អស់រយៈពេលជិត២០ឆ្នាំមកហើយ ក្រោយពីការសោយទិវង្គតរបស់ម្ចាស់ក្សត្រីដាយអាណា នៃប្រទេសវ៉ែល ព្រះមាតានៃព្រះអង្គម្ចាស់វីល្លៀម និងព្រះអង្គម្ចាស់ហែរី ក្រោយពីព្រះនាងជួបគ្រោះថ្នាក់ចរាចរណ៍នៅក្រុងប៉ារីស ប្រទេសបារាំង នាថ្ងៃទី៣១ សីហា ១៩៩៧ ។ កាលនោះព្រះអង្គម្ចាស់វីល្លៀម មានព្រះជន្ម១៥ឆ្នាំ ចំណែកព្រះអង្គម្ចាស់ហែរី មានព្រះជន្ម១២ឆ្នាំ ។
បច្ចុប្បន្នព្រះអង្គម្ចាស់ទាំង២ មានព្រះតម្រិះសង់រូបសំណាកព្រះមាតា ដើម្បីរំលឹកពីគុណសម្បត្តិដ៏ល្អចំពោះអាណាចក្រអង់គ្លេស និងនៅលើពិភពលោក ។ រូបសំណាករបស់ម្ចាស់ក្សត្រីដាយអាណា អាចសង់នៅបរិវេណឧទ្យានសាធារណៈនៃព្រះរាជវាំង«Kensington»ក្រុងឡុងដ៍ ចក្រភពអង់គ្លេស ធ្លាប់ជាទីប្រថាប់របស់ម្ចាស់ក្សត្រីដាយអាណា ។ ព្រះអង្គម្ចាស់វីល្លៀមផ្ទាល់តាំងព្រះទ័យថា នៅចុងឆ្នាំនេះក្រោយពេលបញ្ចប់ភារកិច្ចយោធានឹងផ្លាស់ទៅស្នាក់នៅព្រះរាជវាំងនោះរួមជាមួយក្រុមគ្រួសារ ដោយរំពឹងទុកថារូបសំណាកនឹងសង់រួចរាល់នៅដំណាច់ឆ្នាំ២០១៧ ។
ទីលានអនុស្សាវរីយ៍ ដើម្បីរំលឹកដល់ម្ចាស់ក្សត្រីដាយអាណាលើកដំបូងនោះគឺប្រព័ន្ធធារាសាស្ត្រអនុស្សាវរីយ៍ស្ថិតក្នុងឧទ្យានសាធារណៈHyde Parkក្រុងឡុងដ៍ គឺជាប្រព័ន្ធធារាសាស្ត្រមានប្រវែង២១០ម៉ែត្រ បានបើកជាផ្លូវការនៅឆ្នាំ២០០៤ ។ ប្រព័ន្ធធារាសា ស្ត្រនោះរំលេចម៉ូដជាតំណាងនៃវិញ្ញាណរបស់ម្ចាស់ក្សត្រី និងក្តីស្រឡាញ់ដែលព្រះអង្គមានចំពោះបុត្រទាំង២ ស្ថិតនៅបរិវេណខាងលិចឆៀងខាងត្បូងនៃទីលានHyde Park ៕
ចែករំលែកព័តមាននេះ