ប្រជាពលរដ្ឋរស់នៅតាមដងទន្លេមេគង្គក្រោម ស្ថិតក្នុងភូមិមានជ័យ ឃុំកោះចេក ស្រុកពាមជរ ខេត្តព្រៃវែង កំពុងមានការព្រួយបារម្ភនូវគ្រោះថ្នាក់បាក់ច្រើនទន្លេ ខណៈរដូវ
ខេត្តកណ្ដាល ៖ ប្រជាពលរដ្ឋរស់នៅតាមដងទន្លេមេគង្គក្រោម ស្ថិតក្នុងភូមិមានជ័យ ឃុំកោះចេក ស្រុកពាមជរ ខេត្តព្រៃវែង កំពុងមានការព្រួយបារម្ភនូវគ្រោះថ្នាក់បាក់ច្រើនទន្លេ ខណៈរដូវទឹកឡើងនេះ ពួកគាត់សង្កេតឃើញមានទូកសាឡុងធំៗបូមខ្សាច់ជាច្រើនគ្រឿងធ្វើសកម្មភាពបូមទាំងយប់ ទាំងថ្ងៃ នៅអែបក្បែរៗច្រាំងទន្លេ ក្រោយផ្ទះរបស់ពួកគាត់។
បើតាមប្រភពពីប្រជាពលរដ្ឋបានប្រាប់ឲ្យដឹងនាព្រឹកថ្ងៃទី០៦ ខែកញ្ញា ឆ្នាំ២០២២នេះថា សាឡុងបូមខ្សាច់ទាំងនេះ បានធ្វើសកម្មភាពបូមរយៈពេលពីរបីខែមកហើយ គឺធ្វើសកម្មភាពបូមគ្មានម៉ោងពេលវេលាសម្រាកនោះទេ សឹងថា ២៤ ម៉ោងតែម្ដង។ ទាំងយប់ ទាំងថ្ងៃ រីឯខ្សាច់ដែលបូមបាននោះ គឺពួកគេមិនដែលទុកប្រើប្រាស់នៅក្នុងស្រុកនោះទេ ដោយនាំយកទៅលក់នៅប្រទេសវៀតណាម តាមច្រកទ្វារអន្តរជាតិក្អមសំណ។
ពលរដ្ឋបន្តថា អ្វីដែលសំខាន់សម្រាប់ប្រជាពលរដ្ឋនោះ គឺគ្រោះបាក់ច្រាំងទន្លេ ដែលនាំឲ្យបាត់បង់នៅដីចំការម្ដងបន្តិចម្ដងបន្តិច រហូតបាក់ដល់ដីលំនៅដ្ឋានទៀតផង ពីព្រោះរដូវនេះ គឺជារដូវទឹកឡើង ហើយទឹកហូរកួចខ្លាំង ថែមទាំងសាឡង់ទាំងនេះបូម និងអែបៗច្រាំងទន្លេ កងរំពងសំឡេងឮខ្លាំងៗរំខានដល់ការដេកពួនរបស់ប្រជាពលរដ្ឋទៀតផង។
ជុំវិញករណីខាងលើនេះ ភ្នាក់ងារសារព័ត៌មានបានព្យាយាមទំនាក់ទំនងទៅលោក ថន ទ្រី ប្រធានការិយាល័យរ៉ែខេត្តព្រៃវែង ដើម្បីសុំការបំភ្លឺ ប៉ុន្តែទូរស័ព្ទចូលជាច្រើនដង តែគ្មានអ្នកទទួល។ ចំណែកលោក សេង ធា អភិបាលស្រុកពាមជរ ក៏មិនអាចទំនាក់ទំនងសុំការបំភ្លឺបានដែរ៕
ចែករំលែកព័តមាននេះ