បច្ចេកវិទ្យាជំរុញដល់តម្លាភាព និងប្រសិទ្ធភាពការងាររដ្ឋនៅកម្ពុជា

ថ្ងៃទី ២៤ ខែ មីនា ឆ្នាំ ២០១៧

ម៉ោង ០៨:១៥

ការរីកលូតលាស់នៃបណ្តាញសង្គមបានបញ្ចប់សម័យកាលសិទ្ធិផ្តាច់មុខនៃព័ត៌មានរបស់ប្រព័ន្ធផ្សព្វផ្សាយបែបប្រពៃណីដូចជា កាសែត វិទ្យុ និងទូរទស្សន៍។ វាបានធ្វើឱ្យមនុស្សគ្រប់គ្នាមានលទ្ធភាពនៅក្នុងការចែកផ្សាយព័ត៌មានដែលគេយល់ថា ប៉ះពាល់ដល់ការរស់នៅរបស់មនុស្សនៅក្នុងសង្គម។

នៅក្នុងប្រទេសកម្ពុជា ការប្រើប្រាស់បណ្តាញហ្វេសប៊ុកបានកាន់តែទូលំទូលាយ និងកាន់តែមានប្រយោជន៍សម្រាប់សង្គម ដោយបានធ្វើឱ្យមានទំនាក់ទំនងកាន់តែជិតស្និទ្ធិរវាងមេដឹកនាំ ឬអ្នកនយោបាយ និងប្រជាជន។ ទន្ទឹមនោះ វាក៏បានក្លាយជាកន្លែងមួយដែលប្រជាជនបញ្ចេញមតិ និងយោបល់ ចំពោះបញ្ហានានានៅក្នុងសង្គមដែលពួកគេយល់ថា កំពុងតែប៉ះពាល់ដល់ការរស់នៅរបស់ពួកគេ។

កន្លងមក មានរឿងរ៉ាវជាច្រើនដែលគេផ្សព្វផ្សាយតាមហ្វេសប៊ុក ហើយបញ្ហាក៏ត្រូវបានដោះស្រាយ។ រឿងដែលគេចងចាំបំផុតនោះ គឺប្រតិកម្មរបស់ប្រជាជនចំពោះការចេញប្រើច្បាស់ចរាចរណ៍ដែលក្រោយមកត្រូវផ្អាកទៅវិញ បន្ទាប់ពីប្រជាជនប្រតិកម្មតាមហ្វេសប៊ុក ហើយសម្តេចតេជោបានយល់ច្បាស់អំពីប្រតិកម្មរបស់ប្រជាជន។

ហ្វេសប៊ុកបានក្លាយជាកន្លែងមួយដែលប្រជាជនកម្ពុជាបានបញ្ចេញមតិយោបល់យ៉ាងទូលំទូលាយចំពោះបញ្ហាសង្គម និងការមិនសប្បាយចិត្តទាំងឡាយដែលពួកគេមាន។ ដូច្នេះវាចាំបាច់ណាស់ដែលមន្ត្រីរដ្ឋទាំងអស់ត្រូវយល់ថា ការបិទបាំងព័ត៌មានចំពោះអំពើខុសឆ្គងទាំងឡាយនឹងមិនមានប្រសិទ្ធភាពដូចជាពេលមុនទៀតទេ។ រឿងអាស្រូវនានាងាយនឹងត្រូវគេទម្លាយចេញតាមរយ:បណ្តាញសង្គមហ្វេសប៊ុកនេះ។

មធ្យោបាយដ៏ល្អតែមួយគត់ ដើម្បីកំុឱ្យមានរឿងអាស្រូវខ្ចរខ្ចាយ គឺមិនត្រូវប្រព្រឹត្តអ្វីដែលខុសឆ្គងហើយបំពេញតួនាទីតាមការទទួលខុសត្រូវ។

បច្ចេកវិទ្យាបានធ្វើឱ្យការផ្សព្វផ្សាយព័ត៌មានងាយនឹងធ្វើដោយមនុស្សគ្រប់គ្នា។ ដូច្នេះវានឹងជួយឱ្យមនុស្សទាំងអស់កាន់តែមានការទទួលខុសត្រូវចំពោះការងារររបស់ពួកគេ ពិសេសមន្ត្រីដែលត្រូវបម្រើប្រជាជន៕