រាជធានីភ្នំពេញ ៖ ថ្ងៃទី៥ មករា ២០១៧ នាយករដ្ឋមន្ត្រីកម្ពុជាបានអនុម័តលើផែនការកំណត់ និងបែងចែកតំបន់គ្រប់គ្រងរបស់ដែនជម្រកសត្វព្រៃលំផាត់ ។ ផែនការនេះជួយគាំទ្រឱ្យដល់ការគ្រប់គ្រងឱ្យមាននិរន្តរភាព ការពារការរំខាន និងការទន្ទ្រានទីតាំងដែលនៅសល់ និងមានតម្លៃផ្នែកអភិរក្សជាអន្តរជាតិរបស់ដែនជម្រកសត្វព្រៃនេះ ។ ការបែងចែកតំបន់គ្រប់គ្រងនេះត្រូវធ្វើឡើងបន្ទាប់ពីមានកិច្ចពិគ្រោះយោបល់ជាមួយសហគមន៍ និងអាជ្ញាធរមូលដ្ឋាន ដើម្បីផ្តល់ឱកាសដល់សហគមន៍មូលដ្ឋានចូលរួមកាន់តែសកម្មក្នុងការងារគ្រប់គ្រងតំបន់ការពារនេះ ។
ដែនជម្រកសត្វព្រៃលំផាត់គ្របដណ្តប់លើផ្ទៃដី២៥០.០០០ហិកតា ស្ថិតក្នុងខេត្តចំនួនពីរគឺ រតនគិរី និងមណ្ឌលគិរី ហើយកំពុងគាំទ្រដល់ការរស់នៅរបស់បក្សីជិតផុតពូជជាច្រើនប្រភេទដូចជា ត្រយងចង្កំកស ត្រយងយក្ស ត្មាតផេះ ត្មាតត្នោត និងត្មាតភ្លើង ។ ក្រៅពីនេះថនិកសត្វធំដែលស្ថិតក្នុងស្ថានភាពគំរាមគំហែងដូចជា រមាំង ទន្សោង និងខ្លាធំជាដើមក៏បានកត់ត្រាថា មានវត្តមាននៅតំបន់នេះផងដែរ ។ ប្រភេទសត្វទាំងនេះកំពុងទទួលរងការគំរាមគំហែងពីការបរបាញ់ ការកាប់ឈើខុសច្បាស់ និងការទន្ទ្រានយកដីជាដើម ។ ចាប់តាំងពីឆ្នាំ២០១១ផ្ទៃដីជិត៥០.០០០ហិកតារបស់ដែនជម្រកសត្វព្រៃនេះ ត្រូវបានប្រគល់ទៅឱ្យក្រុមហ៊ុនដីសម្បទានសេដ្ឋកិច្ចមកពីប្រទេសវៀតណាម ចិន និងកម្ពុជាចំនួន៦ ។ ដីសម្បទានសេដ្ឋកិច្ចនេះមិនត្រឹមតែបង្កើតទំនាស់ជាមួយប្រជាសហគមន៍ប៉ុណ្ណោះទេ ប៉ុន្តែក៏បានធ្វើឱ្យខូចខាតគម្របព្រៃ ប្រភេទសត្វព្រៃ និងទីជម្រក សំខាន់ៗរបស់ពួកវាផងដែរ ។
«យើងបានគាំទ្រដល់ក្រសួងបរិស្ថានក្នុងការកំណត់ និងបែងចែកតំបន់គ្រប់គ្រងនេះចាប់តាំងពីឆ្នាំ២០១២មកម្ល៉េះ ក្នុងគោលបំណងការពារតំបន់ស្នូលដែលនៅសល់របស់ដែនជម្រកនេះ ពីការបំប្លែង និងធ្វើឱ្យខូចខាត» ប្រសាសន៍លោកប៊ូ វរសក្ស នាយកកម្មវិធីអង្គការជីវិតសត្វស្លាបអន្តរជាតិប្រចាំកម្ពុជា ។ «ការបែងចែកតំបន់គ្រប់គ្រងនេះនឹងការពារមិនឱ្យមានដីសម្បទានសេដ្ឋកិច្ចថី និងការពង្រីកដីសម្បទានដែលមានស្រាប់ ។ ផែនការនេះក៏បានកំណត់ទីតាំងសម្រាប់ឱ្យសហគមន៍បង្កើតជាតំបន់សហគមន៍ការពារធម្មជាតិ ហើយនឹងជួយពង្រឹងដល់សិទ្ធិក្នុងការប្រើប្រាស់ធនធានធម្មជាតិដោយនិរន្តរភាពរបស់ពួកគាត់ផងដែរ» ។
«ការកំណត់ និងបែងចែកតំបន់គ្រប់គ្រងដែនជម្រកសត្វព្រៃលំផាត់នឹងធានាប្រសិទ្ធភាពក្នុងការគ្រប់គ្រង ព្រមទាំងកាត់បន្ថយទំនាស់រវាងអ្នកគ្រប់គ្រង និងអ្នកប្រើប្រាស់ធនធានធម្មជាតិ» ប្រសាសន៍លោកសាយ សំអាល់ រដ្ឋមន្ត្រីក្រសួងបរិស្ថាន ។
«សូមថ្លែងអំណរគុណដល់សម្តេចនាយករដ្ឋមន្ត្រីដែលបានផ្តល់ការយល់ព្រមដល់ការបែងចែកតំបន់គ្រប់គ្រងក្នុងដែនជម្រកសត្វព្រៃលំផាត់ យើងជឿថានឹងមិនមានការឈូសឆាយព្រៃខ្នាតធំទៀតទេចាប់ពីពេលនេះតទៅ» ប្រសាសន៍លោក ធុយ សុផាន់ ប្រធានគណៈកម្មការសហគមន៍ការពារធម្មជាតិអូររៃ ។ «សហគមន៍យើងខ្ញុំសប្បាយចិត្តនឹងចូលរួមជាមួយមន្ត្រីដែនជម្រកដើម្បីទប់ស្កាត់ការកាប់ព្រៃឈើ និងការទន្ទ្រានយកដីដោយខុសច្បាប់» ។
ដើម្បីអនុវត្តផែនការកំណត់ និងការ បែងចែកតំបន់គ្រប់គ្រងមានការងារច្រើនទៀតដែលត្រូវធ្វើ ដូចជាការបោះបង្គោលព្រំប្រទល់ ការអប់រំផ្សព្វផ្សាយដល់សហគមន៍ រៀបចំ និងអនុវត្តវិធីសាស្ត្រអនុវត្តច្បាប់សម្រាប់តំបន់ នីមួយៗ គាំទ្រ និងកសាងសមត្ថភាពរបស់សហគមន៍ក្នុងការគ្រប់គ្រងតំបន់សហគមន៍ជាដើម ។
មូលនិធិ John D. and Catherine T. MacArthur Foundation និងជើងឯកអភិរក្សសត្វស្លាបលោក Stephen Martin បានគាំទ្រដល់ការងារកំណត់តំបន់គ្រប់គ្រងរបស់អង្គការជីវិតសត្វស្លាបអន្តរជាតិកម្មវិធីប្រចាំកម្ពុជា និងមួលនិធិមនុស្ស ធនធាន និងការអភិរក្សនៅដែនជម្រកសត្វព្រៃលំផាត់ ៕
Like our Page
