យើងដឹងហើយថា ធ្មេញគឺជាផ្នែកសំខាន់មួយនៃរាងកាយរបស់យើង ។ មុខងារសំខាន់របស់ធ្មេញគឺដើម្បីជួយកិនម្ហូបអាហារឲ្យល្អិតជាដើម។ ដូច្នេះវាជាការសំខាន់ណាស់ដើម្បីថែរក្សាសុខភាពធ្មេញ និងទប់ស្កាត់ការកើតដង្កូវស៊ីធ្មេញ និងជំងឺផ្សេងទៀត ។
ខាងក្រោមនេះជាគន្លឹះមួយចំនួនដែលអ្នកគួរធ្វើតាមដើម្បីថែរក្សាសុខភាពមាត់ធ្មេញនៅពេលអ្នកមានអាយុកាន់តែចាស់ទៅ ។
គន្លឹះទី១-បរិភោគអាហារមានជាតិជូរ និងជាតិស្ករក្នុងដែនកំណត់ នៅពេលដែលអ្នកកាន់តែមានវ័យចាស់ សមាសភាគនៃអាហារទាំងនោះអាចធ្វើឱ្យខូចធ្មេញរបស់អ្នកបានយ៉ាងឆាប់រហ័ស ។
គន្លឹះទី២-សូមរក្សាសំណើមក្នុងមាត់របស់អ្នកតាមដែលអាចធ្វើទៅបានដោយទទួលទានទឹកឲ្យបានគ្រប់គ្រាន់ ការស្ងួតមាត់អាចបង្កឱ្យមានបញ្ហាប្រហោងធ្មេញ ហើយបញ្ហានេះអាចបណ្តាលឲ្យកើតជំងឺទាក់ទងនឹងអាយុមួយចំនួនថែមទៀត ។
គន្លឹះទី៣-វាជាការសំខាន់ក្នុងការប្រើប្រាស់ច្រាស់ដុសធ្មេញឲ្យបានត្រឹមត្រូវដើម្បីសំអាតធ្មេញរបស់អ្នក ដោយសារធ្មេញរបស់អ្នកមិនខ្លាំងដូចពីមុននោះទេនៅពេលអ្នកមានវ័យកាន់តែចាស់ ហើយច្រាសដុសធ្មេញដែលរឹងពេកអាចបំផ្លាញធ្មេញរបស់អ្នកបាន។
គន្លឹះទី៤-កាលណាអ្នកមានវ័យកាន់តែចាស់ សូមប្រាកដថា អ្នកបានខ្ពុរមាត់របស់អ្នកជាមួយនឹងទឹកខ្ពុរមាត់ដែលមានជាតិហ្លអ៊័រជាប្រចាំថ្ងៃ ដោយសារការពុកធ្មេញនឹងកាន់តែងាយកើតឡើងនៅពេលយើងមានវ័យកាន់តែចាស់ ។
គន្លឹះទី៥-ដោយសារធ្មេញរបស់យើងគឺជាឆ្អឹង ពួកវាក៏រងផលប៉ះពាល់អវិជ្ជមានដោយសារអាយុ ដូចជាសន្លាក់របស់យើងដែរ ដូច្នេះចូរទទួលទានអាហារសម្បូរជាតិកាល់ស្យូម និងវីតាមីនD ដើម្បីចិញ្ចឹមធ្មេញរបស់អ្នក ៕
ចែករំលែកព័តមាននេះ