ខេត្តកំពត៖ គណៈកម្មាធិការគ្រប់គ្រងគ្រោះមហន្តរាយ ខេត្តកំពត បានចេញសេចក្តីជូនដំណឹងថា ក្រុមការងារបច្ចេកទេសរបស់ក្រុមហ៊ុន ស៊ីណូហាយដ្រូ កំចាយ គ្រោងនឹងបើកទ្វាររំដោះទឹក នៅទំនប់វារីអគ្គិសនី កំចាយ…
ខេត្តកំពត៖ គណៈកម្មាធិការគ្រប់គ្រងគ្រោះមហន្តរាយ ខេត្តកំពត បានចេញសេចក្តីជូនដំណឹងថា ក្រុមការងារបច្ចេកទេសរបស់ក្រុមហ៊ុន ស៊ីណូហាយដ្រូ កំចាយ គ្រោងនឹងបើកទ្វាររំដោះទឹក នៅទំនប់វារីអគ្គិសនី កំចាយ តាមលក្ខណៈបច្ចេកទេស។ ស្ថានភាពបែបនេះ នឹងធ្វើឱ្យកម្រិតទឹក ក្នុងព្រែកកំពង់បាយ មានកម្ពស់លើសពីធម្មតា។
សេចក្តីជូនដំណឹង ចេញផ្សាយនៅថ្ងៃទី២៧ ខែកញ្ញា ឆ្នាំ២០២២ នេះ បង្ហាញថា តាមការជូនដំណឹងរបស់ក្រសួងធនធានទឹក និងឧតុនិយម អំពីស្ថានភាពធាតុអាកាស ចាប់ពីថ្ងៃទី២៨ ខែកញ្ញា រហូតដល់ថ្ងៃទី៤ ខែតុលា ឆ្នាំ២០២២ នៅលើផ្ទៃសមុទ្រ អាចនឹងមានភ្លៀងលាយឡំ នឹងខ្យល់កន្ត្រាក់បោកបក់ខ្លាំង និងរលកសមុទ្រខ្ពស់។ តាមស្ថានភាពអាកាសធាតុនេះ ភ្លៀងនៅតែបន្តធ្លាក់ជាបន្តបន្ទាប់ ជាពិសេសតំបន់ទំនប់វារីអគ្គិសនីកំចាយ ទឹកក្នុងអាងទំនប់នារសៀល ថ្ងៃទី២៧ ខែកញ្ញា ឆ្នាំ២០២២ នេះ មានកម្ពស់ ១៤៨.៦៩ម៉ែត្រ។
សូមរម្លឹកថា ក្រុមហ៊ុនចិន ស៊ីណូហាយដ្រូ (Sinohydro) បានសាងសង់វារីអគ្គិសនីកំចាយ ស្ថិតក្នុងស្រុកទឹកឈូ ខេត្តកំពត កាលពីថ្ងៃ២០ មីនា ឆ្នាំ២០០៧។ វារីអគ្គិសនីនេះ បានបើកឲ្យដំណើរការ កាលពីថ្ងៃទី៧ ខែធ្នូ ឆ្នាំ២០១១។
ការសាងសង់ទំនប់វារីអគ្គិសនីកំចាយ ក្នុងខេត្តកំពត បានចំណាយប្រាក់សរុបជាង ២៨០លានដុល្លារអាមេរិក ដើម្បីធ្វើអាជីវកម្មរយៈពេល ៤០ឆ្នាំ។
អគ្គិសនីកម្ពុជា បានប្រកាសថា វារីអគ្គិសនីកំចាយនេះ មានស្តុកទឹក រហូតដល់ជាង ៧០០លានម៉ែត្រគីប។ បើសិនជាពន្លាតជាផ្ទៃក្រឡា គិតកម្ពស់ទឹក ១ម៉ែត្រ គឺលិច ៧ម៉ឺនហិចតា ពោលគឺលិចតំបន់មាត់សមុទ្រ ពីបូកគោ ដល់កែប លិចទាំងអស់៕
ចែករំលែកព័តមាននេះ