ខេត្តព្រះសីហនុ ៖ រដ្ឋបាលខេត្តព្រះសីហនុ បានដាក់ចេញនូវវិធានការណ៍សំខាន់មួយក្នុងចំណោមវិធានការសំខាន់ជាច្រើន ដោយតម្រូវឱ្យម្ចាស់អាជីវកម្មកាស៊ីណូ សណ្ឋាគារ ភោជនីយដ្ឋាន អគារស្នាក់នៅរួម និងម្ចាស់អាជីវកម្មនានា អនុវត្តនូវលក្ខខណ្ឌចំនួន៧ចំណុចជាដាច់ខាត បើមិនដូច្នេះទេ នឹងប្រឈមមុខនឹងការបិទអាជីវកម្មជាស្ថាពរតែម្តង។
ឯកឧត្តម គួច ចំរើន អភិបាលខេត្តព្រះសីហនុ បានបញ្ជាក់នៅក្នុងសេចក្តីសេចក្តីជូនដំណឹងរបស់រដ្ឋបាលខេត្តព្រះសីហនុ ស្តីពីលក្ខខណ្ឌតម្រូវ និងការណែនាំលើការងារគ្រប់គ្រងអាជីវកម្មកាស៊ីណូ សណ្ឋាគារ ភោជនីយដ្ឋាន អគារស្នាក់នៅរួម និងម្ចាស់អាជីវកម្មមួយចំនួនក្នុងទឹកដីខេត្តព្រះសីហនុ ចុះថ្ងៃទី០៨ ខែតុលា ឆ្នាំ២០២២នេះ បានឱ្យដឹងថា ដើម្បីរក្សាសន្តិសុខ សណ្តាប់ធ្នាប់សាធារណៈ និងការគ្រប់គ្រងទីតាំងអាជីវកម្មកាស៊ីណូ សណ្ឋាគារ ភោជនីយដ្ឋាន អគារស្នាក់នៅរួម និងម្ចាស់អាជីវកម្មនានាឲ្យបានល្អប្រសើរ និងស្របទៅតាមច្បាប់ ឬលិខិតបទដ្ឋានគតិយុត្តនានា រដ្ឋបាលខេត្តព្រះសីហនុ សូមធ្វើការណែនាំដល់ម្ចាស់អាជីវកម្ម កាស៊ីណូ សណ្ឋាគារ ភោជនីយដ្ឋាន អគារស្នាក់នៅរួម និងម្ចាស់អាជីវកម្មនានា ក្នុងភូមិសាស្ត្រខេត្តព្រះសីហនុ ត្រូវអនុវត្តតាមលក្ខខណ្ឌចំនួន៧ចំណុច ដូចខាងក្រោម ៖
ទី១- ម្ចាស់កាស៊ីណូ ត្រូវស្នើសុំលិខិតអនុញ្ញាតបើកទីតាំងអាជីវកម្មរបស់ខ្លួនពីរដ្ឋបាលខេត្តព្រះសីហនុ មុនសុំអាជ្ញាប័ណ្ណពីក្រសួងសេដ្ឋកិច្ច និងហិរញ្ញវត្ថុ។
ទី២- ម្ចាស់អាជីវកម្ម ត្រូវដាក់តាំងស្លាកឈ្មោះបង្ហាញអំពីអាជីវកម្មរបស់ខ្លួន ដែលមានអក្សរខ្មែរធំ ជាងអក្សរបរទេស (ពាក់កណ្ដាលអក្សរខ្មែរ) ហើយអក្សរខ្មែរត្រូវស្ថិតនៅជួរលើគេបំផុតឲ្យបានត្រឹមត្រូវស្របតាមខ្លឹមសារនៃអាជ្ញាប័ណ្ណ និងដាក់បង្ហាញគ្រប់អាជ្ញាប័ណ្ណនៅកន្លែងទទួលភ្ញៀវ។
ទី៣- ម្ចាស់អាជីវកម្ម កាស៊ីណូ សណ្ឋាគារ ភោជនីយដ្ឋាន អគារស្នាក់នៅរួម ឬបុគ្គលណាមួយ មិនត្រូវយកលិខិតឆ្លងដែន ឬប័ណ្ណការងារ ឬឯកសារបញ្ជាក់អត្តសញ្ញាណបុគ្គលិករបស់ខ្លួនមករក្សាទុកជាដាច់ខាត។ ក្នុងករណីដែលអាជ្ញាធរមានសមត្ថកិច្ចរកឃើញថា លិខិតឆ្លងដែន ឬប័ណ្ណការងារ ឬឯកសារបញ្ជាក់អត្តសញ្ញាណរបស់បុគ្គលិក ត្រូវបានរក្សាទុក នៅម្ចាស់អាជីវកម្ម ឬបុគ្គលណាមួយនោះ នឹងត្រូវទទួលខុសត្រូវចំពោះមុខច្បាប់ជាធរមាន។
ទី៤- ទីតាំងអាជីវកម្មត្រូវបើកចំហដោយមិនត្រូវបិទបាំង ឬហ៊ុមព័ទ្ធសំណាញ់ ឬរបងបន្លាលួស និងមិនត្រូវបិទសិទ្ធិសេរីភាពរបស់កម្មករ និយោជិត ក្នុងការចេញចូល។
ទី៥- ម្ចាស់អាជីវកម្មត្រូវរៀបចំបញ្ជីឈ្មោះកម្មករនិយោជិត និងបញ្ជីបើកប្រាក់ខែឲ្យបានច្បាស់លាស់ ត្រឹមត្រូវតាមកិច្ចសន្យាការងារ។
ទី៦- ក្នុងករណីជួលទីតាំងប្រកបអាជីវកម្ម ម្ចាស់អាជីវកម្ម (សហគ្រិន) ត្រូវប្រកាសបញ្ជាក់នូវបញ្ជីរាយនាមអ្នកជួល (ការិយភារី) ដែលខ្លួនបានចុះកិច្ចសន្យាជាមួយ។ បញ្ជីនេះ ដែលមានបញ្ជាក់នាម អាសយដ្ឋាន និងឋានៈអ្នកជួល (ការិយភារី) ព្រមទាំងស្ថានភាព នៃទីកន្លែងធ្វើការនីមួយៗ ក្នុងរយៈពេល៧ (ប្រាំពីរ) ថ្ងៃពេញ ក្រោយពីថ្ងៃធ្វើកិច្ចសន្យាជួល។ កិច្ចសន្យាជួលនេះ ត្រូវមានការបញ្ជាក់ពីអាជ្ញាធរមូលដ្ឋាន (ខេត្ត ឬក្រុង ឬស្រុក ឬឃុំ ឬសង្កាត់) ឬមេធាវីដែលបានចុះបញ្ជីក្នុងគណៈមេធាវី រួចផ្ញើមករដ្ឋបាលខេត្តព្រះសីហនុ ចំនួន១ (មួយ) ច្បាប់ តាមរយៈតេឡេក្រាមលេខ ៖ ០១១ ៥៤៦ ៦៧៧។
ទី៧- ត្រូវប្រកបអាជីវកម្មដោយគោរពទៅតាមច្បាប់ស្តីពីការងារ និងលិខិតបទដ្ឋានគតិយុត្តនានាក្នុងប្រទេសកម្ពុជាឲ្យបានខ្ជាប់ខ្ជួន។
ឯកឧត្តម គួច ចំរើន បានបញ្ជាក់ថា «ការដាក់ចេញនូវលក្ខខណ្ឌ ៧ ចំណុច តម្រូវឱ្យម្ចាស់នេះធ្វើឡើងដោយសារ «ក្នុងរយៈពេលកន្លងមក រដ្ឋបាលខេត្តព្រះសីហនុ បានសង្កេតឃើញមានទីតាំងអាជីវកម្មកាស៊ីណូ សណ្ឋាគារ ភោជនីយដ្ឋាន អគារស្នាក់នៅរួម និងអាជីវកម្មមួយចំនួន ក្រោយពីបានទទួលសិទ្ធិប្រកបអាជីវកម្មពីរាជរដ្ឋាភិបាល ឬពីក្រសួងស្ថាប័នមានសមត្ថកិច្ចរួចហើយមិនបានជូនដំណឹងអំពីការបើកដំណើរការអាជីវកម្មរបស់ខ្លួនមករដ្ឋបាលខេត្ត ឬសមត្ថកិច្ចពាក់ព័ន្ធ និងមិនបានលើកស្លាកសម្គាល់ឈ្មោះទីតាំងប្រកបអាជីវកម្មរបស់ខ្លួននៅឡើយ!។
អភិបាលខេត្តព្រះសីហនុ បានបន្តថា «ហើយមានទីតាំងខ្លះទៀត បានហ៊ុមព័ទ្ធរបងបិទបាំង ដែលធ្វើឲ្យអាជ្ញាធរមានសមត្ថកិច្ចពិបាកក្នុងការត្រួតពិនិត្យទីតាំងនីមួយៗ និងម្យ៉ាងទៀតបង្កលក្ខណៈដល់ជនឆ្លៀតឱកាសប្រព្រឹត្តបទល្មើសផ្សេងៗដូចជា ៖ ការបង្ខាំងមនុស្សដើម្បីកេងប្រវ័ញ្ចកម្លាំងពលកម្ម, ការជួញដូរមនុស្ស, ការធ្វើអាជីវកម្មផ្លូវភេទ និងការប្រព្រឹត្តអំពើល្មើសច្បាប់នៃព្រះរាជាណាចក្រកម្ពុជា»។
ឯកឧត្តម គួច ចំរើន បានបញ្ជាក់ក្នុងសេចក្តីជូនដំណឹងបន្តថា រដ្ឋបាលខេត្តព្រះសីហនុ សង្ឃឹមជឿជាក់មុតមាំថា ម្ចាស់អាជីវកម្មទាំងអស់ នឹងចូលរួមសហការអនុវត្តនូវខ្លឹមសារនៃសេចក្តីណែនាំនេះ «ដើម្បីចូលរួមទប់ស្កាត់ការកេងប្រវ័ញ្ចកម្លាំងពលកម្ម ការជួញដូរមនុស្ស និងអាជីវកម្មផ្លូវវភេទ ព្រមទាំងការប្រព្រឹត្តអំពើល្មើសច្បាប់នៃព្រះរាជាណាចក្រកម្ពុជា»។
ឯកឧត្តម គួច ចំរើន បានព្រមានខ្លាំងក្នុងសេចក្តីជូនដំណឹងថា ក្នុងករណីម្ចាស់អាជីវកម្មទាំងអស់ «មិនអនុវត្តតាមខ្លឹមសារខាងលើ រដ្ឋបាលខេត្តព្រះសីហនុនឹងគោរពស្នើសុំជាគោលការណ៍ពីរាជរដ្ឋាភិបាលកម្ពុជា ឬពីក្រសួងស្ថាប័នមានសមត្ថកិច្ច ដើម្បីបិទអាជីវកម្មជាស្ថាពរ!៕
ចែករំលែកព័តមាននេះ