លទ្ធផលចរចា ការប្រឈមមុខគ្នារវាងកម្ពុជា-ឡាវរឿងសង់ប៉ុស្តិ៍ព្រំដែនបានធូរស្រាល
ខេត្តស្ទឹងត្រែង ៖ ភាគីកម្ពុជា-ឡាវ បានឯកភាពគ្នាដោយផ្អាកការសង់ប៉ុស្តិ៍ព្រំដែនទាំងសងខាង ហើយអាជ្ញាធរនៃខេត្តទាំងពីរ (ស្ទឹងត្រែង-ចំប៉ាសាក់)
ខេត្តស្ទឹងត្រែង ៖ ភាគីកម្ពុជា-ឡាវ បានឯកភាពគ្នាដោយផ្អាកការសង់ប៉ុស្តិ៍ព្រំដែនទាំងសងខាង ហើយអាជ្ញាធរនៃខេត្តទាំងពីរ (ស្ទឹងត្រែង-ចំប៉ាសាក់) និងគ្រោងជួបពិភាក្សាគ្នាជាថ្មីក្រោយពិធីបុណ្យចូលឆ្នាំប្រពៃណី នាពេលខាងមុខ ។ នេះបើតាមការអះអាងពីមេបញ្ជាការយោធាខេត្តស្ទឹងត្រែងបានថ្លែងកាលពីព្រឹកថ្ងៃទី៥ មេសា នៅចំណុចប៉ុស្តិ៍ដើមល្វាវ៉ើនខាវ ឃុំអូរស្វាយ ស្រុកថាឡាបរិវ៉ាត់ ។
ការតានតឹងបានកើតឡើងចាប់ពីថ្ងៃទី២ មេសា បន្ទាប់ពីកម្លាំងយោធាឡាវរួមទាំងសេនាជនជាច្រើននាក់បានដាក់កម្លាំងការពារនិងបិទច្រកព្រំដែន មិនឱ្យពលរដ្ឋខ្មែរនាំកសិផលនិងទំនិញចេញចូលដូចធម្មតា ដោយមានកម្លាំងយោធា និងសេនាជន១២នាក់ ឈរជើងនៅចំណុចលូ១ក្បែរប៉ុស្តិ៍ដើមល្វា ច្រកវ៉ើនខាវ លើដីកម្ពុជា និង៣នាក់ទៀតឈរជើងនៅច្រកប៉ុស្តិ៍វើុនខាមលើដីរបស់ខ្លួន ហើយនៅរសៀលម៉ោង២ ភាគីឡាវបានបន្ថែមកម្លាំងរបស់ខ្លួន៣រថយន្តទៀតមកឈរជើង ។ សកម្មភាពនេះ ហាក់ដូចត្រៀមជើងការ នៅលើទឹកដីខ្លួនក្នុងបំណងរារាំងមិនឱ្យកម្ពុជាសង់ប៉ុស្តិ៍ដើមល្វានៅដីកម្ពុជា ដែលមានគ្រឹះទីតាំងបន្សល់ទុកតាំងពីសម័យបារាំង ។
ការព្យាយាមសង់ប៉ុស្តិ៍ដើមល្វាពីសំណើភាគីកម្ពុជានោះ ត្រូវបានមន្ត្រីខ្មែរនិយាយថា គឺបន្ទាប់ពីការហាមឃាត់បញ្ចប់ការសាងសង់ប៉ុស្តិ៍ព្រំដែនរបស់ខ្លួន លើចំណុចដែលប្រទាក់ប្រទាញគ្នានៅឡើយ តែភាគីឡាវបានជម្នះឈូសឆាយផ្លូវចូលដើម្បីដឹកសម្ភារសំណង់បន្តធ្វើប៉ុស្តិ៍របស់ខ្លួន ដោយមិនអើពើពីការហាមឃាត់ពីភាគីកម្ពុជា។ ដោយសារមានការជម្នះធ្វើប៉ុស្តិ៍រៀងខ្លួន ទីបំផុតទើបមានការចរចា ហើយប៉ុន្មានម៉ោងក្រោយច្រករបៀងដែលឡាវបិទ ត្រូវបានបើកឱ្យចេញចូលជាធម្មតា តែមានការត្រួតពិនិត្យនិងឆែកឆេរយ៉ាងតឹងរឹងពីភាគីឡាវ ។
ប្រភពពីកម្លាំងការពារព្រំដែនកម្ពុជាបន្តថា នៅថ្ងៃបន្តបន្ទាប់អាជ្ញាធរខេត្តបានចាត់បេសកជនពិសេសរួមកងកម្លាំង និងអង្គភាពពាក់ព័ន្ធចុះជួបរកដំណោះស្រាយបន្តបន្ទាប់ តែពុំមានលទ្ធផលផ្លែផ្កាទេ ដោយភាគីឡាវស្នើឱ្យកម្ពុជាផ្អាកការសង់ប៉ុស្តិ៍ដើមល្វា ។ ដោយឡែកកម្ពុជាក៏បានឆ្លើយតបវិញថា ប្រសិនឱ្យកម្ពុជាផ្អាកលុះត្រាមិត្តឡាវ ផ្អាកសកម្មភាពសង់ប៉ុស្តិ៍ដុងក្រឡចាស់ដែរ ។
ការជួបចរចារយៈពេលប៉ុន្មានថ្ងៃមកនោះ ភាគីឡាវ នៅតែប្រើយុទ្ធសាស្ត្រដដែល ដោយលើកហេតុផល យោងតាមឯកសារកំណត់ហេតុការចុះត្រួតពិនិត្យ បរិវេណតំបន់ព្រំដែនរួម ឡាវ-កម្ពុជា កម្ពុជា-ឡាវ ។ គណៈកម្មការ កិច្ចសហប្រតិបតិ្តការរក្សាសន្តិសុខ របៀបរៀបរយតាមបណ្តោយព្រំដែនទូទៅ ឡាវ-កម្ពុជា កម្ពុជា-ឡាវ នៅស្រុកថាឡាបរិវ៉ាត់ និងក្រុងស្ទឹងត្រែង ខេត្តស្ទឹងត្រែងនៃព្រះរាជាណាចក្រកម្ពុជានិងនៅស្រុកខូង ខេត្តចំប៉ាសាក់ នៃសាធារណរដ្ឋប្រជាធិបតេយ្យ ប្រជាមានិតឡាវថ្ងៃទី២៩ ខែមិថុនា ឆ្នាំ២០១៦។ ភាគីកម្ពុជាដឹកនាំដោយលោកឧត្តមសេនីយ៍ឯក សៀក សុជាតិ នាយរងសេនាធិការចម្រុះនាយកទីចាត់ការការងារព្រំដែន អគ្គបញ្ជាការដ្ឋាននៃកងយោធពលខេមរភូមិន្ទ ជាប្រធានគណៈកម្មការកិច្ចសហប្រតិបត្តិការរក្សាសន្តិសុខរបៀបរៀបរយតាមព្រំដែនទូទៅកម្ពុជា-ឡាវ ។ ចំណែកភាគីឡាវដឹកនាំដោយឧត្តមសេនីយ៍ត្រី សីុផាន់ តុតថាក់វង្ស នាយក នាយកដ្ឋានយោធាព្រំដែន អគ្គសេនាធិការ កងទ័ពប្រជាជនឡាវ ជាប្រធានគណៈកម្មការ កិច្ចសហប្រតិបត្តិការរក្សាសន្តិសុខ របៀបរៀបរយ តាមបណ្តោយព្រំដែនទូទៅឡាវ-កម្ពុជា ។ រហូតមកទល់ព្រឹកថ្ងៃទី៥ មេសា ភាគីនៃប្រទេសទាំងពីរបានបញ្ចេញស្នាមញញឹមដាក់គ្នា ដោយសារស្ថានការទាំងឡាយក្លាយជាសន្តិភាព ។
ក្រុមអ្នកកាសែតបានជួបជាមួយលោកឧត្តមសេនីយ៍ត្រី ស្វាយ ញ៉ន មេបញ្ជាការយោធាតំបន់ប្រតិបត្តិការសឹករង ខេត្តស្ទឹងត្រែង ខណៈចុះទៅតំបន់ស ចំណុចដែលមិនទាន់ឯកភាពនោះលោកបានបញ្ជាក់ថា ការបិទច្រកព្រំដែន នៅចំណុចប៉ុស្តិ៍ទឹក ហៅថាដើមល្វា កាលពីថ្ងៃទី២ ខែមេសា ត្រឹមតែ២ទៅ៣ម៉ោង ក្រោយមក ក៏បានបើកឱ្យឆ្លងកាត់ជាធម្មតាវិញ ។
លោកថា ពេលនោះគឺជាការយល់ច្រឡំគ្នាតែប៉ុណ្ណោះ ។ ចំពោះបញ្ហារឿងសាងសង់ប៉ុស្តិ៍នៅចំណុចដើមល្វា និងដុងក្រឡចាស់ទុកកិច្ចការទាំងនេះ ឱ្យលោកអភិបាលខេត្តប្រទេសទាំងពីរ ដោះស្រាយគ្នា នៅក្រោយបុណ្យចូលឆ្នាំប្រពៃណីខ្មែរ ។ ឯករណីសាងសង់ប៉ុស្តិ៍នៅកន្លែងពីរផ្សេងគ្នាត្រូវផ្អាក មិនឱ្យធ្វើសកម្មភាពអ្វីទាំងអស់ រង់ចាំថ្នាក់ដឹកនាំខេត្តដោះស្រាយបន្ត ។ ដោយឡែកលោកឧត្តមសេនីយ៍ត្រី ស៊ូ កៃភីមម៉ាសាន មេយោធាខេត្តចំប៉ាសាក់របស់ឡាវ បានប្រាប់ដែរថា ការជួបគ្នារវាងយោធាខេត្តស្ទឹងត្រែងនិងចំប៉ាសាក់ គឺជាការយោគយល់គ្នាទៅវិញទៅមក ។ ការប្រើកងកម្លាំងសមត្ថកិច្ចដាក់គ្នានៅចំណុចដើមល្វា គឺជាការយល់ច្រឡំគ្នា ។ ការជួបគ្នារវាងយោធា នៃខេត្តទាំងពីរជាការរក្សាសន្តិសុខសណ្តាប់ធ្នាប់ល្អ ។ ចំពោះបញ្ហាដែលយល់ច្រឡំដាក់គ្នា កាលពីកន្លងមក ត្រូវបានបញ្ចប់ទុកឱ្យរដ្ឋអំណាចខេត្តដោះស្រាយបន្ត ៕
ចែករំលែកព័តមាននេះ