យ៉ែម សំអូន បដិសេធរឿងបបួលតារាប្រុសឡើងសណ្ឋាគារ
រាជធានីភ្នំពេញ ៖ លោកយ៉ែម សំអូន ប្រតិកម្មចំពោះតារាប្រុសម្នាក់ ដែលទម្លាយសារឆ្លើយឆ្លងរបស់លោកបបួលរូបគេឡើងសណ្ឋាគារ ហើយរឿងនេះបានផ្សព្វផ្សាយតាមសារព័ត៌មាន ។
រាជធានីភ្នំពេញ ៖ លោកយ៉ែម សំអូន ប្រតិកម្មចំពោះតារាប្រុសម្នាក់ ដែលទម្លាយសារឆ្លើយឆ្លងរបស់លោកបបួលរូបគេឡើងសណ្ឋាគារ ហើយរឿងនេះបានផ្សព្វផ្សាយតាមសារព័ត៌មាន ។
លោកយ៉ែម សំអូន ចាត់ទុកការទម្លាយសារមិនទំនងរបស់តារាថ្មីរូបនោះ គឺជាចេតនាចង់បង្ខូចកេរ្តិ៍ឈ្មោះរបស់លោក ហើយធ្វើឲ្យខ្លួនឯងល្បី ។
ការចេញមុខបកស្រាយរបស់លោកយ៉ែម សំអូន នេះធ្វើឡើងបន្ទាប់ពីតារាសម្តែងថ្មីឈ្មោះណារ៉ា បានទម្លាយសារយ៉ែម សំអូន បានបបួលរូបគេទៅដេកសណ្ឋាគារជាមួយគ្នា ។
ព័ត៌មានមួយនេះបានចុះផ្សាយតាមសារព័ត៌មានអេឡិចត្រូនិកនៅក្នុងស្រុកមួយ និងត្រូវគេចែកចាយតាមហ្វេសប៊ុក ។
បន្ទាប់ពីទទួលដំណឹងនេះមកលោកយ៉ែម សំអូន បកស្រាយ ភ្លាមៗ ដើម្បីលាងខ្លួន ។ លោកយ៉ែម សំអូន អះអាងថា «ព័ត៌មាននេះបានធ្វើឲ្យខ្ញុំរសើបយ៉ាងខ្លាំង ក្នុងពេលដែលរឿងរ៉ាវចុះផ្សាយពីខ្ញុំកន្លងមកនោះ រូបខ្ញុំហាក់មិនសូវខ្វាយខ្វល់ទេ ។ ខ្ញុំចូលចិត្តធ្វើច្រើនជាងនិយាយ ហើយខ្ញុំចង់ប្រាប់ទៅណារ៉ា ថាណារ៉ា គឺជាតារាមួយរូបដែលចាប់ផ្តើមល្បីល្បាញហើយ ។
ប្អូនឯងមិនអាចទៅលេងជាមួយអ្នកសារព័ត៌មានបែបនេះដើម្បីបានភាពល្បីល្បាញ និងភាពស្អាតស្អំរបស់ប្អូនឡើយ ហើយមិនបាច់ទៅប្រាប់សារព័ត៌មានថា ខ្លួនឯងខ្ពើមចំពោះការស្រឡាញ់ភេទដូចគ្នានោះទេ ប្អូនប្រាប់តែខ្លួនឯងទៅបានហើយ ប្អូនឯងធ្វើអុីចឹងវាប៉ះពាល់ដល់កិត្តិយសរបស់ខ្ញុំ ។
ព័ត៌មានរសើបរបស់ខ្ញុំបានចេញរួចហើយៗខ្ញុំក៏មិនបាច់ទៅប្រាប់អ្នកណាគេថា ខ្លួនឯងស្អាតស្អំឡើយ ព្រោះខ្ញុំស្គាល់ខ្លួនឯងច្បាស់ ហើយខ្ញុំក៏មានសេចក្តីថ្លៃថ្នូរគ្រប់គ្រាន់ដែរ» ។
លោកយ៉ែម សំអូន បានដាក់បន្ទុកទៅលើអ្នកសារព័ត៌មានដែលសរសេររឿងនេះថានាំឲ្យប៉ះពាល់កិត្តិយសរបស់លោក ក្នុងពេលដែលលោកកំពុងតែជោគជ័យនៅក្នុងអាជីពសិល្បៈនាពេលបច្ចុប្បន្ន ។
ក្រោយពីមានការបកស្រាយឆ្លើយតបពីលោកយ៉ែម សំអូន រួចមក តារាសម្តែងថ្មី លោកណារ៉ា បានបង្ហោះសារសូមទោសលោកយ៉ែម សំអូន វិញ ដោយថាលោកទើបតែដឹងថាហ្វេសប៊ុកឆាតមកលោកនោះ គឺជាគណនេយ្យក្លែងក្លាយ ។
លោកណារ៉ា អះអាងថា លោកមិនមានចេតនាបង្ខូចកេរ្តិ៍លោកយ៉ែម សំអូន ទេ ហើយអ្វីៗដែលកើតឡើងនោះគឺជាការភាន់ច្រឡំ ។
ជាការឆ្លើយតបលោកយ៉ែម សំអូន បញ្ជាក់ថា «បងអរគុណដែលស្គាល់បងច្បាស់ក្រោយពេលឮបងឡាយវីដេអូ តែបងគិតថាបើប្អូន ស្គាល់បងមុនហ្នឹងបន្តិច ប្រហែលជាប្អូនមិនពិបាកហត់អុីចឹងទេ ។
ត្រូវរៀនស្គាល់ខ្លួនឯងឱ្យច្បាស់ជាងបង្ខំអ្នកដទៃឲ្យស្គាល់យើង និងជឿសម្តីយើង តែបងគិតថាឥឡូវគេកាន់តែស្គាល់បង និងប្អូនច្បាស់ថាជាអ្នកណា ។ បងសង្ឃឹមថាមិនមានលើកក្រោយទៀតទេណាប្អូន» ៕
ចែករំលែកព័តមាននេះ