រាជធានីភ្នំពេញ ៖ តារាសម្តែងនាងឈិត សុជាតា បានបង្ហាញព័ត៌មានពីការសម្រាលកូនភ្លោះរបស់នាងតាមហ្វេសប៊ុក កាលពីពេលថ្មីៗកន្លងមក ធ្វើឱ្យមហាជនចាប់អារម្មណ៍ខ្លាំង ដ្បិតមិនធ្លាប់ដឹងព័ត៌មានពីការមានគូរបស់នាងទេ ។
ការបង្ហាញព័ត៌មាននោះត្រូវមហាជនមួយចំនួនរិះគន់ដ្បិតនាងសម្រាលកូន តែដំណឹងរៀបការរបស់នាងមិនធ្លាប់ឮជាសាធារណៈទេ ។
ឈិត សុជាតា មិនអើពើចំពោះពាក្យរិះគន់ទាំងនោះទេ ប៉ុន្តែអ្វីដែលនាងមានចេតនាទម្លាយរឿងសម្រាលកូននេះ គឺដោយសារតែនាងយល់ថាលើលោកនេះតើមានមនុស្សស្រីប៉ុន្មាននាក់ដែលបង្កើតកូនហើយ មិនហ៊ានទទួលស្គាល់កូនខ្លួនឯងនោះ? សម្រាប់នាងមិនមែនជាម្តាយប្រភេទនេះទេ ។
នៅពេលបង្ហោះរូបភាពតាមហ្វេសប៊ុករួចមកមានអ្នកឆាតសួរនាងជាច្រើនថា តើជាការណ៍ពិតទេ ដែលនាងសម្រាលកូនត្រឹម៦ខែ ហើយក្មេងធំថ្លោសដូចរូបភាព ។ ត្រង់ចំណុចនេះឈិត សុជាតា អះអាងថា នាងសម្រាលកូនត្រឹម៦ខែប៉ុណ្ណោះ នៅមន្ទីរពេទ្យឯកជនមួយនៃទីក្រុងបាងកក ប្រទេសថៃ ។
ឆ្លងកាត់ការវះកាត់រួច កូនច្បងឈ្មោះ boy សម្រាលបានទម្ងន់ជាង៨ខាំ ចំណែកកូនប្អូនឈ្មោះ Apple ជាង៧ខាំ ។ រយ:ពេលជាង៣ខែ ដែល កូនៗរបស់នាងចិញ្ចឹមនៅក្នុងទូ ។
រហូតមកដល់ពេលនេះកូនភ្លោះរបស់នាងមានសុខភាពល្អ ហើយនាងនឹងចំណាយពេលឲ្យបានច្រើនសម្រាប់មើលថែកូន ដែលជាតំណក់ឈាមស្វាមីរបស់នាងនាពេលនេះ ។
បន្ទាប់ពីសម្រាលកូនរួចមក ឈិត សុជាតា ប្រកាសថា នឹងមិនយកខ្លួនពាក់ព័ន្ធនឹងការងារសិល្បៈទៀតទេ បើទោះបីជាកូនរបស់នាងរឹងដៃរឹងជើង និងមិនចាំបាច់ទាមទារឲ្យមានការមើលថែទាំច្រើនក៏ដោយ ។
ឈិត សុជាតា បញ្ជាក់ថា «ការដែលនាងខ្ញុំសម្រេចចិត្តទម្លាយពីជីវិតឯកជនរបស់នាងខ្ញុំនាពេលនេះ ក៏ជាមូលហេតុមួយដែលនាងខ្ញុំបានគិតទុកជាមុនថា នឹងត្រូវដកខ្លួនពីអាជីពសិល្បៈនេះផងដែរ ។ នាងខ្ញុំត្រូវការពេលវេលាឲ្យបានច្រើនសម្រាប់មើលថែកូន ផ្ទះ និងការងារជំនួញ។ ជាពិសេសការសម្រេចចិត្តនេះក៏ជាការផ្គាប់ចិត្តស្វាមី ដែលតម្រូវឲ្យនាងខ្ញុំឃ្លាតឲ្យឆ្ងាយពីសិល្បៈនេះផងដែរ ។
ឈិត សុជាតា អះអាងថា កូនភ្លោះរបស់នាងដែលទើបតែចាប់កំណើតឃើញពន្លឺព្រះអាទិត្យនេះ គឺជាតំណក់ឈាមរបស់ស្វាមីនាង មិនមែនជាការចាក់មេជីវិតដូចដែលព័ត៌មានមួយចំនួនផ្សព្វផ្សាយ ដោយសារនាងធ្លាប់ត្រូវ គេសង្ស័យថា ភ្ជាប់ចំណងស្នេហ៍ភេទដូចគ្នានោះទេ ។
បើទោះបីជា ឈិត សុជាតា បង្ហាញមុខកូនជាសាធារណៈនាពេលនេះក៏ដោយ ប៉ុន្តែស្វាមីរបស់នាងជានរណានោះមិនត្រូវបាននាងទម្លាយឲ្យដឹងទេ ។
ឈិត សុជាតា អះអាងប្រាប់សារព័ត៌មាននៅក្នុងស្រុកមួយថា នាងសម្រេចរួមរស់ជាមួយស្វាមីអស់រយៈពេលជាង៥ឆ្នាំមកហើយ មុនពេលដែលនាងសម្រាលកូនភ្លោះនេះ ។ ស្វាមីរបស់នាងមានវ័យជាង៤០ឆ្នាំ ជាមន្ត្រីរាជការ និងជាអ្នកជំនួញ ៕
ចែករំលែកព័តមាននេះ