ខេត្តឧត្តរមានជ័យ ៖ ផ្លូវក្នុងទីប្រជុំជន មុខផ្សារសំរោង មិនគួរណាបណ្តែតបណ្តោយកើតមានជង្ហុកធំៗ ជាហេតុធ្វើឱ្យក្រុមអាជីវករ ភ្ញៀវជាតិ និងភ្ញៀវជាតិអន្តរជាតិ ដែលធ្វើដំណើរឆ្លងកាត់នាំគ្នារអ៊ូរទាំ រិះគន់ថា មិនគួរក្រុមអាជ្ញាធរមូលដ្ឋាន មន្ទីរសាធារណការ និងដឹកជញ្ជូនខេត្ត ទុកឲ្យកើតមានបែបនេះ។ ហេតុការណ៍នេះ គឺស្ថិតនៅក្នុងភូមិសំរោង សង្កាត់សំរោងក្រុងសំរោង ខេត្តឧត្តរមានជ័យ។
បើតាមក្រុមអាជីវករលក់ដូរក្នុងទីផ្សារសំរោង រួមទាំងប្រជាជនដែលមានទីលំនៅក្នុងក្រុងសំរោង នៅថ្ងៃទី១១ ខែកញ្ញា ឆ្នាំ២០២២នេះ បានឲ្យប្រាប់ឱ្យដឹងថា នៅផ្សារសំរោងនេះ តែងតែមានភ្ញៀវជាតិ និងភ្ញៀវអន្តរជាតិ នាំគ្នាចេញចូលមករកទិញទំនិញក្នុងផ្សារ ហើយពួកគាត់តែងតែនាំគ្នានិយាយរិះគន់ថា ផ្លូវនៅមុខផ្សារពិបាកបើកបររថយន្ត ជិះម៉ូតូ និងដឹកកសិផលទៅរកទីផ្សារ ដោយសារតែមានជង្ហុកធំៗ សូម្បីតែធ្វើដំណើរថ្មើរជើងក៏ពិបាកដែរ ពួកគាត់សុំអំពាវនាវដល់ក្រុមអាជ្ញាធរ និងមន្ទីរសាធារណការ និងដឹកជញ្ជូនខេត្ត មេត្តាជួយធ្វើការជួសជុលឲ្យបានស្អាតឡើងវិញផងទាន កុំទុកបង្អួតភ្ញៀវបែបនេះតទៅទៀតអី។
ទាក់ទិនទៅនឹងការរិះគន់ខាងលើនេះ នៅព្រឹកថ្ងៃទី១១ ខែកញ្ញា ឆ្នាំ២០២២នេះ លោក អ៊ុង សុភ័ក្រ អភិបាលក្រុងសំរោង បានឲ្យដឹងថា ផ្លូវដែលរងការខូចខាតនៅមុខផ្សារសំរោង លោកទទួលស្គាល់ថា រងការខូចខាតពិតប្រាកដមែន ហើយក៏មានផ្លូវជាច្រើនខ្សែទៀត ដែលរងការខូចខាតផងដែរ ហើយលោកក៏បានប្រមូលទិន្ន័យទាំងនេះ ដាក់ចូលទៅអភិបាលខេត្តផងដែរ ដើម្បីពិភាក្សាគម្រោង (ថវិកា) ដែលត្រូវធ្វើការជួសជុលឡើងវិញ ជូនដល់ប្រជាជនងា.យស្រួលធ្វើដំណើ ជាពិសេសនោះឲ្យទីក្រុងសំរោង មានសោភ័ណ្ឌភាពល្អប្រសើរ។
ឯកឧត្តម ប៉ែន កុសល្យ អភិបាលខេត្តឧត្តរមានជ័យ នៅរសៀលថ្ងៃទី១១ ខែកញ្ញា ឆ្នាំ២០២២នេះបានឲ្យដឹងថា ផ្លូវដែលក្រាលកៅស៊ូក្នុងក្រុងសំរោង ទទួលរងការខូចខាត ជាពិសេសផ្លូវនៅមុខផ្សារសំរោង បានចាត់ឲ្យក្រុមការងារថ្នាក់ និងមន្ត្រីជំនាញចុះសិក្សា ហើយធ្វើការជួសជុលជាបណ្តើៗផងដែរ បើស្ថានភាពផ្លូវដែលរងការខូចខាតខ្លាំង អាចនឹងឈួសឆាយ ហើយស្ថាបនាផ្លូវជាថ្មីឡើងវិញ៕
ចែករំលែកព័តមាននេះ