រាជធានីភ្នំពេញ ៖ កញ្ញាសុវត្ថិឌី ធារិកា ត្រូវបានមជ្ឈដ្ឋានមហាជនមានការអាណិតអាសូរយ៉ាងខ្លាំង ក្នុងពេលដែលនាងត្រូវប្រឈមនឹងការបាត់បង់អ្នកមានគុណព្រមគ្នា ត្រឹមមួយប៉ប្រិចភ្នែកប៉ុណ្ណោះ។ រំលងទៅជិត៣ខែមកហើយ ដែលនាងនិងប្អូនប្រុសរស់នៅកំព្រាគ្មានមេប៉ា ក្រៅពីការអោយកម្លាំងចិត្តពីមិត្តភក្តិ មហាជន និងអ្នកគាំទ្រ។ អារម្មណ៍មួយនេះ ត្រូវកើតឡើងទាំងលំបាក ហើយនាងក៏ខំរើបម្រះងើបម្តងទៀត ដើម្បីអនាគតខ្លួនឯងផង និងប្អូនប្រុស ក៏ដូចជាជីដូនផងដែរ។
តារាចម្រៀងតូចច្រឡឹង សំឡេងពីរោះ និងតស៊ូក្នុងសិល្បៈតាំងពីវ័យជំទង់ សុវត្ថិឌី ធារិកា បានវិលមកកាន់អាជីពចម្រៀងឡើងវិញម្តងទៀត បន្ទាប់ពីសម្ងំនៅផ្ទះធ្វើចិត្តក្នុងរឿងសង្វេគដែលកើតឡើងក្នុងគ្រួសារ ខណៈឪពុកម្តាយបានលាចាកមិនអាចវិលត្រឡប់មកវិញទេ។
វេទិកាចម្រៀង និងកម្មវិធីមួយចំនួន ត្រូវបាននាងបង្ហាញមុខខ្លះៗ ដោយមើលទៅទឹកមុខ នាងតូចតែពូកែ និងរឹងមាំរូបនេះ នៅតែបង្កប់ន័យដោយភាពឈឺចាប់ ទោះនាងខំបំភ្លេចតែចិត្តវិញរឹតតែពិបាកកាត់ផ្តាច់។ ធារិកា សុខចិត្តវិលមកវិញ តបទៅនឹងការចង់ឃើញពីអ្នកគាំទ្រ ដើម្បី អោយដឹងថា នាងខំបំពេញការងារម្តងទៀត ស្វែងរកថវិកាជួយទ្រទ្រង់គ្រួសារ ហើយមានតែនាងម្នាក់នោះទេ ជាមេគ្រួសារ។
នៅពេលនាងបង្ហាញវត្តមាន សិល្បករជាច្រើន ដែលបានចូលរួមកម្មវិធីជាមួយ សុទ្ធតែមកផ្តល់កម្លាំងចិត្ត ហើយជូនពរអោយនាងខំរឹងមាំយកឈ្នះផ្លូវចិត្តអោយបាន នេះពិតជាព្រហ្មលិខិតដែលអ្នកណាក៏មិនចង់ជួប។
ជាកត់សម្គាល់ សុវត្ថិឌី ធារិកា ជាអតីតបេក្ខភាព ប្រឡងចម្រៀងលំដាប់ពិភពលោក ខេមបូឌាអាយឌល រដូវកាលទី១ ជំនាន់ នី រតនា។ កាលជំនាន់នោះ ជើងខ្លាំងៗដែលប្រជែងគ្នា មាន ម៉ៅ ហាជី សៅ ឧត្តម មាស មុនីរាជ និងធារិកា។ ហើយធារិកា បានត្រឹមវគ្គពាក់កណ្តាលផ្តាច់ព្រ័ត្រតែប៉ុណ្ណោះ។
ចាប់តាំងពីពេលនោះមក ធារិកា ត្រូវបានគេចូលចិត្ត ហើយកក្រើកទីផ្សារសិល្បៈយ៉ាងផុសផុល ឯអ្នកម្តាយនាងវិញ រមែងដើរតាម និងផ្តល់កម្លាំងចិត្តជាប្រចាំ ហើយក៏ជាអ្នកជួយជម្រុញទឹកចិត្តអោយនាងចូលសិល្បៈតាមប្រាថ្នា។ អ្វីៗសល់តែអនុស្សារីយ៍ យើងមានតែជូនពរនាង និងប្អូនប្រុស ព្រមទាំងជីដូន ទទួលបានសុខភាពល្អ និងសុភមង្គលជាថ្មីឡើងវិញ ជាពិសេសរំពឹងថា ការមកច្រៀងវិញ និងសម្បូរការងារធ្វើ ហើយមានប្រជាប្រិយភាពបន្តទៀត។
ចែករំលែកព័តមាននេះ