រាជធានីភ្នំពេញ ៖ កាលពីព្រឹកថ្ងៃទី១៣ កុម្ភៈ ឆ្នាំ២០១៧នៅទីស្តីការក្រសួងវប្បធម៌ និងវិចិត្រសិល្បៈបានរៀបចំសន្និសីទសារព័ត៌មានមួយស្តីពីការបង្កើតព្រឹត្តិការណ៍វប្បធម៌ ដើម្បីអបអរសាទរទិវាវប្បធម៌ជាតិ៣មីនា
រាជធានីភ្នំពេញ ៖ កាលពីព្រឹកថ្ងៃទី១៣ កុម្ភៈ ឆ្នាំ២០១៧នៅទីស្តីការក្រសួងវប្បធម៌ និងវិចិត្រសិល្បៈបានរៀបចំសន្និសីទសារព័ត៌មានមួយស្តីពីការបង្កើតព្រឹត្តិការណ៍វប្បធម៌ ដើម្បីអបអរសាទរទិវាវប្បធម៌ជាតិ៣មីនា លើកទី១៩ ឆ្នាំ២០១៧ ។ សន្និសីទក្រោមវត្តមានលោកសំរាំង កំសាន្ត រដ្ឋលេខាធិការក្រសួងវប្បធម៌និងវិចិត្រសិល្បៈ ព្រមទាំងមន្ត្រីក្រោមឱវាទ ។
លោកសំរាំង កំសាន្ត លើកឡើងថា ដោយមានការអនុញ្ញាតពីលោកជំទាវរដ្ឋមន្ត្រីបានរៀបចំព្រឹត្តិការណ៍វប្បធម៌ សំខាន់ៗមានការបើកមហោស្រពយុវជនឆ្នាំទី៣ ក្រោមប្រធានបទ «យុវជនដើម្បីវប្បធម៌ជាតិ» ។ ការប្រកួតប្រជែងគំនូរផ្សាយក្រោមប្រធានបទ «យុវជនដើម្បីវប្បធម៌» ។ ការប្រកួតប្រជែងវីដេអូអប់រំក្រោមប្រធានបទ«យុវជនដើម្បីវប្បធម៌សង្គម» ។ កម្មវិធីនេះមានអនុក្រឹត្យចេញតាំងពីឆ្នាំ២០០៦ រហូតទល់ពេលនេះ១៩លើកមកហើយ ដោយទិវាវប្បធម៌ជាតិ នីមួយៗសុទ្ធតែមានប្រធានបទ ដោយឡែកៗពីគ្នា ។ នៅឆ្នាំនេះដើម្បីអបអរសាទរទិវាវប្បធម៌ជាតិ៣មីនាក្រសួងវប្បធម៌ សហការជាមួយក្រសួងអប់រំរៀបចំមហោស្រពយុវជនឆ្នាំទី៣ពីថ្ងៃទី១៦ កុម្ភៈ ឆ្នាំ២០១៧ រហូតដល់ថ្ងៃទី២៨ កុម្ភៈ ឆ្នាំ២០១៧។ ការចូលរួមមានក្រុមយុវជនសម្តែងចំនួន៣៦ក្រុម ក្នុងនោះមានក្រុមសិល្បៈសិស្សថ្នាក់មធ្យមគ្រប់រាជធានីខេត្ត-ក្រុង២៥ក្រុម និងយុវនិស្សិតថ្នាក់ឧត្តមសិក្សានៅរាជធានីភ្នំពេញចំនួន១១ក្រុម សរុបក្រុមយុវសិស្ស និងនិស្សិតចូលរួមចំនួន៣៦ក្រុម គិតជាសិល្បករចំនួន៩០០នាក់ ។
គោលបំណងនៃការបើកមហោស្រពនេះ គឺចូលរួមបអរសាទរទិវាវប្បធម៌ជាតិ៣ មីនា ដែលមានជារៀងរាល់ឆ្នាំ និងមានគោលបំណងសំខាន់៤ គឺ
ទី១-ដើម្បីគោរពតាមមតិណែនាំរបស់សម្តេចតេជោ ហ៊ុន សែន ។
ទី២-ចង់បន្តឲ្យសិស្សនិស្សិតទាំងអស់កាន់តែមានការយល់ដឹងពីវប្បធម៌ជាតិយើង ដើម្បីបណ្តុះសេចក្តីស្រឡាញ់ ចូលរួមថែរក្សាវប្បធម៌ឲ្យរីកចម្រើន ។
ចំណុចទី៣-ចង់បញ្ជ្រាបចំណេះដឹងផ្នែកសិល្បៈវប្បធម៌ ដើម្បីឲ្យកូនខ្មែរស្គាល់ពីអត្តសញ្ញាណជាតិខ្លួន សំដៅកាត់បន្ថយឥទ្ធិពលវប្បធម៌មិនល្អមកពីខាងក្រៅ ។
ទី៤-ដើម្បីអបអរសាទរទិវាវប្បធម៌៣មីនាហើយប្រែក្លាយទិវាវប្បធម៌នេះទៅជាយុទ្ធនាការថ្នាក់ជាតិ ដល់យុវជនជួយលើកស្ទួយបន្តទៀត ។
ប្រធានបទសម្រាប់ការសម្តែងរបស់យុវជន គឺប្រធានបទ «ឈុតល្ខោនអប់រំ» ដើម្បីឲ្យមានការរីកចម្រើនផ្នែកឈុតល្ខោនជាច្រើន ក្រោមខ្លឹមសារមួយចំនួនដែលដាក់ឲ្យយុវជនសម្តែង ទី១គឺ«យុវជនដើម្បីអភិរក្ស និងអភិវឌ្ឍវប្បធម៌ជាតិ» ។ ទី២-«យុវជនដើម្បីសីលធម៌សង្គម និងគុណធម៌ជាតិ» ។ ទី៣-«យុវជនដើម្បីសុវត្ថិភាពសង្គម និងសន្តិភាព និងការអភិវឌ្ឍ» ។
ពានរង្វាន់ជ័យលាភីនឹងប្រគល់ជូនផ្ទាល់ពីសម្តេចតេជោ ហ៊ុន សែន នាយករដ្ឋមន្ត្រីនាព្រឹកថ្ងៃទី៣មីនាឆ្នាំ២០១៧ នៅសាលសន្និសីទចតុម្មុខ ។ ក្រុមជ័យលាភីត្រូវសម្តែងជាកិត្តិយសជូនសម្តេចនាយករដ្ឋមន្ត្រីទស្សនា ដើម្បីអបអរសាទរទិវាវប្បធម៌ជាតិ៣ មីនា ៕
ចែករំលែកព័តមាននេះ