រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជានៅព្រឹកថ្ងៃទី២៣ ខែសីហានេះ បានធ្វើការបកស្រាយបន្ថែមពីលើភាពចម្រូងចម្រាស់នៃការបើកដេប៉ាតឺម៉ង់វៀតណាមនៅកម្ពុជា ។ ដោយសម្តេច…
រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជានៅព្រឹកថ្ងៃទី២៣ ខែសីហានេះ បានធ្វើការបកស្រាយបន្ថែមពីលើភាពចម្រូងចម្រាស់នៃការបើកដេប៉ាតឺម៉ង់វៀតណាមនៅកម្ពុជា ។
ដោយសម្តេច ហ៊ុន សែន បានបញ្ជាក់ថា ទោះបីជាកន្លងមកមានការបកស្រាយរបស់ឯកឧត្តម ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា រួចហើយក្តី តែសម្តេចនាយករដ្ឋមន្ត្រី សូមបញ្ជាក់បន្ថែម រឿងបញ្ហានេះ ។ សម្តេចតេជោ បានចោទសួរថា ហេតុអ្វីត្រូវជ្រួលច្របល់? បើកដេប៉ាតឺម៉ង់វៀតណាម គ្មានអ្វីខាតទេ ព្រោះផលចំណេញ គឺខ្មែរយើងអ្នកទទួលបាន ។ នេះជាការលើកឡើងរបស់សម្តេចតេជោ នាពិធីចែកសញ្ញាបត្រ នាព្រឹកថ្ងៃអង្គារ ដល់និស្សិតរបស់សាកលវិទ្យាល័យអាស៊ី-អឺរ៉ុប ប្រមាណ ៣,០៧៥នាក់ ។
សម្តេចនាយករដ្ឋមន្ត្រីបានបញ្ជាក់ច្បាស់ថា ការបើកដេប៉ាតឺម៉ង់វៀតណាមនៅកម្ពុជា វាមានតែចំណេញ វាអត់មានអីខាតទេ អ្នកឯងចេះបារាំង អង់គ្លេស ឬភាសាអ្វីក៏ដោយ គឺអត់មានអីខាតទេ ។ រឿងអីបានជានាំគ្នាជ្រួលច្របល់?» ។
សម្តេច ហ៊ុន សែន បានបញ្ជាក់ថា ដេប៉ាតឺម៉ង់វៀតណាម មិនយកនិស្សិតវៀតណាមមកបង្រៀនវៀតណាមនៅខ្មែរនោះឡើយ ។ «ផលចំណេញ គឺខ្មែរយើងទេ ហេតុអ្វីបានថា ផលចំណេញ បើយើងបានបណ្តុះបណ្តាលនៅទីនេះ រួចហើយយើងបញ្ជូនចេញទៅ គឺងាយស្រួលទាំងកងទ័ពទាំងនគរបាល ទាំងផ្នែកស៊ីវិល» ។ នេះជាការបញ្ជាក់ ឥឡូវនិស្សិតកម្ពុជានៅវៀតណាមមានជាង១០០០នាក់ សូម្បីតែបេក្ខជនប្រឡងចម្រៀង Cambodian Idol ស៊ឹម ច័ន្ទពន្លឺ ក៏ជាអតីតនិស្សិតរៀនវេជ្ជបណ្ឌិតនៅវៀតណាមផងដែរ ។
«យើងបង្កើតឱ្យនិស្សិតរបស់យើងរៀន។ ហើយអ្នកណា ដែលចង់រកស៊ីជាមួយវៀតណាម ដូចជាអ្នកនៅតាមព្រំដែនជាមួយវៀតណាម រកស៊ីទំនាក់ទំនងជាមួយនឹងខាងវៀតណាម គេអាចបញ្ជូនមនុស្សមករៀនភាសាវៀតណាម កូនចៅរបស់គេ រឿងហ្នឹងមានអីខុស» ។ នេះជាការបញ្ជាក់របស់សម្តេចតេជោ។
សម្តេចនាយករដ្ឋមន្ត្រីបានបន្ថែមថា «វាមានតែចំណេញ វាអត់មានអីខាតទេ។ អ្នកឯងចេះបារាំង ចេញអង់គ្លេស … ចេះភាសាអីក៏ដោយ គឺអត់មានអីខាតទេ ហើយរឿងអីបានជានាំគ្នាជ្រួលច្របល់ ថារៀនហ្នឹងវាបង្កើតទៅជាបញ្ហា កម្ពុជាក្រោមទី២ ហើយ។ នេះមិនមែនយកនិស្សិតវៀតណាមកបង្រៀន វៀតណាមនៅស្រុកខ្មែរឯណា។ វៀតណាម មុនពេលបញ្ជូននិសិ្សតគេមកស្រុកខ្មែរ គេក៏មានកន្លែងបង្រៀនភាសាខ្មែរនៅឯវៀតណាម មុនពេលដែលគេបញ្ជូនមករៀន។ ជប៉ុនដូចគ្នា ចិនដូចគ្នា មុនពេលដែលគេបញ្ជូននិស្សិតរបស់គេមកដល់កម្ពុជា គេក៏មានសាលាបណ្តុះបណ្តាលភាសាខ្មែរហើយស្រេច។ ហើយបើយើងចេះអាហ្នឹងទៅ វាអីទៅងាប់ វាមានតែចំណេញ»។
សម្តេចលើកឧទាហរណ៍ រវាងកញ្ចប់ទេសចរឆ្លងដែន ទៅថៃរៀនថៃ ទៅវៀតណាម រៀនភាសាវៀតណាមទៅ។ ជួនកាលវៀតណាមអត់ដឹងថាយើងចេញវៀតណាម ហើយនិយាយដើមយើង យើងនឹងដឹង។
សូមបញ្ជាក់ថា នៅកម្ពុជាសព្វថ្ងៃគឺមាន ដេប៉ាតឺម៉ង់ភាសាឡាវ ដេប៉ាតឺម៉ង់ភាសាថៃ ភាសាជប៉ុន ដេប៉ាតឺម៉ង់ភាសាកូរ៉េ ដេប៉ាតឺម៉ង់ភាសាចិន ជាដើម៕
ចែករំលែកព័តមាននេះ