ខេត្តក្រចេះ ៖ សម្ភារ អីវ៉ាន់លក់ដូរ នៅក្នុងផ្ទះលក់គ្រឿងសំណង់ គ្រឿងទេស និងទាំងផ្ទេរប្រាក់ដ៏ធំមួយ នៅជាយក្រុងក្រចេះ ត្រូវបានឆាបឆេះបណ្តាលឲ្យខូខាតស្ទើរទាំងស្រុង ដោយសរុបការខាតបង់ក្នុង គ្រោះអគ្គិភ័យនេះអស់ចំនួនជាង១៥ម៉ឺនដុល្លារសហរដ្ឋអាមេរិក។ នេះបើតាមការបញ្ជាក់ពីម្ចាស់ផ្ទះ រងគ្រោះ ប្រាប់មកនគរបាល។ គ្រោះអគ្គិភ័យ ត្រូវបានបង្កឲ្យមានការភ្ញាក់ផ្អើលកាលពីរសៀលថ្ងៃទី២៤ មីនា ទៅលើផ្ទះរងគ្រោះ មានទីតាំងជាប់នឹងផ្លូវជាតិលខ៧ ក្នុងទីប្រជុំជននៅជាយក្រុងក្រចេះ ក្នុងសង្កាត់អូរឬស្សី ក្រុងក្រចេះ។
ជុំវិញហេតុការណ៍គ្រោះអគ្គិភ័យដែលបង្កមហន្តរាយទ្រង់ទ្រាយធំ និងថែមទាំងធ្វើឲ្យម្ចាស់ផ្ទះភូមិធំៗនៅក្បែរនោះភ័យស្លន់ស្លោព្រលឹងចុងសក់ បន្ទាប់ពីឃើញសភាព ភ្លើងឆេះផ្សែងហុយខ្មួលខ្មាញ់រួចមកនោះ ក៏គេនៅមិនទាន់កំណត់រកមូលហេតុដែលបង្ក ឡើងនោះឲ្យ ប្រាកដជាក់លាក់នៅឡើយទេ។ តែបើតាមការលើកឡើងពីបុរសជាម្ចាស់ផ្ទះឈ្មោះ ប៉ុន សំបូរ អាយុ៣៣ឆ្នាំ បានប្រាប់ថា មុនកើតហេតុគឺមានកម្ទេចភ្លើងបានជ្រុះ ធ្លាក់ពីលើដំបូលស័ង្កសីចុះមក ក្រោម ទើបបង្កឲ្យមានការឆាបឆេះ។
មិនត្រឹមតែប៉ុណ្ណោះផ្ទះ បង្កហេតុនេះមានលក់គ្រឿងទេស និងក៏មានស្តុកកំប៉ុងហ្គាសទៀតផងនោះទើបងាយឆេះ និងផ្ទុះអណ្តាតភ្លើង។ ជាមួយនឹងគ្រោះអគ្គិភ័យ នេះ គឺនគរបាលជាច្រើននាក់ដឹកនាំបញ្ជាផ្ទាល់ដោយ លោកឧត្តមសេនីយ៍ទោ លន់ សុផាត ស្នងការ នគរបាលខេត្ត បានបានប្រើប្រាស់រថយន្តពន្លត់ អគ្គិភ័យចំនួន៣គ្រឿង និងប្រើប្រាស់ទឹកជាច្រើនឡាន ដើម្បីជួយបាញ់ពន្លត់ និងទប់ស្កាត់ភ្លាមៗ ទើបមិនមានការឆាបឆេះរាលដាលដល់ផ្ទះឈើ និងផ្ទះ ថ្មតូចធំ របស់អ្នកជិតខាង។
បើតាមលោកឧត្តមសេនីយ៍ត្រី ច្រឹង ផល្លី ស្នងការរងទទួលបន្ទុក អាវុធ ជាតិផ្ទុះ និងអគ្គិភ័យ បានបញ្ជាក់ថា ហេតុការណ៍គ្រោះអគ្គីភ័យនេះ មិនបានបង្កឲ្យមានអ្នករងគ្រោះ នោះទេ។ ហើយមូលហេតុគឺលោកបានសន្និដ្ឋានថា អាចបណ្តាលមកពីទុស្សេចរន្តអគ្គីនី ចេញពីខ្សែ ភ្លើងនៅលើដំបូលស័ង្កសី នៅក្នុងរោងសំយ៉ាបលក់ដូរមុខផ្ទះ។ លោកស្នងការរងបានស្រង់ការរៀបរាប់ ពីម្ចាស់ផ្ទះរងគ្រោះថា គ្រោះអគ្គិភ័យនេះ បានបង្កឲ្យខាតបង់សម្ភារ របស់របរលុយកាក់ សរុបជាទឹក ប្រាក់ អស់ចំនួនជាង១៥ម៉ឺនដុល្លារសហរដ្ឋអាមេរិក៕
ចែករំលែកព័តមាននេះ