មិត្តភក្តិបង្ខំប្រើគ្រឿងញៀ.នភ័យរត់រកកន្លែងបន្សាប
រាជធានីភ្នំពេញ ៖ យុវជនម្នាក់បានធ្វើដំណើរមកកាន់ប៉ុស្ដិ៍នគរបាលចោមចៅ ខណ្ឌពោធិ៍សែនជ័យ កាលពីវេលាម៉ោង៩ព្រឹកថ្ងៃទី២១ កុម្ភៈ ដើម្បីសុំឲ្យនគរបាលជួយនាំ
រាជធានីភ្នំពេញ ៖ យុវជនម្នាក់បានធ្វើដំណើរមកកាន់ប៉ុស្ដិ៍នគរបាលចោមចៅ ខណ្ឌពោធិ៍សែនជ័យ កាលពីវេលាម៉ោង៩ព្រឹកថ្ងៃទី២១ កុម្ភៈ ដើម្បីសុំឲ្យនគរបាលជួយនាំរូបគេទៅកាន់មណ្ឌលបន្សាបគ្រឿងញៀន ។ យុវជនរូបនេះបានប្រាប់នគរបាលទាំងទឹកភ្នែកថា ខ្លួនមានមុខរបរជាជាងភ្លើង ខណៈពេលផឹកស៊ីជាមួយមិត្តភក្ដិ ពួកគេក៏នាំចូលទៅកាន់ផ្ទះសំណាក់មួយកន្លែង រួចបានបង្ខំឲ្យខ្លួនប្រើប្រាស់គ្រឿងញៀនពេញមួយយប់ ។
យុវជនរូបនេះបន្ដថា ក្រោយពេលប្រើរួច ហាក់មានអារម្មណ៍ខុសប្លែកពីពេលមុន ដោយយល់ថាខ្លួនឯងកំពុងឈានទៅរកការញៀនថ្នាំ ទើបរូបគេមានការភ័យខ្លាចខូចអនាគត ជាពិសេសខ្លាចឪពុកម្ដាយដឹង ទើបសម្រេចចិត្តរកអន្តរាគមន៍ពីសំណាក់នគរបាល ឲ្យជួយនាំរូបគេទៅដាក់នៅមណ្ឌលបន្សាបគ្រឿងញៀន ។
យុវជនដែលមានភាពក្លាហាន រកការអន្តរាគមន៍ពីនគរបាលនេះ ឈ្មោះ ភន សំប៊ែរ អាយុ២១ឆ្នាំ ជាជាងភ្លើងមានទីលំនៅក្នុងភូមិកោះតាកូវ ឃុំព្រែកក្រឹស ស្រុកកំពង់ត្រាច ខេត្តកំពត និងស្នាក់នៅក្នុងភូមិបឹងបាយ៉ាប សង្កាត់ភ្នំពេញថ្មី ខណ្ឌសែនសុខ ។
យុវជននោះបានប្រាប់ប៉ុស្ដិ៍នគរបាលចោមចៅ ឲ្យដឹងថា នៅវេលាយប់ថ្ងៃទី២០ កុម្ភៈ រូបគេបានទៅផឹកស៊ីជុំគ្នាជាមួយមិត្តភក្ដិ៧នាក់ទៀត នៅជិតផ្ទះជួលដែលខ្លួនស្នាក់នៅនោះដែរ ។ លុះក្រោយពេលផឹកស្រវឹង មិត្តភក្ដិម្នាក់ក្នុងចំណោម៧នាក់ បាននាំខ្លួនដើរលេង បន្ទាប់មកបាននាំចូលទៅក្នុងផ្ទះសំណាក់មួយដែលមិនស្គាល់ឈ្មោះ ហើយមានទីតាំងស្ថិតនៅកន្លែងណានោះទេ ។ ពេលចូលទៅដល់ក្នុងផ្ទះសំណាក់មួយនោះ មិត្តភក្ដិបានបង្ខំឲ្យខ្លួនប្រើប្រាស់គ្រឿងញៀន ខណៈនោះខ្លួនមិនព្រមទេ ប៉ុន្តែត្រូវជននោះសំឡុត ។ ដោយខ្លាចជននោះហៅគ្នាវាយធ្វើបាប ទើបខ្លួនសម្រេចជក់គ្រឿងញៀននៅក្នុងផ្ទះសំណាក់នោះ ដោយប្រើប្រាស់អស់ជាច្រើន ។
ប្រភពដដែលបានបន្តថា បន្ទាប់ពីជក់គ្រឿងញៀននៅទីនោះ អស់រយៈពេលពេញ១យប់រួចមក ខ្លួនមានអារម្មណ៍ថា ដូចជាមានអាការៈប្លែកនៅក្នុងខ្លួនយ៉ាងខ្លាំង ។ ដោយសារតែភ័យខ្លាចញៀន ខូចអនាគត និងត្រូវឪពុកម្ដាយស្ដីបន្ទោសផងនោះ ទើបខ្លួនសម្រេចចិត្តធ្វើដំណើរមកកាន់ប៉ុស្ដិ៍នគរបាលចោមចៅ ដើម្បីសុំការអន្តរាគមន៍ពី
នគរបាល និងសុំឲ្យជួយនាំខ្លួនទៅកាន់មណ្ឌលបន្សាបគ្រឿងញៀនណាមួយ ។ ម្យ៉ាងទៀតចង់គេចចេញពីមិត្តភក្ដិនរកទាំងនោះទៀតផង ហើយខ្លួនមានអារម្មណ៍ថា ខ្លាចពួកគេតាមរកបង្ខំឲ្យខ្លួនប្រើប្រាស់គ្រឿងញៀនបន្តទៀត ។
នគរបាលបានឲ្យដឹងថា យុវជនរូបនេះពិតជាបានស្វែងរកការអន្តរាគមន៍ ឲ្យជួយនាំរូបគេទៅដាក់នៅមណ្ឌលបន្សាបគ្រឿងញៀនពិតប្រាកដមែន ដែលនេះគឺជាភាពក្លាហានមួយក្នុងបំណងកែប្រែខ្លួនឱ្យបានចាកចេញពីគ្រឿងញៀន ដែលពិតជាគួរឲ្យកោតសសើរ និងជាគំរូដែលយុវជនគ្រប់រូបគប្បីអនុវត្ដតាម ។ ខណៈនោះបាននាំទៅកាន់សាលាសង្កាត់ ដើម្បីឲ្យមន្ត្រីសង្កាត់ចោមចៅ ជួយទំនាក់ទំនងជាមួយមន្ទីរសង្គមកិច្ចរាជធានី ដើម្បីចាត់ការបន្តនាំយកទៅកាន់មណ្ឌលបន្សាបគ្រឿងញៀនតាមបំណងដែលគេចង់បាន ។
បន្ទាប់មកមន្ត្រីសាលាសង្កាត់ចោមចៅ ក៏បានទំនាក់ទំនងទៅកាន់មន្ត្រី នៃមន្ទីរសង្គមកិច្ចរាជធានី និងបានឲ្យយុវជនរូបនោះទៅជួបមន្ត្រីទាំងនោះហើយ ៕
ចែករំលែកព័តមាននេះ