះបានស្គាល់លេខទូរស័ព្ទលោកឧត្តមសេនីយ៍ឯក ម៉ក់ ជីតូ អគ្គស្នងការរងនគរបាលជាតិ ទទួលការងារប្រយុទ្ធប្រឆាំងគ្រឿងញៀន ក៏រៀបរាប់ប្រាប់តាមដំណើររឿង ។ ពេលនោះលោកអគ្គស្នងការរង បានផ្តល់ជាដំណឹងទៅនាយកដ្ឋាននគរបាលព្រហ្មទណ្ឌ ដើម្បីឲ្យចាត់ការតាមនីតិវិធី ព្រោះរឿងនេះពិតជាល្បិចជនឆបោកទាំងស្រុង ។ ដោយមានការសម្របសម្រួលពីស្ថាប័នអយ្យការសាលាដំបូងរាជធានី លោកឧត្តមសេនីយ៍ឯក សុខ ខេមរិន ប្រធាននាយកដ្ឋាននគរបាលព្រហ្មទណ្ឌ បានចាត់តាំងលោកឧត្តមសេនីយ៍ទោ ឡឹក វណ្ណៈ អនុប្រធាននាយកដ្ឋាន និងបានប្រើប្រាស់កម្លាំងនគរបាលព្រហ្មទណ្ឌកម្រិតធ្ងន់ នៅល្ងាចថ្ងៃទី០៤ មេសា ចុះទៅចាប់ឃាត់ខ្លួនជនជាតិចិន ពីរនាក់ប្តីប្រពន្ធពេលកំពុងស្ពាយសាក់កាដូរដាក់មាសក្លែងក្លែង ប៉ុនប៉ងយកមកលក់ ជាក់ស្តែងនៅមុខផ្សារស៊ីធីមល និងបាននាំទៅកាន់នាយកដ្ឋាននគរបាលព្រហ្មទណ្ឌតែម្តង ។
បន្ទាប់ពីចាប់ឃាត់ខ្លួនចិនពីរនាក់ប្តីប្រពន្ធ សមត្តកិច្ចបានពិនិត្យ និងឆែកឆេរក្នុងសាក់កាដូនោះ ឃើញដុំមាសក្លែងក្លាយធ្វើប្រហាក់ប្រហែសមាសស្នូក ដែលចិនយកទៅសែនផ្នូចំនួន៣០ដុំ ក្នុង១ដុំមានទម្ងន់ ប្រហែលជា១០ដំឡឹង និងមាសធ្វើជារូបអ្នកតាចិន១ មានទម្ងន់ប្រហែលជា៣ទៅ៤គីឡូក្រាម ។ បើតាមចម្លើយជនជាតិចិននោះឆ្លើយថា ក្នុង១ដុំមាសគេលក់ឲ្យអាជីវករ តម្លៃតែ២ពាន់ដុល្លារអាមេរិក ។ ជនសង្ស័យទាំង២នាក់ត្រូវបានសមត្តកិច្ចនគរបាលព្រហ្មទណ្ឌ កសាងសំណុំរឿងបញ្ជូនទៅកាន់សាលាដំបូងរាជធានី ៕
ចែករំលែកព័តមាននេះ