ខេត្តកំពង់ឆ្នាំង ៖ បន្ទាប់ពីជួបជុំគ្នាផឹកស៊ីនៅថ្ងៃសែនចូលឆ្នាំចិន បងប្អូនបង្កើត២នាក់ក៏បានទាស់សំដីគ្នា ស្រាប់តែពេលនោះប្អូនបង្កើតចិត្តខ្លាំងបានទាញប៉័ងតោកា.ប់បងប្រុស …
ខេត្តកំពង់ឆ្នាំង ៖ បន្ទាប់ពីជួបជុំគ្នាផឹកស៊ីនៅថ្ងៃសែនចូលឆ្នាំចិន បងប្អូនបង្កើត២នាក់ក៏បានទាស់សំដីគ្នា ស្រាប់តែពេលនោះប្អូនបង្កើតចិត្តខ្លាំងបានទាញប៉័ងតោកាប់បងប្រុសប៊ិះដាច់កបង្កឲ្យមានការភ្ញាក់ផ្អើលកាលពីវេលាម៉ោង៧ និង៣០នាទីយប់ ថ្ងៃទី២៧ ខែមករា ឆ្នាំ២០១៧ ចំណុចផ្ទះបងប្អូនម្នាក់ទៀតនៅភូមិគ្រួស ឃុំរលាប្អៀរ ស្រុករលាប្អៀរ ។
លោក ទឹម ចន្ធី អធិការនគរបាលស្រុករលាប្អៀរ បានឲ្យដឹងថា ជនរងគ្រោះជាបងឈ្មោះ រឿន ចន អាយុ៣៧ឆ្នាំ ចំណែកជនដៃដល់ជាប្អូនឈ្មោះ រឿន ង៉ែត អាយុ៣៥ឆ្នាំ ។ ទាំងពីរនាក់មានទីលំនៅភូមិចាស់ ឃុំតាំងក្រសាំង ស្រុកទឹកផុស ។
លោកអធិការបន្តថា នៅថ្ងៃចូលឆ្នាំចិន បងប្អូនបង្កើតបានមកជួបជុំគ្នានៅផ្ទះបងប្អូនម្នាក់ទៀតនៅភូមិ-ឃុំកើតហេតុ ហើយក៏នាំគ្នាផឹកស៊ីស្រវឹងរៀងៗខ្លួន ។ បន្ទាប់ពីផឹកស៊ីស្រវឹងក៏មានការទាស់សំដីគ្នាទៅវិញទៅមករវាងបងប្អូនបង្កើតទាំង២នាក់រហូតឈានដល់ផ្ទុះហិង្សា ដោយបុរសជាប្អូនបង្កើតបានយកកាំបិតប៉័ងតោកាប់បងប្រុសស្ទើរតែដាច់កបណ្តាលឲ្យរងរបួសជាទម្ងន់ ។
ក្រោយពេលកើតហេតុ បុរសជាប្អូនបានរត់គេចខ្លួនបាត់ ចំណែកបុរសជាបងត្រូវបានក្រុមគ្រួសារដឹកយកទៅសង្គ្រោះនៅមន្ទីរពេទ្យបង្អែកខេត្តជាបន្ទាន់ ៕
ចែករំលែកព័តមាននេះ