រាជធានីភ្នំពេញ ៖ ខ្សែភាពយន្ដមានចំណងជើងថា «ស្ពាននិស្ស័យ» ជាស្នាដៃដឹកនាំរឿងដោយកូនខ្មែរ បានលាតត្រដាងពីចំណងមិត្តភាពដ៏ជិតស្និទ្ធរវាងព្រះរាជាណាចក្រពីរដែលមានទំនាក់ទំនងគ្នារាប់សិបឆ្នាំមកហើយ។ ខ្សែភាពយន្ដនេះ
រាជធានីភ្នំពេញ ៖ ខ្សែភាពយន្ដមានចំណងជើងថា «ស្ពាននិស្ស័យ» ជាស្នាដៃដឹកនាំរឿងដោយកូនខ្មែរ បានលាតត្រដាងពីចំណងមិត្តភាពដ៏ជិតស្និទ្ធរវាងព្រះរាជាណាចក្រពីរដែលមានទំនាក់ទំនងគ្នារាប់សិបឆ្នាំមកហើយ។ ខ្សែភាពយន្ដនេះត្រូវបានលើកមកធ្វើបទបង្ហាញកាលពីថ្ងៃទី៤ មីនា នៅសារមន្ទីរជាតិកម្ពុជា ក្នុងពិធីបើកពិព័រណ៍ «ស្ថាបត្យកម្មខ្មែរសម័យថ្មី និងប្រទេសជប៉ុន» ហើយនឹងចាក់បញ្ចាំងនៅសាលសន្និសីទចតុមុខនារាត្រីថ្ងៃទី៨ មីនា នេះ ។
ក្រោមគម្រោងឧបត្ថម្ភគាំទ្រដោយមជ្ឈមណ្ឌលអាស៊ីនៃមូលនិធិជប៉ុន ខ្សែភាពយន្ដនេះត្រូវបានផលិតឡើងដើម្បីឲ្យអ្នកជំនាន់ក្រោយបានឈ្វេងយល់ពីទំនាក់ទំនង ទាំងប្រពៃណី វប្បធម៌ និងរបៀបរស់នៅរបស់ប្រជាជននៅក្នុងអាស៊ី ពិសេសប្រជាជនកម្ពុជា និងជប៉ុន ។
អ្នកស្រី សុទ្ធោ គុល្លិការ ដែលជាអ្នកដឹកនាំរឿងនេះបានរៀបរាប់នៅមុខនិស្សិតជាច្រើននាក់ថា ផលិតខ្សែភាពយន្ដមួយនេះឡើងដើម្បីបង្ហាញពីចំណងមិត្តភាពរវាងកម្ពុជានិងជប៉ុន ក៏ដូចជាបង្ហាញនូវវប្បធម៌មួយដែលកូនខ្មែរជំនាន់ក្រោយមិនបានដឹង សូម្បីតែអ្នកស្រីខ្លួនឯងក៏មិនសូវបានដឹងដែរ ។ អ្នកស្រីថ្លែងថា ៖ «ក្នុងរឿងហ្នឹងយើងនិយាយពីទំនាក់ទំនងខ្មែរ និងជប៉ុន ដោយក្នុងសាច់រឿងនេះ ខ្ញុំផ្អែកទៅលើការចងចាំនៃស្ថាបត្យកម្ម និងប្រជាជន ក៏ដូចជាប្រជាជន និងស្ថាបត្យកម្ម» ។
ក្នុងបទសម្ភាសន៍ដាច់ដោយឡែកមួយអ្នកស្រី សុទ្ធោ គុល្លិការ បានរៀបរាប់ពីគោលបំណងនៃការផលិតរឿងនេះ គឺចង់និយាយពីមិត្តភាពយូរអង្វែងរវាងប្រទេសទាំងពីរកម្ពុជា-ជប៉ុន ដែលកូនខ្មែរជំនាន់ក្រោយភាគច្រើនពុំសូវបានដឹង ។ អ្នកស្រីថ្លែងថា ៖ «នៅពេលដែលខ្ញុំរកសាច់រឿងមួយដែលនិយាយពីទំនាក់ទំនងខ្មែរ និងជប៉ុន ធ្វើឲ្យខ្ញុំនឹកឃើញស្ពានជ្រោយចង្វាភ្លាម ព្រោះស្ពាននេះសាងសង់ដោយជប៉ុន ។ ពេលនោះខ្ញុំចាប់ផ្ដើមស្រាវជ្រាវឃើញថា ស្ពានហ្នឹងគឺជប៉ុនបានចាប់ផ្ដើមសាងសង់នៅអំឡុងឆ្នាំ១៩៦០ ហើយត្រូវបានផ្ដាច់នៅក្នុងអំឡុងឆ្នាំ១៩៧០ គ្រាដែលប្រទេសយើងមានសង្គ្រាម និងបានតភ្ជាប់ធ្វើឡើងវិញនៅឆ្នាំ១៩៩០ ។ ចំណែកខ្ញុំចង់រកសាច់រឿងមួយដែលមានដំណើរជាប់ពាក់ព័ន្ធនឹងជប៉ុនពីទសវត្សរ៍៦០និង៧០ រហូតដល់បច្ចុប្បន្ន ។ ដូច្នេះខ្ញុំក៏យកស្ពាននេះ មកធ្វើជាគោលនៃសាច់រឿងដែលបង្ហាញពីវប្បធម៌របស់ជប៉ុន និងជនជាតិជប៉ុនមករស់នៅស្រុកខ្មែរក្នុងអំឡុងពេលនោះ ។ អីុចឹងទៅ រឿង«ស្ពាននិស្ស័យ»នេះ គឺរៀបរាប់ពីស្នេហារវាងនារីខ្មែរ ជាមួយបុរសជប៉ុនដែលបានបែកបាក់គ្នាក្នុងសម័យសង្គ្រាម ជាពិសេសចង់បង្ហាញពីការរស់នៅរវាងវប្បធម៌ខ្មែរ និងជប៉ុន ។
តាមរយៈការសម្ដែងរបស់តួអង្គទាំងពីរក្នុងសាច់រឿងនេះ ប្រជាជននៃប្រទេសទាំងពីរកម្ពុជា-ជប៉ុន អាចឈ្វេងយល់ពីគ្នាទៅវិញទៅមកពីរបៀបរបបនៃរស់នៅ វប្បធម៌ប្រពៃណីរវាងប្រទេសទាំងពីរ ។
តួឯកប្រុសជនជាតិជប៉ុនក្នុងរឿង «ស្ពាននិស្ស័យ» នេះឈ្មោះ MASAYA KATO និងតួឯកស្រីឈ្មោះ ជុំវណ្ណ សូដាជីវី ជាអ្នករបាំខ្មែរល្បីឈ្មោះមួយរូប ៕
ចែករំលែកព័តមាននេះ