រាជធានីភ្នំពេញ ៖ តារាសម្តែងនាង សារ៉ាយ សក្ខិណា បាននិងកំពុងដុះខាត់កូនស្រីច្បងរបស់នាង ដើម្បីដើរលើផ្លូវសិល្បៈដូចរូបនាង ក្នុងពេលដែលកូនស្រីកំពុងចម្រើនវ័យធំធាត់ និងមានដុងសិល្បៈជាបណ្តើរៗរួចហើយ។
តារាស្រីរូបនេះ បង្ហាញអារម្មណ៍ហាក់មិនមានការស្ទើរស្ទាក់នៅក្នុងការបើកផ្លូវអោយកូនស្រីចូលប្រឡូកសិល្បៈនោះឡើយ ខណៈពេលដែលនាងបានមើលឃើញពីភាពរីកចម្រើនលើវិស័យសិល្បៈនាពេលបច្ចុប្បន្ននេះ។
ក្នុងបទសម្ភាសន៍នៅក្នុងកម្មវិធីរបស់ស្ថានីយទូរទស្សន៍នៅក្នុងស្រុកមួយ តារាសម្តែងអ្នកនាង សារ៉ាយ សក្ខិណា បានលើកឡើងថា នាងពិតជាមានបំណងចង់អោយកូនចូលប្រឡូកក្នុងសិល្បៈដូចខ្លួនណាស់ ដោយសារកូនស្រីរបស់នាងហាក់មានដុងសិល្បៈនេះជាបណ្តើរហើយ។
នាងបញ្ជាក់ថា បើនិយាយពិសិល្បៈកូនស្រីរបស់នាង គឺចូលចិត្តច្រើងជាងគេ ដោយសារការច្រៀងនេះ គឺកូនរបស់នាងឆាប់ចាប់បាន ប៉ុន្តែសម្លេងនៅមិនទាន់បានល្អនៅឡើយទេ។ នាងបន្ថែមថា ពេលទំនេរនៅផ្ទះកូនស្រីរបស់នាងតែងតែថតរូបកាច់រាងស្ទាយប្លែកៗជាបន្តបន្ទាប់ ចំណែកការសម្តែងវិញ គឺបានត្រឹម៧០ទៅ៨០ភាគរយប៉ុណ្ណោះ។
យ៉ាងណា បើតាម សារ៉ាយ សក្ខិណាថា ប្រសិនបើទៅថ្ងៃខាងមុខ កូនស្រីរបស់នាងពិតជាមានដុងសិល្បៈនេះពិតមែននោះ នាងក៏នឹងជម្រុញកូនបន្ថែមផងដែរ ព្រោះនាងក៏ចង់ឃើញកូនដើរលើវិថីនេះដូចជារូបនាងផងដែរ។ នាងបន្ថែមថា បើសិនជាអាចនាងចង់អោយកូនពេលធំឡើងចូលប្រឡងនៅក្នុងកម្មវិធីបវរកញ្ញាណាមួយ ព្រោះបច្ចុប្បន្ននាងឃើញមានការបង្កើតកម្មវិធីច្រើនសម្រាប់អោយយុវវ័យបញ្ចេញសមត្ថភាព។
នាងបញ្ជាក់ថា ដោយសារហេតុនេះ នាងបានដាក់គោលដៅអោយកូនស្រីចូលហាត់រៀនដើរម៉ូត ដើម្បីដុះខាត់កូនអោយឆ្ពោះទៅកាន់វិថីសិល្បៈនាពេលអនាគត។
ជាការកត់សម្គាល់ តារាសម្តែងនាង សារ៉ាយ សក្ខិណា បានរៀបការជាមួយស្វាមីដែលជាអាណិកជនខ្មែររស់នៅអាមេរិក ខណៈពេលបច្ចុប្បន្ននាងទទួលបានចំណងដៃកូន២នាក់ហើយ ក្នុងនោះកូនស្រីបងមានវ័យប្រមាណជា៨ឆ្នាំហើយ។ សារ៉ាយ សក្ខិណា កំពុងមានវ័យមាននៅក្នុងស្រុកខ្មែរនៅឡើយ ដោយមិនទាន់ត្រឡប់ទៅរស់នៅអាមេរិកវិញនៅឡើយទេ ហើយអំឡុងពេលនៅក្នុងស្រុកនាពេលនេះ នាងក៏បានឆ្លៀតពេលចូលថតភាពយន្ត និងបទចម្រៀងថ្មីៗជាបន្តបន្ទាប់ផងដែរ៕
ចែករំលែកព័តមាននេះ