រាជធានីភ្នំពេញ ៖ អតីតហ្រេ្វស៊ីហ្គើលនាងរ៉ូ ចាន់ដារ៉ា ហៅស្រីលាភ សម្រេចបញ្ចប់ភាពនៅលីវរបស់ខ្លួន និងប្រកាសរៀបមង្គលការនៅដើមឆ្នាំ២០១៧ នេះជាមួយបុរសវ័យក្មេងជាអាណិកជនខ្មែរនៅអាមេរិក ។
ការប្រកាសកំណត់ពេលរៀបការរបស់ស្រីស្អាត រ៉ូ ចាន់ដារ៉ា នេះ បន្ទាប់ពីប៉ុន្មានថ្ងៃកន្លងមកលេចធ្លាយរូបថតពិធីភ្ជាប់ពាក្យរបស់នាងតាមហ្វេសប៊ុក ដែលពិធីនេះធ្វើឡើងតាំងពីដើមឆ្នាំ២០១៦មកម្ល៉េះ ប៉ុន្តែនាងព្យាយាមលាក់បាំង ។
នាងរ៉ូ ចាន់ដារ៉ា បញ្ជាក់ថា ពិធីមង្គលការរបស់នាងនឹងរៀបចំធ្វើឡើងនៅថ្ងៃទី២៥ ខែមីនា ឆ្នាំ២០១៧ នៅកោះពេជ្រ អគារA ក្នុងនោះនាងបានញ្ជើញភ្ញៀវចូលរួមប្រមាណ៨០ទៅ១០០តុ ។
មួយរយៈចុងក្រោយនេះនាងមិនសូវចេញថតច្រើនឡើយ ព្រោះទុកពេលវេលាដើម្បីត្រៀមខ្លួនធ្វើជាកូនក្រមុំនៅក្នុងថ្ងៃពិសេសរបស់ខ្លួន ។
គូដណ្តឹងរបស់នាងឈ្មោះយឹម យ៉ាន់សីហា ជាបុរសខ្មែររស់នៅសហរដ្ឋអាមេរិក។ ពួកនាងស្រឡាញ់គ្នាជាង២ឆ្នាំហើយ។
បើទោះបីជារ៉ូ ចាន់ដារ៉ា មិនបានបង្ហើបប្រាប់ច្បាស់អំពីថ្លៃបណ្ណាការដែលខាងប្រុសផ្តល់ជូនតែនាងទទួលស្គាល់ថា គឺខាងប្រុសបានជូនដល់នាងច្រើនគួរសមទាំងគ្រឿងអលង្ការ និងការរៀបចំពិធីទាំងមូលដែលមានតម្លៃរាប់ម៉ឺនដុល្លារ ។
នាងរ៉ូ ចាន់ដារ៉ា ទំនងជាបញ្ចប់អាជីពសិល្បៈនៅពេលរៀបការរួច ព្រោះនាងនឹងចាកចេញទៅរស់នៅជាមួយស្វាមីនៅសហរដ្ឋអាមេរិក ។
ដំណឹងរៀបមង្គលការរបស់នាងរូ៉ ចាន់ដារ៉ា មានប្រិយមិត្តជាច្រើនសម្តែងការអបអរសាទរ ជាពិសេសអ្នកសិល្បៈដូចគ្នាក៏បានផ្ញើសារអបអរសាទរដែរ ។
នាងរ៉ូ ចាន់ដារ៉ា ហៅស្រីលាភ ត្រូវគេស្គាល់តាមរយៈការសម្តែងក្នុងខ្សែភាពយន្តរឿង «អត់ខ្វល់សំខាន់អូនស្អាត» និងរឿង«សាកលវិទ្យាល័យកំណើតស្នេហ៍» ក្រោយពេលខ្សែភាពយន្តនោះចាក់បញ្ចាំងរួចមក កេរ្តិ៍ឈ្មោះរបស់ស្រីលាភកាន់តែរន្ទឺនៅក្នុងពិភពសិល្បៈហើយមានបណ្តាផលិតកម្មនានា ហៅនាងថតជាហូរហែ ៕
ចែករំលែកព័តមាននេះ