តាមរកកូនក្រមុំច្រើនថ្ងៃមិនឃើញ ប្តឹងសមត្ថកិច្ចឲ្យជួយ
រាជធានីភ្នំពេញ ៖ បុរសម្នាក់បន្ទាប់ពីតាមរកកូនស្រីវ័យក្រមុំជាច្រើនថ្ងៃហើយនៅតែរកមិនឃើញ ទើបធ្វើដំណើរទៅកាន់ប៉ុស្តិ៍នគរបាលចោមចៅ កាលពីវេលាម៉ោង៩ព្រឹក …
រាជធានីភ្នំពេញ ៖ បុរសម្នាក់បន្ទាប់ពីតាមរកកូនស្រីវ័យក្រមុំជាច្រើនថ្ងៃហើយនៅតែរកមិនឃើញ ទើបធ្វើដំណើរទៅកាន់ប៉ុស្តិ៍នគរបាលចោមចៅ កាលពីវេលាម៉ោង៩ព្រឹក ថ្ងៃទី២៣ ខែមករា ឆ្នាំ២០១៧ ដើម្បីដាក់ពាក្យបណ្តឹងសុំឲ្យនគរបាលជួយអន្តរាគមន៍ជួយរកកូនស្រីរបស់គាត់ផង ។
បុរសរូបនោះឈ្មោះ សាម ឈុច អាយុ៣៨ឆ្នាំ មុខរបរជាកម្មករសំណង់ ស្នាក់នៅផ្ទះជួលក្នុងផ្សារអង្គ ស្ថិតនៅក្នុងភូមិអង្គ សង្កាត់ចោមចៅ ខណ្ឌពោធិ៍សែនជ័យ និងមានស្រុកកំណើតនៅក្នុងភូមិបន្ទាយមាស ឃុំបន្ទាយមាស ស្រុកទូកមាស ខេត្តកំពត ។ ចំណែកកូនស្រីដែលបាត់ដំណឹងឈ្មោះ ទិត្យ ស្រស់ អាយុ២០ឆ្នាំ ជាកម្មកររោងចក្រ ស្នាក់នៅផ្ទះជួលជាមួយឪពុកគ្នា ។
បុរសជាឪពុកបានឲ្យដឹងថា កូនរបស់គាត់បានបាត់ចេញពីផ្ទះអស់រយ:ពេល៧ថ្ងៃហើយ គឺមិនដឹងថា នាងកំពុងស្នាក់នៅទីណានោះទេ ប៉ុន្តែគាត់មានការសង្ស័យថា នាងទៅជាមួយបុរសម្នាក់ឈ្មោះ ហេង អាយុប្រហែលជាង៣០ឆ្នាំ មុខរបរធ្វើការរោងចក្រ ស្នាក់នៅភូមិអង្គ សង្កាត់ចោមចៅ ខណ្ឌពោធិ៍សែនជ័យ ។ គាត់ថា បុរសឈ្មោះ ហេង នោះមានប្រពន្ធរួចហើយ ហើយបានទាក់ទងកូនស្រីរបស់គាត់រយ:ពេល៦ខែហើយ រហូតមកទល់ពេលនេះ មិនដឹងថា បុរសនោះនាំកូនស្រីគាត់ទៅដល់ទីណាទេ ។
បុរសជាឪពុកបន្តថា គាត់ និងកូនស្រី បានចាកចេញពីស្រុកកំណើតមកស្នាក់នៅភ្នំពេញ ដើម្បីររកស៊ី ដោយស្នាក់នៅផ្ទះជួលខាងលើ ហើយកូនស្រីគាត់បានធ្វើជាកម្មការិនីរោងចក្រកាត់ដេរ ចំណែកឯគាត់ធ្វើជាកម្មករសំណង់ ហើយម្នាក់ៗព្រឹកឡើងចាកចេញពីផ្ទះបាត់ លុះយប់ឡើងបានជួបមុខគ្នា ហើយពេលដែលកូនស្រីគាត់មានទំនាក់ទំនងជាមួយបុរសឈ្មោះ ហេង នោះគាត់ក៏បានដឹងដែរ និងបានណែនាំកូនជារឿងយៗដែរ។
ដោយឡែក នៅព្រឹកថ្ងៃទី១៧ ខែមករា ឆ្នាំ២០១៧ កូនស្រីបានចេញទៅធ្វើការរោងចក្រ ចំណែកគាត់បានចេញទៅធ្វើការសំណង់ និងមិនបានដឹងថា មានរឿងអ្វីកើតឡើងនោះទេ លុះល្ងាចឡើង ពេលចេញពីធ្វើការវិញ ស្រាប់តែបាត់មិនឃើញកូនស្រីត្រឡប់ទៅផ្ទះ ទើបមានការភ្ញាក់ផ្អើល និងតាមរកគ្រប់កន្លែង ប៉ុន្តែរកមិនឃើញឡើយ ។ ក្រោយពេលចាកចេញពីផ្ទះបាត់ រយៈពេល២-៣ថ្ងៃ កូនស្រីគាត់បានទូរស័ព្ទរកលុយពីគាត់ដើម្បីចាយវាយ ដែលគាត់សង្ស័យថា នាងទៅជាមួយបុរសឈ្មោះ ហេង នោះ ប៉ុន្តែនាងមិនបានប្រាប់ពីទីតាំងដែលនាងកំពុងស្នាក់នៅឡើយ ហើយរហូតមកដល់ពេលនេះមានរយៈពេល១អាទិត្យហើយ ទើបគាត់សម្រេចចិត្តប្ដឹងឲ្យនគរបាលជួយអន្តរាគមន៍តែម្ដង ៕
ចែករំលែកព័តមាននេះ