រាជធានីភ្នំពេញ ៖ កញ្ញាហ៊ិន លីដា អតីតបេក្ខនារីវគ្គចុងក្រោយនៃកម្មវិធីប្រឡងចម្រៀងលំដាប់ពិភពលោក«ខេមបូឌានអាយឌល»គេរំពឹងថា នឹងបានការជ្រោមជ្រែងពីផលិតកម្មរស្មីហង្សមាស ប៉ុន្តែ ថ្មីៗនេះមានព័ត៌មានលេចឮថានាងមិនអាចបន្តនៅហង្សមាសបានទេ ព្រោះនាងបាត់មុខឈឹងពីវេទិកាប្រគំតន្ត្រីរបស់ផលិតកម្ម ។
កញ្ញាហ៊ិន លីដា មិនបានបង្ហាញវត្តមានក្នុងកម្មវិធីប្រគំតន្ត្រីខ្នាតធំរបស់ហង្សមាសទេ ដោយឃើញតែតារាលេចធ្លោរបស់ខ្លួន គឺតារាជើងចាស់ល្បីឈ្មោះ និងតារាចំណូលថ្មីកើតចេញពីកម្មវិធីប្រឡងនានាមានឱកាសរហូត ។
ចំណែកហ៊ិន លីដា វិញគេរំពឹងថានឹងមានឱកាសបង្ហាញទេពកោសល្យសម្តែង ជូនទស្សនិកជនទស្សនាតាមរយៈកម្មវិធីរបស់ហង្សមាស តែមិនដូច្នេះទេ ។ លីដា តស៊ូយ៉ាងលំបាកក្នុងកម្មវិធីប្រឡងចម្រៀងលំដាប់ពិភពលោកខេមបូឌានអាយឌលរដូវកាលទី២ ប្រចាំស្ថានីយទូរទស្សន៍ហង្សមាស ។
ការដែលហុិន លីដា មិនបានបង្ហាញវត្តមានក្នុងកម្មវិធីតន្ត្រី ធំៗរបស់ហង្សមាស ធ្វើឱ្យមានការងឿងឆ្ងល់ពីមូលហេតុ ព្រោះនាងជាតារាចម្រៀងមានទឹកដមសំឡេងល្អ ។ តាមប្រភពនានាលើកឡើងថាកញ្ញាហ៊ិន លីដា ទំនងមិនអាចបន្តការងារនៅហង្សមាសទេ នាងអាចលាឈប់ដោយមានការងារផ្ទាល់ខ្លួន ។ មានការលើកឡើងថានាងមានអារម្មណ៍អាក់អន់ស្រពន់ចិត្តជាមួយហង្សមាសដែលលើកតារា ថ្មីៗមិនស្មើគ្នាទុក ម្ខាងៗឱ្យអាប់រស្មីទើបនាងសម្រេចចិត្តដើរចេញ ។
ហេតុផលផ្សេងទៀតលើកឡើងថាហុិន លីដា អាចត្រូវម្តាយឪពុកឱ្យបន្ថយតួនាទីជាអ្នកចម្រៀង ព្រោះមួយរយៈនៃការប្រឡងចម្រៀង និងច្រៀងតាមភោជនីយដ្ឋានគឺនាងហត់នឿយខ្លាំង ។ ពួកគាត់ចង់ឱ្យលីដាសម្រាកឱ្យបានច្រើនខ្លាចប៉ះពាល់សុខភាពទៅជាឈឺគ្រាដែលនាងនៅក្មេង ។
រីឯមតិមួយចំនួនទៀតលើកឡើងថា ហ៊ិនលីដា អាចនឹងចេញទៅបន្តការសិក្សារៀននៅក្រៅប្រទេស គ្រាដែលបងប្អូន និងឪពុកម្តាយកំពុងរៀបចំឯកសារសម្រាប់នាង ។
ទាំងនោះជាព័ត៌មានដែលទទួលបាន ខ្លះៗប៉ុណ្ណោះ ដោយពុំអាចចាត់ទុកថាពិត ឬមិនពិតកម្រិតណាទេ ដ្បិតមិនទាន់អាចទាក់ទងកញ្ញាហ៊ិន លីដា សុំការឆ្លើយបកស្រាយបាន ។
ចំណែកក្រុមហ៊ុនទូរទស្សន៍ហង្សមាស ក៏មិនអាចសុំការបំភ្លឺទាក់ទិនកញ្ញាហ៊ិន លីដា បានដែរ ៕
ចែករំលែកព័តមាននេះ