រាជធានីភ្នំពេញ ៖ កាលពីល្ងាចថ្ងៃទី១ មីនា ឆ្នាំ២០១៧ តារាសម្តែង និងតារាចម្រៀងជាច្រើនដួងបានចូលរួមក្នុងកម្មវិធីជំនួបគ្រួសារតារាកម្ពុជាអបអរសាទរអ្នកនាងអេនចេលីណា ជោលី ដែលបានផលិតភាពយន្តរឿង
រាជធានីភ្នំពេញ ៖ កាលពីល្ងាចថ្ងៃទី១ មីនា ឆ្នាំ២០១៧ តារាសម្តែង និងតារាចម្រៀងជាច្រើនដួងបានចូលរួមក្នុងកម្មវិធីជំនួបគ្រួសារតារាកម្ពុជាអបអរសាទរអ្នកនាងអេនចេលីណា ជោលី ដែលបានផលិតភាពយន្តរឿង «មុនដំបូងខ្មែរក្រហមសម្លាប់ប៉ារបស់ខ្ញុំ» ។ ក្រុមគ្រួសារតារាកម្ពុជាចាត់ទុកការផលិតភាពយន្តនេះជាការលើកកម្ពស់ដល់វិស័យសិល្បៈទី៧របស់កម្ពុជា ។
កម្មវិធីជួបជុំនោះនៅភោជនីយដ្ឋានវីហ្វ្រេនបឹងត្របែករាជធានីភ្នំពេញក្រោមវត្តមានលោកថៃ នរៈសត្យា រដ្ឋលេខាធិការក្រសួងវប្បធម៌ និងវិចិត្រសិល្បៈ ។
លោកថៃ នរៈសត្យា ថ្លែងថា «សិល្បករត្រូវតែចេះរួមគ្នា ធ្វើអ្វីត្រូវចេះការពារសេចក្តីថ្លៃថ្នូរ និងគោរពមហាជន ធ្វើអ្វីត្រូវឲ្យមានការយល់ដឹង ព្រោះសិល្បករ គឺមានគេស្គាល់ច្រើនជាងអ្នកណាទាំងអស់ មិនថារដ្ឋមន្ត្រី ឬប្រធានាធិបតីនោះទេ បើទៅប្រទេសណាមានតារាល្បីទៅនោះ អ្នកគាំទ្រគេទៅច្រើនជាងអ្នកនយោបាយ» ។
លោកថៃ នរៈសត្យា សរសើរក្រុមគ្រួសារតារាកម្ពុជាដែលបង្កើតក្រុមជួយការងារក្នុងសង្គម ហើយត្រូវបន្តការងារនេះទៀត។ លោកថៃ នរៈសត្យា ក៏បានថ្លែងអំណរគុណអ្នកនាងអេនចេលីណា ជោលី ដែរដែលខិតខំផលិតភាពយន្តបែបប្រវត្តិសាស្ត្រជួយឲ្យពិភពលោកស្គាល់ប្រទេសខ្មែរថែមទៀត ។
លោកផាត់ តារារដ្ឋ ស្ថាបនិកគ្រួសារតារាកម្ពុជាថ្លែងអំណរគុណអ្នកនាងអេនចេលីណា ជោលី ដែលសហការថតខ្សែភាពយន្តនិយាយពីរបបខ្មែរក្រហម ។
លោកផាត់ តារារដ្ឋ ផ្តាំផ្ញើឲ្យសិល្បករពង្រឹងសមត្ថភាពសម្តែង និងត្រូវបង្កើនចំណេះដឹងដូចជាភាសា ផ្សេងៗនិងការហាត់រៀនវិជ្ជាគុនសម្រាប់សម្តែងដើម្បីលើកស្ទួយវិស័យភាពយន្តខ្មែរ ។
ចំណែកអ្នកនាងខាត់ សុឃីម ចង់ឲ្យតារាខ្មែរស្រឡាញ់គ្នា ជួយគ្នាគ្រប់ស្ថានការណ៍ទាំងអស់ ពិសេសចង់ឲ្យតារាខ្មែរចេះជំនាញឲ្យបានច្រើនដូចជាក្បាច់គុន និងភាសាបរទេសជាដើម ។
អ្នកនាងខាត់ សុឃីម មានក្តីរំភើបរីករាយដែលតារាភាពយន្តហូលីវូដអេនចេលីណា ជោលី ជួយលើកមុខមាត់កម្ពុជាយើងម្តងហើយម្តងទៀត ពិសេសខ្សែភាពយន្តដែលទើបតែចាក់បញ្ចាំងថ្មីៗនេះ ៕
ចែករំលែកព័តមាននេះ