មុននេះបន្តិច រសៀលថ្ងៃទី២ ខែសីហា ឆ្នាំ២០២២នេះ មានករណីស្ត្រីម្នាក់បានក្របួច.កអាវបុរសម្នាក់ប្រទីងប្រទង់គ្នាលើដងផ្លូវបេតុង ក្បែររបងមន្ទីរពេទ្យបង្អែក
ខេត្តបន្ទាយមានជ័យ ៖ បើតាមសេចក្តីរាយការណ៍បានឱ្យដឹងថា មុននេះបន្តិច រសៀលថ្ងៃទី២ ខែសីហា ឆ្នាំ២០២២នេះ មានករណីស្ត្រីម្នាក់បានក្របួច.កអាវបុរសម្នាក់ប្រទាញប្រទង់គ្នាលើដងផ្លូវបេតុង ក្បែររបងមន្ទីរពេទ្យបង្អែក ក្រុងប៉ោយប៉ែត ស្ថិតក្នុងភូមិប្រជាធម្មលិច សង្កាត់ផ្សារកណ្តាល ដោយសារតែរឿងបំណុល។
សេចក្តីរាយការណ៍បន្តថា ករណីខាងលើនេះ ដំបូង គេពុំទាន់ដឹងរឿងរ៉ាវ ឬមូលហេតុអ្វីនោះទេ? ប៉ុន្តែក្នុងហេតុការណ៍ភាគីទាំង២ បានឡូឡាប្រកែកយកត្រូវរៀងៗខ្លួន ដោយភាគីខាងបុរសទាមទារឲ្យសងប្រាក់ ខណៈភាគីខាងស្រីទាមទារទៅស្បថ ព្រោះខ្លួនបានសងប្រាក់មួយចំនួនរួចហើយ។ ហើយនៅក្នុងហេតុការណ៍នេះ ខាងស្រីបានឲ្យភាគីខាងប្រុសទុកម៉ូតូនៅនឹងកន្លែង ដើម្បីទៅស្បថជាមួយគ្នា។
ក្រោយពេលស្តាប់ហេតុផល ទើបដឹងថា រឿងរ៉ាវខាងលើនេះ កើតឡើងដោយសាបំណុល គឺភាគីខាងស្រីដែលក្របួច.កអាវភាគីខាងបុរសដែលជាកូនបំណុលនោះ ព្រោះតែរឿងជំពាក់ប្រាក់។ លុះមួយសន្ទុះក្រោយមក ភាគីទាំង២ទំនងជាចង់បានហេតុផលត្រឹមត្រូវ ក៏បញ្ឈប់ជម្លោះ ហើយទាញម៉ូតូ និងកង់អាគុយ ជិះទៅទិសខាងកើតស្របគ្នាប្រហែលជាទៅផ្ទះ ឬទៅប៉ុស្តិ៍ ដើម្បីរកខុសត្រូវរៀងៗខ្លួនហើយ។
ប៉ុន្តែមុនពេលចេញពីកន្លែងកើតហេតុ មិនដឹងថា តើភាគីកូនបំណុលនិយាយយ៉ាងដូចម្តេចទេ? ទើបបុរសម្ចាស់បំណុលព្រឡយសំដីថា «ថតចុះសមមុខហើយ អ្នកជំពាក់លុយគេ» ខណៈស្ត្រីកូនបំណុលបានសុំឲ្យអ្នកយកព័ត៌មានលុបរូបចេញវិញ ។ ពេលដឹងថា អ្នកថតរូបជាអ្នកយកព័ត៌មានស្ត្រីរូបនេះ បានប្រាប់ការពិតថា ការដែលគាត់ក្របួច.កអាវបុរសខាងលើ ព្រោះខឹងនឹងបុរសរូបនោះប្រុងដកសោកង់អាគុយរបស់គាត់ ហើយចោទថា គាត់មិនទាន់សងប្រាក់។
ស្ត្រីរូបនេះនិយាយថា កន្លងមក គាត់ជំពាក់ប្រាក់បុរសខាងលើ ចំនួន១ម៉ឺនបាតប្រាក់ថៃ ហើយថា រឿងរ៉ាវនេះដោយសារសម័យកូវីដ គាត់រកមិនបាន ម្ចាស់បំណុលបានដាក់ពាក្យប្តឹងគាត់ទៅប៉ុស្តិ៍រដ្ឋបាលរួចហើយ ហើយគាត់ក៏សន្យាសងប្រាក់តាមលទ្ធភាពផងដែរ។
ស្ត្រីរូបនេះបន្តថា ប្រាក់ដែលម្ចាស់បំណុលរករឿងចង់ដកសោកង់អាគុយរបស់គាត់នោះ គាត់បានសងទៅឲ្យប្រពន្ធម្ចាស់បំណុលរួចទៅហើយ ហើយគាត់ថារឿងជំពាក់ប្រាក់សងប្រាក់ មិនត្រូវមករកដកសោកង់អាគុយគាត់ដូចចោរនោះទេ។
ជុំវិញករណីខាងលើនេះ ភាគីបុរសជាម្ចាស់បំណុលមិនអាចទាក់ទងសុំបំភ្លឺបានទេ ដោយសារក្រោយពេលកើតហេតុ គឺគាត់បានជិះម៉ូតូចេញបាត់ទៅហើយ៕
ចែករំលែកព័តមាននេះ