រាជធានីភ្នំពេញ ៖ អ្នកចម្រៀងចាប៉ីដងវែង ដែលនឹងជួបជុំគ្នាលើកដំបូងនៅថ្ងៃទី២១ មករា ខាងមុងនេះ ដែលមានដូចជាលោកតា គង់ ណៃ, លោកតាប្រាជ្ញ ឈួន, លោកតាស្មៀនប៉េ (ឬតាពូថៅដៃ), លោកតាសួន សាន និងអ្នកចម្រៀងចាប៉ីដងវែង មកពីខេត្តស្វាយរៀងផងដែរ ដែលពួកគាត់ជួបជុំសំណះសំណាល និងទទួលទានអាហាររួមគ្នា ស្ថិតក្នុងឃុំខ្វាវ ស្រុកទ្រាំង ខេត្តតាកែវ ដែលជាទឹកដីកំណើត និងទីកន្លែងស្នាក់នៅបច្ចុប្បន្នរបស់លោកតាប្រាជ្ញ ឈួន ផ្ទាល់ ។
ការប្រកាសជួយដល់អ្នកចម្រៀងចាប៉ីដងវែងនេះ ត្រូវបានធ្វើឡើង ក្រោយពីតារាចម្រៀងសន វិជ្ជបុត្រ បានមើលឃើញពីទុក្ខលំបាករបស់អ្នកចាប៉ីដងវែង ដែលមានវ័យកាន់តែជរា និងជីវភាពខ្វះមុខខ្វះក្រោយ ។
លោកបញ្ជាក់ថា លោកបានទំនាក់ទំនងទៅកាន់អ្នកចម្រៀងចាប៉ីដងវែងទាំង៥រូប និងបានប្រមូលពួកគាត់ឱ្យជួបជុំគ្នានៅភ្នំពេញនិងចេញដំណើរទៅកាន់លំនៅឋានរបស់លោកតាប្រាជ្ញ ឈួន នៅព្រឹកថ្ងៃទី២១ មករា តាមរថយន្តមួយគ្រឿង រួមគ្នាជាមួយសិល្បករមួយចំនួនផងដែរ ។
កម្មវីធីនេះ ក៏ជាការលើកទឹកចិត្តជំរុញឱ្យមានការលើកស្ទួយ និងគាំទ្របន្ថែមពីសំណាក់មហាជន ចំពោះសិល្បៈចាប៉ីដងវែង ដែលទើបនឹងដាក់បញ្ចូលជាសម្បត្តិបេតិកភណ្ឌអរូបិយ កាលពីពេលថ្មីៗនេះ ។ លោកបន្តថា អំណោយដែលលោកប្រគល់ជូននៅពេលនេះ គឺជាថវិការបស់លោកផ្ទាល់ ដែលសប្បុរសជនមួយចំនួនជួយដល់រូបលោក ហើយលោកចង់ធ្វើបុណ្យបន្តទៀត ក្រៅពីនេះក៏មានការរួមគ្នាជាមួយសិល្បករ និងសប្បុរសជនមួយចំនួនទៀត ដូចជាកញ្ញា វី រីយ៉ា តារាសម្តែង ថៅកែហាង វីយ៉ា សាឡន, តារាសម្តែងកញ្ញា សួង សុខសារ៉ានីត, តារាចម្រៀង អេនណា និងអេមី, អ្នកស្រី ជេនី រ័ត្ន ប្រធានផ្នែកទីផ្សារ ក្រុមហ៊ុនសុគន្ធវឌ្ឍនៈ
ត្រេឌីង, អតីតារាសម្តែងកញ្ញា ថាច់ ផល្លា, លោក ស្រី Linny Jay Jay CH រស់នៅប្រទេសអូស្ត្រាលី និងសប្បុរសជនមួយចំនួនទៀត។
លោកថា ព្រឹទ្ធាចារ្យ និងសិល្បករចាប៉ីដងវែង នឹងទទួលបានថវិកាសរុបម្នាក់ៗយ៉ាងតិច១០០ដុល្លារអាមេរិក រួមជាមួយនឹងគ្រឿងឧបភោគ-បរិភោគមួយចំនួនទៀត ។ ទោះជាអ្វីដែលលោកនិងសប្បុរសជនរួមគ្នាជួយនៅពេលនេះ មិនទាន់គ្រប់គ្រាន់នឹងតម្រូវការរបស់សិល្បករទាំងអស់ក្តី ប៉ុន្តែនេះគឺជាទឹកចិត្តដែលលោកនិងសប្បុរសជនមាន ។ លោកក៏រំពឹងដែរថា ប្រជាពលរដ្ឋខ្មែរនិងជួយគាំទ្រលើកទឹកចិត្តបន្តដល់សិល្បៈ ក៏ដូចជាសិល្បករផ្នែកចាប៉ីដងវែង។
ចែករំលែកព័តមាននេះ