រាជធានីភ្នំពេញ ៖ តាមរយៈជំនួបជាមួយថ្នាក់ដឹកនាំក្រសួងទេសចរណ៍កម្ពុជា ភាគីសិង្ហបុរីបានសន្យាបន្តជួយគាំទ្របច្ចេកទេស ហើយនឹងបញ្ជូនគ្រូមកបង្វឹកកីឡាករកម្ពុជាលើជំនាញកីឡាបាល់គប់ក្នុងទឹក (Water Polo) ដើម្បីត្រៀមខ្លួនក្នុងការចូលរួមប្រកួតក្នុងព្រឹត្តិការណ៍ស៉ីហ្គេម ឆ្នាំ២០២៣ នៅកម្ពុជា។ ការលើកឡើងនេះធ្វើឡើងនាព្រឹកថ្ងៃទី២៦ ខែកក្កដា ឆ្នាំ២០២២ នៅទីស្ដីការក្រសួងទេសចរណ៍ ភាគីកម្ពុជាដោយដឹកនាំដោយលោក ទិត ចន្ថា រដ្ឋមន្ត្រីស្ដីទីក្រសួងទេសចរណ៍ ភាគីសិង្ហបុរីដឹកនាំដោយលោក ថុង អេដវីន រដ្ឋមន្ត្រីក្រសួងវប្បធម៌ សហគមន៍ និងយុវជនសិង្ហបុរី។
![](https://kohsantepheapdaily.com.kh/wp-content/uploads/2022/07/ff0129d41421b57f7ceef3f64b1063e2.jpg)
ក្រោយបញ្ចប់ជំនួប លោក វ៉ាត់ ចំរើន រដ្ឋលខាធិការក្រសួងទេចរណ៍ និងជាអគ្គលេខាធិការគណៈកម្មាធិការជាតិអូឡាំពិកកម្ពុជា បានលើកឡើងថា ភាគីសិង្ហបុរីបានសន្យាបង្កើនការបង្វឹក និងបង្កើនគុណផលកីឡាបាល់គប់ក្នុងទឹក (Water Polo) ដែលសិង្ហបុរីមានកម្រិតបច្ចេកទេសល្អ និងមានឧត្តមភាពក្នុងតំបន់ដែរ។ លោកអគ្គលេខាធិការបានបន្តថា ចំពោះកីឡាបាល់គប់ក្នុងទឹកនៅកម្ពុជានេះ គឺស្ថិតក្រោមសហព័ន្ធកីឡាហែលទឹកកម្ពុជា ដែលមានទេសរដ្ឋមមន្ត្រី ស៊ុន ចាន់ថុល ជាប្រធាន។
![](https://kohsantepheapdaily.com.kh/wp-content/uploads/2022/07/1fd92ae07335fc8471621762a6765c76.jpg)
លោក វ៉ាត់ ចំរើន បានបញ្ជាក់ទៀតថា កន្លងមកសហព័ន្ធកីឡាហែលទឹកកម្ពុជាបានរៀបចំក្រុមកីឡាករដើម្បីត្រៀមចូលរួមហ្វឹកហាត់ជាមួយគ្រូជំនាញមកពីសិង្ហបុរីម្នាក់ (អតីតកីឡាករដ៏ល្បីរបស់សិង្ហបុរី) ដែលនឹងបញ្ជូនមកពេលក្រោយ ហើយនឹងមានការជួយគាំទ្រផ្នែកបច្ចេកទេសពីសិង្ហបុរី ក្នុងនោះក៏នឹងបញ្ជូនកីឡាករកម្ពុជាទៅហ្វឹកហាត់នៅសិង្ហបុរីផងដែរ។ បើតាមលោកអគ្គលេខាធិការ ការជួយគាំទ្រពីភាគីសិង្ហបុរីនេះគឺមានសារសំខាន់ណាស់សម្រាប់កីឡាករកម្ពុជា ក្នុងការត្រៀមខ្លួនចូលរួមប្រកួតក្នុងព្រឹត្តិការណ៍កីឡាស៊ីហ្គេម ឆ្នាំ២០២៣។ លោក វ៉ាត៉ ចំរើន បានបន្តទៀតថា ក្រៅពីកីឡាបាល់គប់ក្នុងទឹកនេះ ភាគីសិង្ហបុរីក៏បានសន្យាជួយបណ្ដុះបណ្ដាលផ្នែកកីឡាបាល់ទាត់លើក្ដារ (Teqball) ដល់កម្ពុជាទៀតដែរ ដើម្បីដាក់បញ្ចូលក្នុងកម្មវិធីកីឡាសម្ដែង (មិនមែនជាកីឡាប្រកួតទេ)។
![](https://kohsantepheapdaily.com.kh/wp-content/uploads/2022/07/f8e72f5d02e6f303c9b633f91a2230c1.jpg)
លោករដ្ឋលេខាធិការក៏បានរំលឹកផងដែរថា កិច្ចសហប្រតិបត្តិការ ការគាំទ្រ និងជួយគ្នាទៅវិញទៅមក្រវាងកម្ពុជា និងសិង្ហបុរីខាងលើនេះ គឺធ្វើឡើងតាមរយៈការចុះអនុស្សរណៈនៃការយោគយល់គ្នា (MOU) រវាងគណៈកម្មាធិការជាតិអូឡាំពិកកម្ពុជាជាមួយគណៈកម្មាធិការជាតិអូឡាំពិកសិង្ហបុរី នៅឆ្នាំ២០១៧ ដើម្បីជួយគ្នាទៅវិញទៅមកលើផ្នែកបច្ចេកទេស និងជំនាញកីឡាផ្សេងទៀត៕ ដោយ ៖ សុខ សារ៉ាយ
ចែករំលែកព័តមាននេះ