ខេត្តកំពត ៖ តំបន់ឆ្នេរស្អាតនៅព្រែកកំពតកន្លងមក ត្រូវបានទទួលការលើកសរសើរពីសំណាក់អាជ្ញាធរនិងភ្ញៀវដែលមកពីតាមបណ្តារាជធានី-ខេត្តចូលមកលេងកម្សាន្តក្នុងខេត្តដែលមានសក្តានុពលផ្នែកទេសចរណ៍ធម្មជាតិមួយនេះថា
ខេត្តកំពត ៖ តំបន់ឆ្នេរស្អាតនៅព្រែកកំពតកន្លងមក ត្រូវបានទទួលការលើកសរសើរពីសំណាក់អាជ្ញាធរនិងភ្ញៀវដែលមកពីតាមបណ្តារាជធានី-ខេត្តចូលមកលេងកម្សាន្តក្នុងខេត្តដែលមានសក្តានុពលផ្នែកទេសចរណ៍ធម្មជាតិមួយនេះថាជាឆ្នេរដែលមានសោភ័ណភាពស្អាតបែបធម្មជាតិ ។ ប៉ុន្តែថ្មីៗនេះបែរជាមានការរិះគន់ពីសំណាក់ភ្ញៀវទេសចរជាតិជាច្រើន ដែលមកទស្សនាតាមតំបន់ឆ្នេរថាបែបអនាធិបតេយ្យទៅវិញ ។
មតិរិះគន់បានលើកឡើងថា ចាប់ពីខាងត្បូងស្ពានចាស់(ស្ពានឥន្ទធនូ) ទៅត្បូងតាមបណ្តោយឆ្នេរទៅទល់មុខមន្ទីរប្រៃសណីយ៍ខេត្ត មានការបោះបង្គោលផែចតទូកយ៉ាងច្រើន រួមនឹងការធ្វើជណ្តើរសម្រាប់ចុះទូកយ៉ាងច្រើនស្អេកស្កះ ធ្វើឲ្យបាត់បង់សោភ័ណភាពឆ្នេរ រីឯការគ្រប់គ្រងអនាម័យនៅតាមបណ្តោយឆ្នេរ ដែលលក់ដូរនៅលើទូកនេះទៀតសោត ក៏គេឃើញភ្ញៀវដែលបរិភោគចំណីអាហារនៅលើទូកតាមបណ្តោយឆ្នេរបានចោលសំរាម និងកាកសំណល់ផ្សេងៗចូលក្នុងទឹកដោយគ្មានអនាម័យឡើយ ។ មជ្ឈដ្ឋានភ្ញៀវទេសចរទាំងនោះបានលើកឡើងថា ខេត្តមានសោភ័ណភាពឆ្នេរស្អាត ហើយសម្តេចប្រមុខរាជរដ្ឋាភិបាលធ្លាប់បានផ្តល់កិត្តិយសជាខេត្តទទួលជយ័លាភីរំដួល៣ទងទៀតផង ។ ប៉ុន្តែបច្ចុប្បន្ននៅជាប់នឹងសាលាខេត្ត គេឃើញភាពអនាធិបតេយ្យដោយការចតទូក និងបោះបង្គោលធ្វើផែទូកយ៉ាងច្រើនជាបន្តបន្ទាប់ពីសំណាក់អ្នកធ្វើអាជីវកម្មដឹកភ្ញៀវទេសចរកម្សាន្តតាមបណ្តោយដៃព្រែក មិនដឹងថា មានការអនុញ្ញាតច្បាប់ត្រឹមត្រូវពីមន្ទីរជំនាញឬក៏យា៉ងណានោះទេ ។
ជុំវិញការរិះគន់ពីសំណាក់ភ្ញៀវទេសចរខាងលើត្រូវបានលោក សយ ស៊ីណុល ប្រធានមន្ទីរទេសចរណ៍ខេត្តថ្លែងប្រាប់អ្នកយកព័ត៌មានថា កន្លងមកការបោះបង្គោលក្នុងទឹកសម្រាប់ទូកចតក៏ដូចការចតទូកដែរ ខាងមន្ទីរទេសចរណ៍បានចាត់ឲ្យមន្ត្រីជំនាញចុះទៅណែនាំ និងហាមឃាត់មិនអនុញ្ញាតឲ្យបោះបង្គោលសម្រាប់ចតទូក ដោយគ្មានច្បាប់ទម្លាប់អុីចឹងទេ ប៉ុន្តែបងប្អូនអ្នកធ្វើអាជីវកម្មខាងទូកដឹកភ្ញៀវ ទៅបោះបង្គោលនេះគ្មានសុំច្បាប់មន្ទីរជំនាញ ឬអាជ្ញាធរក្រុងទេ ហើយថ្មីៗនេះលោកបានជម្រាបទៅអាជ្ញាធរក្រុង សុំឲ្យជួយមានការសម្របសម្រួលឲ្យអ្នកដែលបោះបង្គោលក្នុងទឹកនេះដកចេញវិញឲ្យអស់ បើពួកគេមិនព្រមដកចេញទេ ខាងមន្ទីរជំនាញនឹងរកកម្លាំងទៅដកតែ
ម្តង ។
លោក សយ ស៊ីណុល បានឲ្យដឹងទៀតថា ទាំងការដាំបង្គោល ទាំងការចតទូក លោកកំពុងរិះរកធ្វើផែសម្រាប់ឲ្យទូកដែលដឹកភ្ញៀវទេសចរចតឲ្យបានត្រឹមត្រូវ មិនឲ្យចតនៅកន្លែងដែលពួកគេចតដូចសព្វថ្ងៃនេះទេ ។ ផែសម្រាប់ចតទូក លោកបានបញ្ជាក់ថា មិនឲ្យឆ្ងាយពីកន្លែងចតសព្វថ្ងៃនេះប៉ុន្មានទេ អាចសង់ផែនៅម្តុំខាងលិចកីឡាហែលទឹក ។ រីឯសំរាម និងកាកសំណល់ក៏ដូច្នេះដែរ លោកបានចុះពិនិត្យនៅតំបន់ក្រោមផ្សារត្រីក៏ដូចនៅក្បែរទូកចតនោះដែរ តែមិនមែនអ្នកបរិភោគអាហារនៅលើទូក ឬនៅលើផ្សារត្រីចោលនោះទេ គឺកាកសំណល់ដែលភ្ញៀវមួយចំនួនអាចហូបរួចចោលពីកន្លែងផ្សេង ហើយហូរតាមទឹកមកទើរនៅក្បែរទូកចត និងនៅក្រោមផ្សារត្រី ។
ដូច្នេះចាប់ពីពេលនេះទៅមុខ លោកនឹងរៀបចំផែសម្រាប់ចតទូកឲ្យបានត្រឹមត្រូវមានសណ្តាប់ធ្នាប់ល្អ ដើម្បីកុំឲ្យបាត់បង់នូវសោភ័ណភាពរំដួលបីទងនៃខេត្តដែលមានសក្តានុពលទេសចរណ៍ធម្មជាតិមួយនេះ ៕
ចែករំលែកព័តមាននេះ