ខេត្តសៀមរាប ៖ ក្រៅពីទស្សនាប្រាង្គប្រាសាទដ៏អស្ចារ្យ ភ្ញៀវទេសចរមួយចំនួនក៏ចាប់អារម្មណ៍នឹងទេសភាពដ៏ស្រស់ស្អាតនៃដើមឈើ ធំៗដែលដុះចាក់ឫសនៅលើតួប្រាសាទផងដែរ ។ ដើមឈើចំណាស់ជាច្រើនបានទាក់ទាញ
ខេត្តសៀមរាប ៖ ក្រៅពីទស្សនាប្រាង្គប្រាសាទដ៏អស្ចារ្យ ភ្ញៀវទេសចរមួយចំនួនក៏ចាប់អារម្មណ៍នឹងទេសភាពដ៏ស្រស់ស្អាតនៃដើមឈើ ធំៗដែលដុះចាក់ឫសនៅលើតួប្រាសាទផងដែរ ។ ដើមឈើចំណាស់ជាច្រើនបានទាក់ទាញចំណាប់អារម្មណ៍ភ្ញៀវទេសចរ ជាពិសេសដើមស្ពង់នៅក្នុងប្រាសាទតាព្រហ្ម ក៏ដូចជានៅតាមបណ្តាប្រាង្គប្រាសាទមួយចំនួនទៀត។
ក្នុងបំណងអភិរក្ស និងថែរក្សាដើមឈើចំណាស់ដែលដុះក្នុងឧទ្យានអង្គរ អាជ្ញាធរជាតិអប្សរា តាមរយៈនាយកដ្ឋានគ្រប់គ្រងព្រៃឈើ ទេសភាពវប្បធម៌ និងបរិស្ថាន បានព្យាបាលប្រភេទដើមឈើ ចំណាស់ៗជាច្រើន ជាពិសេសដើមស្ពង់។ ជាក់ស្តែងដើមស្ពង់ចំណាស់មួយដើមនៅជិតខ្លោងទ្វារទន្លេអុំ ត្រូវបានអភិរក្សថែទាំដោយយកចិត្តទុកដាក់ពីក្រុមអ្នកជំនាញរបស់អាជ្ញាធរជាតិអប្សរា ។ ការជួយសង្គ្រោះនេះ ធ្វើឡើងនៅព្រឹកថ្ងៃទី៦ ខែមករា ឆ្នាំ២០១៧ ។
លោកលឹម សៀងហួត បុគ្គលិកជំនាញតាមដានសុខភាពផ្នែកព្យាបាលដើមឈើនៃនាយកដ្ឋានគ្រប់គ្រងព្រៃឈើ ទេសភាពវប្បធម៌ និងបរិស្ថាន ឲ្យដឹងថា ដើមស្ពង់ដែលព្យាបាលនេះមានការពុកផុយនៅត្រង់គល់ និងចុង ។ ដោយសារមានទីតាំងជាប់ផ្លូវដើរដ៏សំខាន់សម្រាប់ភ្ញៀវទេសចរ ដូច្នេះក្រុមការងារ ប្រញាប់ព្យាបាល ។ ការព្យាបាលមានការចាប់អារម្មណ៍ច្រើនពីទេសចរដែលទស្សនានៅទីនោះ។ ភ្ញៀវទេសចរទាំងនោះបានសាកសួរពីការងារព្យាបាលដើមស្ពង់ ដែលក្រុមការងារកំពុងជួយសង្គ្រោះ ។
ដើមស្ពង់ដែលក្រុមជំនាញកំពុងព្យាបាលនេះ មានបញ្ហា៣សំខាន់ ។ ទី១-ដើមអម្ពិលដែលដុះក្បែរនោះ ឫសរបស់វាចាក់ប្រជែងនឹងគល់ដើមស្ពង់ ទី២-ការដើរជាន់ឫសស្ពង់ពីមនុស្ស ព្រោះវានៅជិតផ្លូវដើរ ធ្វើឲ្យវាពិបាកស្រូបយកជីវជាតិក្នុងដី ។ ទី៣-ដោយសារអាយុកាលរបស់វា ដោយចំណុចខ្លះនៃគល់បានពុកផុយ និងមានសត្វកណ្តៀរឡើង ។
សម្រាប់វិធីសាស្ត្រនៃការព្យាបាល លោក សៀង ហួត រៀបរាប់ថា៖ «ការព្យាបាលដើមស្ពង់ គឺធ្វើឡើងតាមរយៈការកោសសំបកពុកផុយចេញ លាបជ័រទឹក ដើម្បីការពារពីការជ្រាបទឹកចូលក្នុងសាច់ និងចុងក្រោយបិទដីដំបូកដើម្បីឲ្យសាច់ឈើដុះឡើងវិញ ។ បន្ទាប់មក ក្រុមការងារនឹងបន្តតាមដានរយៈពេល៦ខែទៅមួយឆ្នាំ ដើម្បីដឹងពីការវិវឌ្ឍថ្មីរបស់ដើមស្ពង់» ។
តាមបទពិសោធន៍របស់លោកសៀង ហួត ដែលកន្លងមកបានព្យាបាលដើមស្ពង់ជាច្រើនដើមនោះលោកនិយាយថា មានតែដើមស្ពង់ដែលមានសាច់ខ្ចីប៉ុណ្ណោះ ដែលអាចលូតលាស់ល្អឡើងវិញ ចំណែកស្ពង់ចាស់មានអាយុលើសពី១០០ឆ្នាំឡើង លទ្ធភាពលូតលាស់មានតិចតួចបំផុត ។ ស្ពង់ខ្ចី កោសិការបស់វាឆាប់លូតលាស់ជាងស្ពង់ចាស់ ដែលកោសិការបស់វាមួយចំនួនបានងាប់ទៅហើយ ដោយការព្យាបាលគ្រាន់តែពន្យារអាយុកាលរបស់វាប៉ុណ្ណោះ ។
ស្ពង់ជាប្រភេទឈើក្រៅចំណាត់ថ្នាក់មួយ ហើយភាគច្រើនមានដុះនៅតំបន់អង្គរ ។ នៅតំបន់អង្គរ ដើមស្ពង់មានដុះច្រើនជាងគេនៅប្រាសាទតាព្រហ្ម ។ ស្ពង់ជាដើមឈើទាក់ទាញ ចំណែកឫសរបស់វាមួយចំនួនក៏មានផលប្រយោជន៍ការពារ និងទ្រប្រាសាទផងដែរ ៕
ចែករំលែកព័តមាននេះ