រាជធានីភ្នំពេញ ៖ បន្ទាប់ពីចូលរោងការបានជិតមួយឆ្នាំមកនេះ តារាចម្រៀងលោកកែវ វាសនា និងភរិយាបានកូនប្រុសមួយហើយកាលពីថ្ងៃទី២ មករា ២០១៧ ដោយការវះកាត់នៅមន្ទីរពេទ្យឯកជនទំនើបមួយ ។
តារាចម្រៀងលោកកែវ វាសនា បានបង្ហាញរូបភាពកូនប្រុសរបស់ខ្លួនដែលទើបចាប់កំណើតឃើញពន្លឺថ្ងៃតាមហ្វេសប៊ុករបស់លោកជាមួយសារដ៏ខ្លីថា «ស្វាគមន៍សមាជិកថ្មី»។
តារាចម្រៀងលោកកែវ វាសនា ឱ្យដឹងថា កូនប្រុសរបស់លោកដាក់ឈ្មោះ «Chy Fu» កើតមកមានទម្ងន់៤,២គីឡូក្រាម ។ ដោយសារតែកូនរបស់លោកថ្លោសបែបនេះ ទើបវះកាត់ដើម្បីសម្រួលដល់ភរិយារបស់លោក និងកូននៅក្នុងផ្ទៃ ហើយរហូតមកដល់ពេលនេះទាំងម្តាយ និងកូនមានសុខភាពល្អ ។
បន្ទាប់ពីបង្ហោះរូបភាពកូនដែលទើបចាប់កំណើតនេះរួចមក មានមិត្តភក្តិទាំងក្នុង និងក្រៅសិល្បៈជាច្រើនបានសម្តែងការអបអរសាទរជាមួយនឹងប្រិយមិត្តអ្នកគាំទ្ររបស់លោកផងដែរ ។
តារាចម្រៀងលោកកែវ វាសនា បានរៀបមង្គលការជាមួយកូនអ្នកជំនួញធំម្នាក់នៅស្រុក មង្គលបុរី ខេត្តបន្ទាយមានជ័យ កាលពីអំឡុងខែឧសភា ឆ្នាំ២០១៦ ជាមួយថ្លៃបណ្ណាការជូនទៅគ្រួសារខាងស្រីចំនួនជាង៤ម៉ឺនដុល្លារអាមេរិក ។
លោកកែវ វាសនា ធ្លាប់បានបង្ហើបពីរឿងរ៉ាវស្នេហារបស់លោកថា លោកបានស្គាល់គ្នាជាមួយភរិយាជាង៨ឆ្នាំមុនមង្គលការកើតឡើងក្នុងនោះលោកបានស្គាល់ដំបូងក្នុងពិធីរៀបអាពាហ៍ពិពាហ៍មួយនៅឯស្រុកមង្គលបុរី ខេត្តបន្ទាយមានជ័យ ដែលជាស្រុកកំណើតភរិយារបស់លោកតែម្ដងគ្រាដែលពួកលោកចូលរួមមង្គលការនោះជាមួយគ្នា ។
តារាចម្រៀងមានដើមកំណើតមកពីខេត្តកំពង់ឆ្នាំងរូបនេះបញ្ជាក់ថា ចាប់តាំងពីកសាងស្នេហារហូតដល់ចាស់ទុំទាំងសងខាងដឹងឮមក លោកមិនដែលទម្លាយឲ្យមហាជនដឹងឡើយក៏ព្រោះតែក្រុមគ្រួសារទាំងសងខាង មិនចង់ឃើញសារព័ត៌មានចុះផ្សាយពីជីវិតឯកជនរបស់លោក ។
កូនប្រុសរបស់លោកកែវ វាសនា និងភរិយាដែលកើតមកនេះចំពេលលោកទើបតែសាងសង់ផ្ទះវីឡាមួយតម្លៃជាង២០ម៉ឺនដុល្លារ ។
ចំណងអាពាហ៍អាពាហ៍របស់តារាចម្រៀងលោកកែវ វាសនា ត្រូវគេគិតថា នឹងរឹតតែចាក់គ្រឹះរឹងមាំឡើង បន្ទាប់ពីមានកូនប្រុសមួយនេះ ។ ប៉ុន្តែអាជីពសិល្បៈចម្រៀងរបស់លោកអាចនឹងរីកលូតលាស់បន្តទៀត ឬយ៉ាងណានោះ នៅមិនទាន់អាចស្មានបានទេ ៕
ចែករំលែកព័តមាននេះ