ខេត្តកណ្តាល ៖ បើតាមលោកវរសេនីយ៍ឯក ឡាក់ ម៉េងធី ស្នងការរងទទួលផែនព្រហ្មទណ្ឌ នៃស្នងការដ្ឋាននគរបាលខេត្តកណ្តាល បានអោយដឹងថា យោងតាមបទបញ្ជាដ៏ម៉ឺងម៉ាត់របស់លោកឧត្ដមសេនីយ៍ទោ ឈឿន សុចិត្ត ស្នងការនៃស្នងការដ្ឋាននគរបាលខេត្តកណ្តាល ការិយាល័យនគរបាលព្រហ្មទណ្ឌកម្រិតស្រាល នៅថ្ងៃ១១ ខែសីហា ឆ្នាំ២០២២ បានបន្តបើកកិច្ចសហប្រតិបត្តិការបង្ក្រាបករណីហិ.ង្សាដោយចេតនា មានស្ថានទម្ងន់ទោសមួយកន្លែង ដែលបានកើតឡើងកាលពីថ្ងៃទី០៩ ខែសីហា ឆ្នាំ២០២២ វេលាម៉ោង១៩និង៣០នាទីយប់ នៅចំណុចរង្វង់មូលតាខ្មៅ ទល់មុខអយ្យការអមសាលាដំបូងខេត្តកណ្តាល ស្ថិតក្នុងភូមិតាខ្មៅ សង្កាត់តាខ្មៅ ក្រុងតាខ្មៅ ខេត្តកណ្ដាល។
លោកវរសេនីយ៍ឯក ឡាក់ ម៉េងធី បានបន្តថា ជនរងគ្រោះ២នាក់ រួមមាន ទី១- ឈ្មោះ ធា កូតា ភេទប្រុស អាយុ១៦ឆ្នាំ ជនជាតិខ្មែរ មានទីលំនៅភូមិប៊ុណ្ណា ឃុំព្រះពុទ្ធ ស្រុកកណ្តាលស្ទឹង ខេត្តកណ្តាល ជាសិស្ស បានរងរបួសរយះក្បាល និងប្រអប់ដៃខាងឆ្វេង និងទី២- ឈ្មោះ សំរ៉ិត ម៉ាធីរ៉ាក់ ភេទប្រុស អាយុ១៦ឆ្នាំ ជនជាតិខ្មែរ មានទីលំនៅភូមិកណ្តាល សង្កាត់រលួស ខណ្ឌដង្កោ រាជធានីភ្នំពេញ ជាសិស្សដូចគ្នា ប៉ុន្តែពុំមានរបួសស្នាមទេ។
ចំណែកឯជនសង្ស័យមានគ្នា១២នាក់ រួមមាន ៖ ទី១- ឈ្មោះ សុខអូន ណារិទ្ធ ភេទប្រុស អាយុ១៧ឆ្នាំ ស្នាកនៅភូមិព្រែកកំពឹស សង្កាត់ព្រែកកំពឹស ខណ្ឌដង្កោ រាជធានីភ្នំពេញ មុខរបរមិនពិតប្រាកដ (ឃាត់ខ្លួន), ទី២- ឈ្មោះ ពៅ រតនា ភេទប្រុស អាយុ១៦ឆ្នាំ មានទីលំនៅ ភូមិព្រែកកំពឹស សង្កាត់ព្រែកកំពឹស ខណ្ឌដង្កោ រាជធានីភ្នំពេញ មុខរបរមុខពិតប្រាកដ (គេចខ្លួន), ទី៣- ឈ្មោះ ឃីម ចាន់សីលា ភេទប្រុស អាយុ១៩ឆ្នាំ មានទីលំនៅភូមិព្រែកកំពឹស សង្កាត់ព្រែកកំពឹស ខណ្ឌដង្កោ រាជធានីភ្នំពេញ មុខរបរមុខពិតប្រាកដ (គេចខ្លួន), ទី៤- ឈ្មោះ មឿន ប៊ុនហេង ភេទប្រុស អាយុ១៧ឆ្នាំ មានទីលំនៅភូមិព្រែកកំពឹស សង្កាត់ព្រែកកំពឹស ខណ្ឌដង្កោ រាជធានីភ្នំពេញ មុខរបរមិនប្រាកដ (គេចខ្លួន), ទី៥- ឈ្មោះ អាត រដ្ឋា ភេទប្រុស អាយុ១៨ឆ្នាំ មានទីលំនៅភូមិព្រែកកំពិស សង្កាត់ព្រែកកំពិស ខណ្ឌដង្កោ រាជធានីភ្នំពេញ មុខរបរមិនពិតប្រាកដ (គេចខ្លួន), ទី៦- ឈ្មោះ គៀ សំណាង ហៅម៉ៅ ភេទប្រុស អាយុ១៦ឆ្នាំ មានទីលំនៅ ភូមិព្រែកកំពិស សង្កាត់ព្រែកកំពិស ខណ្ឌដង្កោ រាជធានីភ្នំពេញ មុខរបរមិនពិតប្រាកដ (គេចខ្លួន), ទី៧- ឈ្មោះ ឈុន លីដាលីម ភេទប្រុស អាយុ១៨ឆ្នាំ មានទីលំនៅភូមិក្រពើទ្រោម សង្កាត់រលួស ខណ្ឌដង្កោ រាជធានីភ្នំពេញ មុខរបរមិនពិតប្រាកដ (គេចខ្លួន) និងបក្ខពួកចំនួន៥នាក់ទៀត មិនស្គាល់អត្តសញ្ញាណនោះទេ (បានរត់គេចខ្លួន)។
យោងតាមប្រភពដដែលបន្តទៀតថា កាលគ្រានោះ ជនរងគ្រោះបានជិះម៉ូតូម៉ាក SCOOPY.i ម្នាក់មួយគ្រឿង ដើម្បីជិះទៅរកកន្លែងប៉ះកង់ម៉ូតូនៅម្តុំរង្វង់មូលតាខ្មៅ ។ ភ្លាមៗនោះ ស្រាប់តែមានជនសង្ស័យមួយក្រុម ជិះម៉ូតូប្រហែលជា៦គ្រឿង គ្នាប្រហែល១២នាក់ ប្រដាប់ដោយដាវ កាំបិត ពូថៅ បានជិះមកដល់ហើយស្រែកថា «អាហ្នឹងហើយៗ» រួចក៏ចុះពីលើម៉ូតូដេញកា.ប់ទៅលើជនរងគ្រោះ និងម៉ូតូ បណ្តាលឲ្យរងការខូចខាត និងរងរបួសដឹកយកទៅព្យាបាលនៅមន្ទីរពេទ្យតែម្តង រីឯក្រុមជនសង្ស័យវិញ បានជិះម៉ូតូរត់គេចខ្លួនបាត់ទៅ ។
ប្រភពដដែលបន្តថា លុះព្រឹកឡើងថ្ងៃទី១០ ខែសីហា ឆ្នាំ២០២២ កម្លាំងការិយាល័យនគរបាលព្រហ្មទណ្ឌកម្រិតស្រាល សហការជាមួយកម្លាំងនគរបាលក្រុងតាខ្មៅ និងប៉ុស្តិ៍នគរបាលរដ្ឋបាលសង្កាត់ព្រែកំពឹស ខណ្ឌដង្កោ បានធ្វើការចុះស្រាវជ្រាវ និងឃាត់ខ្លួនជនសង្ស័យម្នាក់មានឈ្មោះ សុខអូន ណារិទ្ធ ភេទប្រុស អាយុ១៧ឆ្នាំ យកមកសួរនាំនៅស្នងការដ្ឋាននគរបាលខេត្តកណ្តាល។
ក្រោយពីសួរនាំជនសង្ស័យឈ្មោះ សុខអូន ណារិទ្ធ បានសារភាពថា នៅថ្ងៃទី០៩ ខែសីហា ឆ្នាំ២០២២ វេលាម៉ោង១៦និង០០ល្ងាច ក្រុមជនសង្ស័យចំនួន១១នាក់ កំពុងតែលេងបាល់ទាត់ នៅចំណុចក្រោយសាលាប៊ែលធីព្រែកកំពឹស ស្ថិតក្នុងសង្កាត់ព្រែកកំពឹស ខណ្ឌដង្កោ រាជធានីភ្នំពេញ ខណៈពេលកំពុងតែលេងបាល់នោះ ស្រាប់តែក្រុមជនរងគ្រោះបានជិះម៉ូតូចំនួន០៨គ្រឿង មានគ្នាជាង១០នាក់ បានដេញកា.ប់ក្រុមរបស់ខ្លួន បណ្ដាលឲ្យខូចខាតម៉ូតូចំនួន០២គ្រឿង។
ជនសង្ស័យសារភាពបន្តថា ក្រោយមក ក្រុមរបស់ខ្លួនក៏បានបបួលគ្នាប្រហែល១០នាក់ ជិះម៉តូចំនួន០៧គ្រឿង ដេញតាមពីក្រោយក្រុមជនរងគ្រោះ។ ហើយខណៈពេលជិះមកដល់ចំណុចរង្វង់មូលតាខ្មៅ ស្រាប់តែក្រុមខ្លួនបានឃើញជនរងគ្រោះជិះម៉ូតូបំរុងចូលកន្លែងប៉ះកង់ម៉ូតូ ហើយក្រុមខ្លួនក៏បានស្រែកថា «ពួកអាហ្នឹងហើយៗ» បន្ទាប់ក្រុមខ្លួនក៏បានចុះពីលើម៉ូតូ រួចដេញកា.ប់ទៅលើជនរងគ្រោះ និងម៉ូតូតែម្តង ។
ក្រោយពេលធ្វើសកម្មភាពរួច ក្រុមជនសង្ស័យក៏បាននាំគ្នាជិះគេចខ្លួន ចំណែកជនរងគ្រោះវិញ ត្រូវបានរថយន្តដឹកទៅសង្គ្រោះនៅមន្ទីរពេទ្យ ស្ថិតនៅខណ្ឌដង្កោ ហើយម៉ូតូរបស់ជនរងគ្រោះ ក៏ត្រូវសមត្ថកិច្ចប្រគល់ឲ្យក្រុមគ្រួសារជនរងគ្រោះ ដើម្បីយកទៅជួសជុលប្រើប្រាស់វិញផងដែរ៕
ចែករំលែកព័តមាននេះ