ផ្អើលរត់ជាន់ជើងគ្នាទាំងយប់ដោយសារតែ…
រាជធានីភ្នំពេញ ៖ ដីឡូត៍មួយកន្លែងដែលជាកន្លែងសម្រាប់ចំរាញ់ប្រេងខ្មៅត្រូវបានអគ្គីភ័យឆាបឆេះយ៉ាងសន្ធោសន្ធៅបង្កឱ្យប្រជាពលរដ្ឋ និងអាជ្ញាធរក្នុងតំបន់រត់ជាន់ជើងគ្នា
រាជធានីភ្នំពេញ ៖ ដីឡូត៍មួយកន្លែងដែលជាកន្លែងសម្រាប់ចំរាញ់ប្រេងខ្មៅត្រូវបានអគ្គីភ័យឆាបឆេះយ៉ាងសន្ធោសន្ធៅបង្កឱ្យប្រជាពលរដ្ឋ និងអាជ្ញាធរក្នុងតំបន់រត់ជាន់ជើងគ្នាហៅរថយន្តពន្លត់អគ្គីភ័យមកពន្លត់អស់ប្រាំគ្រឿងទើបអាចគ្រប់គ្រងបាន ហេតុការណ៍នេះបានកើតឡើងកាលពីវេលាម៉ោង9យប់ ថ្ងៃទី23 ខែមិនា ឆ្នាំ2017 ត្រង់ចំណុចក្នុងដីឡូតិ៍មួយកន្លែង ក្បែរផ្ទះលោក ជា សុផារ៉ា ទេសរដ្ឋមន្ត្រី រដ្ឋមន្ត្រីក្រសួងដែនដី ស្ថិតក្នុងភូមិទួលពពែ ក្រុម៥ សង្កាត់ទួលសង្កែ២ ខណ្ឌឫស្សីកែវ ។
តាមប្រភពព័ត៌មានពីកន្លែងកើតហេតុបានឱ្យដឹងថា មុនពេលកើតហេតុគេឃើញមានផ្សែងខ្មៅបានហុយចេញពីកន្លែងចំរាញ់ប្រេងខ្មៅមួយកន្លែងក្នុងដីឡូតិ៍ជួលដែលមានទំហំ20ម៉ែត្រគុណ30ម៉ែត្រ ខណៈពេលដែលគេមកមើលស្រាប់តែឃើញភ្លើងបានឆាបឆេះក្នុងឡសំរាប់ស្លប្រេងខ្មៅ ទោះបីជាប្រជាពលរដ្ឋនាំគ្នាយកទឹកមកបាញ់ពន្លត់ក៏គ្មានប្រយោជន៍ដែរ ព្រោះក្នុងឡស្លប្រេងខ្មៅនោះពោរពេញទៅដោយប្រេងដែលជាហេតុធ្វើឱ្យពេលដែលគេយកទឹកទៅបាញ់ធ្វើឱ្យភ្លើងឆេះកាន់តែខ្លាំងឡើង រហូតដល់សមត្ថកិច្ចមកដល់ទីតាំងកើតហេតុបានទាក់ទងទៅកាន់រថយន្តពន្លត់អគ្គីភ័យរបស់ស្នងការរាជធានីភ្នំពេញមកបាញ់ពន្លត់ចំនួន៨គ្រឿង តែប្រើប្រាស់អស់តែ៥គ្រឿងនោះទេបានរលត់ទៅវិញ ដោយប្រើរយៈពេលមួយម៉ោង ។
គួរបញ្ជាក់ថា ចំពោះកម្មករដែលស្នាក់នៅក្នុងកន្លែងចំរាញ់ប្រេងខ្មៅខាងលើនេះពេលដែលភ្លើងបានឆេះឡើងគឺបាននាំគ្នារត់ចេញអស់ពីកន្លែងកើតហេតុអស់រលីងហើយគ្មាននរណាម្នាក់ដឹងអំពីមូលហេតុនៃការបង្កឱ្យមានអគ្គីភ័យនេះកើតឡើងនោះទេ ៕
ចែករំលែកព័តមាននេះ