ប្រជាជននៅក្នុងទ្វីបអាស៊ី គេតែងដឹងរឿងអ្នកតាស្ទើរតែទាំងអស់ ។
ប្រទេសដែលគួរឱ្យចាប់អារម្មណ៍ជាងគេ គឺប្រទេសខ្មែរយើង ភាគច្រើនបណ្តាជននៅក្នុងក្រុងភ្នំពេញ ធ្លាប់បានឃើញរូបអ្នកតាចិនស្ទើរគ្រប់ៗគ្នា ព្រោះនៅទីក្រុងភ្នំពេញមានវត្តអ្នកតាចិនច្រើនណាស់ ។
យោងតាមសៀវភៅ«សែនបញ្ហា» ជារៀងរាល់ថ្ងៃ គេតែងសង្កេតឃើញមានអ្នកជំនឿជាច្រើន (ប្រុសក៏មាន ស្រីក៏មាន មនុស្សចាស់ក៏មាន កូនក្មេងក៏មាន) នាំគ្នាទៅបន់ស្រន់អ្នកតា ។ ដូច្នេះនៅក្នុងរោងអ្នកតានីមួយៗ មិនសូវមានពេលស្ងាត់ទេ តែងតែមានមនុស្សចេញចូលមិនដាច់រយៈ (មើលតែផ្ទះលក់ទំនិញ) ។ អ្នកជំនឿដែលយួរមាន់ ទា និងទៀនធូបក្រដាសប្រាក់ ដើរចូលទៅសែនទៅបន់នៅក្នុងរោងអ្នកតានោះ សុទ្ធតែមានគោលបំណងខុសៗគ្នា ។
ក្រៅពីបន់ស្រន់អ្នកតានេះ មានរឿងជាន់រូបទៀត គឺដើម្បីឱ្យអ្នកជំនឿបានឃើញផ្ទាល់នឹងភ្នែក គេត្រូវចាត់ឱ្យមានម្នាក់ (ប្រុស ឬស្រី) សម្រាប់ឱ្យជាន់រូប ។ ក្នុងអត្ថន័យជាន់រូបនេះ បានសេចក្តីថាគេបន់ស្រន់ឱ្យព្រលឹងអ្នកតានោះ ចូលមកស្ថិតនៅក្នុងខ្លួនមនុស្សម្នាក់សម្រាប់ដោះស្រាយដោយផ្ទាល់មាត់ជាមួយអ្នកជំនឿ ។ រូបអ្នកតាដែលចូលហើយនេះ មានឫទ្ធានុភាពសម្បើមណាស់ អាចមើលឃើញកន្ទុយលេខឆ្នោត និងល្បែង ផ្សេងៗ ដែលគេមិនទាន់ចេញ ។ អាចមើលឃើញរឿងអាថ៌កំបាំងទាំងអស់ក្នុងខ្លួនមនុស្ស អាចព្យាបាលជំងឺបានដោយប្រើតែឈាមពីអណ្តាត ដែលអ្នកតារូស ឬអារអណ្តាតដោយខ្លួនឯងទៅផ្តិតលើក្រដាសអាចមើលឃើញរាសីចុះ ឬឡើងរបស់មនុស្សអាចបញ្ចេញមន្តអាគម អូមអាម គ្រប់បែបយ៉ាង ដើម្បីធ្វើឱ្យគេរកស៊ីបាន ។ល។ និង ។ល។
ចំពោះរឿងជាន់រូបនេះ យើងបានស្រាវជ្រាវឃើញការណ៍ពិតច្រើន ដូចជារឿងប្រាប់លេខឆ្នោត ឬល្បែង១២រូបជាដើម ។ កាលសម័យកាស៊ីណូភ្នំពេញ យើងពិនិត្យឃើញអ្នករងគ្រោះដោយសារល្បែងកាស៊ីណូមិនតិចទេ ខ្លះលក់ផ្ទះ លក់មាស លក់ពេជ្រ ខ្លះត្រូវលក់ខ្លួន វង្វេងសេចក្តីសុខ រហូតដល់ចងកសម្លាប់ខ្លួន ខ្លះត្រូវលែងលះប្តីប្រពន្ធ…ដោយសាររឿងល្បែង និងដោយសារការបំភ្លឺរបស់អ្នកតា ។ កាលពីកាស៊ីណូភ្នំពេញបើកមានល្បែងម្យា៉ងហៅថា «១២រូប» ហៅតាមភាសាចិនថា «ចាប់យីគី» ។ ល្បែងនេះគេចូលចិត្តលេងច្រើនណាស់ ព្រោះត្រូវ១សង១០ ។
អ្នកស្រវឹងល្បែងទាំងឡាយ តែងតែទៅសួរអ្នកតាអំពីរូបដែលត្រូវចេញនៅវេលាថ្ងៃបន្ទាប់ អ្នកតាដែលចូលក្នុងរូបនោះក៏ចេះតែបង្ហាញប្រាប់អ្នកជំនឿឱ្យចាក់រូបនេះ ចាក់រូបនោះទៅ ហើយក្នុងចំណោមអ្នកដែលទៅបន់សួរ ក៏តែងមានអ្នកចាក់ត្រូវដែរ នេះជារឿងឆុតឆាប់របស់អ្នកតាដែលធ្វើឱ្យអ្នកជំនឿកាន់តែជឿស៊ុបតទៅទៀត ។
ក្នុងរឿងនេះយើងបានសង្កេតឃើញថា ក្នុងចំនួនមនុស្សដែលទៅសួរអ្នកតានោះ ពុំមែនសុទ្ធតែត្រូវទាំងអស់ទេ គឺក្នុងដប់មួយនាក់បានត្រូវម្នាក់ ព្រោះនៅពេលអ្នកជំនឿទៅសួរ អ្នកតានោះតែងតែប្រាប់ឱ្យចាក់រូបខុសពីគ្នា អ្នកទី១ ទៅសួរប្រាប់ថា ចេញរូបដំរី អ្នកទី២ ទៅសួរប្រាប់ថាចេញរូបសេះ អ្នកបន្តបន្ទាប់មកចេះតែប្រាប់រូប ខុសៗគ្នា រហូតដល់គ្រប់១២រូបទើបចាប់ផ្តើមឡើងវិញម្តង ។
ធ្វើដូច្នោះ ក្នុងចំណោមមនុស្សដ៏កកកុញនោះ មុខជាមានមនុស្សខ្លះចាក់ត្រូវមិនខាន រីឯកន្ទុយលេខឆ្នោតក៏ដូច្នោះដែរ គឺមនុស្សម្នាក់ប្រាប់១លេខ ឬ២លេខ លុះបានមួយរយនាក់ ក៏ចាប់ផ្តើមលេខដំបូងវិញ ធ្វើយ៉ាងនេះក្នុងចំណោមអ្នកទៅបន់សួរនោះ ប្រាកដជាមានអ្នកណាមួយត្រូវមិនខាន ។
ចំពោះរឿងអ្នកតា យើងបានឃើញអ្នកស្រវឹងជំនឿបែបនេះត្រូវរងគ្រោះរហូតបាត់បង់ជីវិតក៏មានចំនួនច្រើនមិនតិចដែរ ។ មានអ្នកជំនឿខ្លះគ្រាន់តែស្អីបន្តិចសួរអ្នកតា ស្អីបន្តិចសួរអ្នកតា (ភាគច្រើនជនជាតិចិន) ។
ចែករំលែកព័តមាននេះ