ខេត្តបាត់ដំបង៖ សេចក្ដីរាយការណ៍ឱ្យដឹងថា កម្លាំងកងរាជអាវុធហត្ថបានជួយសង្គ្រោះសត្វទន្សោងមួយក្បាល ដែលជាប់អន្ទាក់ព្រានព្រៃ កាលពីវេលាម៉ោង៤រសៀលថ្ងៃទី២៩ ធ្នូ ស្ថិតនៅចំណុចដាពង្រ ក្នុងភូមិសាស្ត្រ ឃុំបាសាក់ ស្រុករុក្ខគិរី ។
មន្ត្រីអាវុធហត្ថបានឱ្យដឹងថា សត្វទន្សោងនោះនៅរស់ ដែលទំនងទើបជាប់អន្ទាក់ព្រានព្រៃ ។ ប្រពលរដ្ឋបានប្រទះឃើញសត្វដ៏កម្រនោះកំពុងលោតចំប្រាវ ដោយសារជាប់អន្ទាក់ព្រាននៅក្នុងព្រៃ ហើយក៏បានរាយការណ៍ប្រាប់កម្លាំងកងរាជអាវុធហត្ថ ដើម្បីឲ្យជួយសង្គ្រោះ។
បើតាមសេចក្ដីរាយការណ៍ពីប្រជាពលរដ្ឋបានឱ្យដឹងថា សត្វទន្សោងនោះទំនងទើបជាប់អន្ទាក់ ទើបម្ចាស់អន្ទាក់មិនដឹង តែបើម្ចាស់ដឹងប្រហែលសត្វព្រៃដ៏កម្រមួយក្បាលនេះ មិនអាចនៅរស់ទេ ។ ប្រភពដដែលបន្តថា គេនៅមិនទាន់ស្គាល់អត្តសញ្ញាណម្ចាស់អន្ទាក់នោះទេ តែគេសង្ស័យ អាចជាមនុស្សរស់នៅក្នុងមូលដ្ឋាននេះតែម្ដង ។
អ្នកភូមិបញ្ជាក់ថា សត្វព្រៃនៅតំបន់នោះកំពុងរងការបាញ់សម្លាប់ និងជាប់អន្ទាក់របស់ព្រានព្រៃ ជារៀងរាល់ថ្ងៃដោយគ្មានការទប់ស្កាត់ ឬចុះបង្ក្រាបពីសមត្ថកិច្ច ឬមន្ត្រីជំនាញឡើយ។ មិនតែប៉ុណ្ណោះ មានកន្លែងខ្លះ ជនទុច្ចរិតបានប្រើប្រាសខ្សែរចរន្តអគ្គិសនីដាក់ពង្រាយក្នុងព្រៃ ដើម្បីឆក់សត្វព្រៃគ្រប់ប្រភេទទៀតផង ហើយកន្លងមកក៏ធ្លាប់ឆក់មនុស្សស្លាប់ផងដែរ។
មន្ត្រីកងរាជអាវុធហត្ថស្រុករុក្ខគិរីបានឲ្យដឹងថា ក្រោយពីសង្គ្រោះចេញពីអន្ទាក់ព្រានព្រៃ កម្លាំងកងរាជអាវុធហត្ថបានដឹកសត្វទន្សោងនោះទៅរក្សាទុកនៅសាលាឃុំបាសាក់ហើយ ដើម្បីប្រគល់ឲ្យមន្ត្រីព្រៃឈើ ប៉ុន្តែរហូតដល់ពេលនេះ គេនូវមិនទាន់ដឹងថា សត្វទន្សោងនោះ ត្រូវគេប្រគល់ឲ្យមេព្រៃហើយ ឬនៅនោះទេ ។
ចែករំលែកព័តមាននេះ