រាជធានីភ្នំពេញ ៖ ផ្ការំដួល ដែលជាប្រភេទផ្កា «តំណាងឱ្យកម្ពុជា» កំពុងក្លាយជាប្រធានបទយ៉ាងក្តៅគគុក ជជែកដេញដោលពេញបណ្តាញសង្គមខ្មែរ រាប់ចាប់ពីមហាជនទូទៅ និងអ្នកសិល្បៈនោះ គឺដោយសារតែ «ផ្ការំដួលដែលជាផ្កាតំណាងជាតិខ្មែរ» ត្រូវបានបង្ហាញនៅក្នុងភាពយន្តថៃ ដែលសម្តែងដោយនាង ប៊ែលឡា រ៉ានី និងតារាប្រុសថៃ ក្នុងថ្មីរបស់ថៃ។
កញ្ញា ឌួង ហ្សរីដា ពិធីការិនី តារាសម្តែង និងបច្ចុប្បន្នជាថៅកែស្រីរបស់ផលិតផលថែរក្សាសម្រស់ក៏ហាក់មិនសប្បាយចិត្តចំពោះរឿង «ផ្ការំដួល» នេះផងដែរ។ នាងបានទម្លាយថា ធ្លាប់ផ្សព្វផ្សាយ «ផ្ការំដួលខ្មែរ» រយៈពេល១០ឆ្នាំមកហើយ តែគ្មានអ្នកចាប់អារម្មណ៍ ដូចរឿងថៃសោះ។
ស្រីស្រស់សម្រស់កាន់តែក្មេងជាងវ័យ នាង ឌួង ហ្ស៊ូរីដា បានឱ្យដឹងថា ការផ្សព្វផ្សាយ «ផ្ការំដួលខ្មែរ» តាមរយៈការបញ្ចូលទៅក្នុងការច្នៃម៉ូតសម្លៀកបំពាក់ហាងរបស់នាងរយៈពេលប្រមាណ១០ឆ្នាំមកហើយ ប៉ុន្តែគ្មានអ្នកចាប់អារម្មណ៍យកទៅផ្សព្វផ្សាយ និងចែករំលែកអោយបានទូលំទូលាយនោះឡើយ។ ការណ៍ដែលនាងចេញមុខមកនិយាយ «រឿងផ្ការំដួល» នេះ បន្ទាប់ពីប៉ុន្មានថ្ងៃចុងក្រោយនេះ មហាជន អ្នកលេងបណ្តាញសង្គមហ្វេសប៊ុកបាននាំគ្នាចាប់អារម្មណ៍ និងបានចែកចាយរូបភាព POSTER រឿងភាគថៃមួយ ដែលបានភ្ជាប់នូវរូបភាព និងគំនិតបង្ហាញ «ផ្ការំដួល» ហើយវាបានក្លាយជាប្រធានបទជជែកវែងញែកគ្នាពេញហ្វេសប៊ុក ត្បិតផ្ការំដួល គឺជាផ្កាតំណាងឲ្យប្រទេសកម្ពុជា។
ដោយសារឃើញមានការចែកចាយ និងជជែកវែងញែកយ៉ាងផលផុសពេញបណ្តាញសង្គមជុំវិញ បញ្ហាខាងលើនេះ ឌួង ហ្ស៊ូរីដា ក៏បានចេញមុខនិយាយរឿងផ្ការំដួលនេះ ខណៈពេលដែលនាងក៏ធ្លាប់បានចូលរួមផ្សព្វផ្សាយពាក់ព័ន្ធផ្ការំដួលនេះ ប្រមាណជា១០ឆ្នាំមកហើយ ប៉ុន្តែមិនសូវឃើញមានការចាប់អារម្មណ៍ និងចូលរួមផ្សព្វផ្សាយដូចករណីខាងលើនេះឡើយ។
តាមរយៈរូបភាពចាស់ៗមួយចំនួនដែលហាងរបស់នាងបានឆ្នៃដោយភ្ជាប់ជាមួយនឹងផ្ការំដួលនាពេលកន្លងមកនោះ ឌួង ហ្ស៊ូរីដា បានភ្ជាប់ជាមួយនឹងសារថា ២០១២ ដល់ ២០២២ រយៈពេល១០ឆ្នាំគត់ ដែលម្ចាស់ហាង ដាណាម៉ា កាត់ដេរ ដូចជារូបនាងខ្ញុំបានច្នៃម៉ូតរ៉ូប ឬឈុតបុរាណខ្មែរ ភ្ជាប់ជាមួយអត្តសញ្ញាណជាតិខ្មែរ «ផ្ការំដួល» ផ្កាតំណាងជាតិ។
នាងបញ្ជាក់ថា សួរថាមានបងប្អូនខ្មែរប៉ុន្មានរូបដែលធ្លាប់ខមីនសរសើរ ឬជួយស៊ែរយើងខ្ញុំអត់ ? តែពេលឃើញគេផុស រូបផ្កាជាតិឯងទាំងមិនយល់ពី Concept សាច់រឿងគេផង និយាយពីនាំគ្នាផុស ស៊ែរ ដាច់ដៃ ផលប្រយោជន៍ គឺធ្វើអោយគេកាន់តែល្បី ងាកមកខ្លួនបានត្រឹមជាតួច្រណែនឈ្នានីស។ នាងបន្ថែមថា សុំបានទេ កូនខ្មែរគ្រប់គ្នាប្រើការគោរពស្រឡាញ់អ្វីដែលជាវប្បធ៌ម អរិយធម៌ជាតិ ចេញពីបេះដូង មិនមែនឆន្ទៈកើតឡើងដូចភ្លើងចំបើងទេ…!។
បើតាម ឌួង ហ្ស៊ូរីដា សួរថា អ្នកមានលុយរាប់សិបលានដុល្លារ ផ្ទះវីឡា ដីធ្លីធំៗក្នុងប្រទេស មានប៉ុន្មាននាក់ ដែលក្នុងបរិវេណភូមិគ្រឹះរបស់លោកអ្នកមានដាំដើមផ្ការំដួលខ្មែរនោះ? ហើយកុំនិយាយថា «រំដួល» ជាផ្កាព្រៃ ពិបាកដាំនៅដីក្រុងណា ព្រោះសូម្បីដីក្នុងផ្ទះដ៏តូចតាច មានដីមិនដល់១០ម៉ែត្រផង ខ្ញុំឆ្លៀតដាំបានមួយដើម ហើយផ្ការាល់ឆ្នាំ ចុះលោកអ្នកមានដីរាប់ហិចតាវិញ? សាកដាំដើមផ្ការំដួលមួយម្នាក់មើល អោយប្រទេសកម្ពុជា ងាកទៅទិសណា ក៏មានតែផ្កាតំណាងជាតិ មិនមែនមានតែនៅសៀមរាបណា យ៉ាងណា ឌួង ហ្ស៊ូរីដា បានស្នើឲ្យមហាជនចូលរួមទាំងអស់គ្នា រក្សាការពារ នូវអ្វីដែលយើងធ្លាប់មាន កំពុងមាន ហើយកុំអោយបាត់បង់ទើបនាំគ្នាស្តាយក្រោយ។
ចំណែកអ្នកលេងបណ្តាញសង្គមខ្លះទៀត បានចែករំលែកនូវការយល់ឃើញថា «ប្រជាជនយើងមួយចំនួន តែងធ្វើជាឧបករណ៍ផ្សព្វផ្សាយឲ្យគេទទេៗ រហូតឥឡូវផ្ទុះការតវ៉ារឿងផ្ការំដួល ពេលឃើញហើយវិលមុខ ដៀលថាគេចោររហូត តែសួរថា ៖
-រឿងហ្នឹងចាក់បញ្ចាំង តើទៅមើលទេ? មិនឲ្យខកខានឡើយ!
-ចង់ទៅថៃលេងទេ? ចង់
-មានលុយល្មមៗចង់ព្យាបាលជំងឺនៅឯណា? ថៃ
-ប្រើរបស់ថៃល្អទេ? ចូលចិត្តប្រើទេ? ល្អ ចូលចិត្តខ្លាំងណាស់
-ម្ហូបថៃឆ្ងាញ់ទេ? ឆ្ងាញ់ យកមកលក់នៅខ្មែរដាច់ទេ? ដាច់
-រឿងថៃល្អមើលទេ? ចូលចិត្តមើលទេ? ល្អមើល ជក់ចិត្ត
-តារាថៃស្អាត ឆ្លាតពូកែសម្ដែង ស្រលាញ់ទេ? ស្រលាញ់ពេញបេះដូង តាមដានគ្រប់រឿងរ៉ាវ គ្រប់សកម្មភាព ស្អប់ថៃដល់ថ្នាក់ហ្នឹង បើប្រាប់ឲ្យឈប់ធ្វើរឿងខាងលើ តើឈប់ទេ? អត់! »។
អ្នកលេងបណ្តាញសង្គមម្នាក់បានពោលថា «អ្វីដែលខ្ញុំសង្កេតឃើញ រឿងស្នេហាវប្បធម៌ សិល្បៈ អីទាំងអស់ហ្នឹងមិនសូវទេ! និយាយឲ្យចំយើងគ្រាន់តែច្រណែនដែលគេធ្វើបានល្អជាងយើង ប្រសើរជាងយើងស្ទើរតែគ្រប់យ៉ាង។ យើងគ្មានសំអាងអ្វី ដើម្បីយកប្រៀបលើគេក្រៅពីដៀលថា គេចោរទេ! តែសួរថាសព្វថ្ងៃយើងយកអ្វីពីថៃខ្លះ (ម៉ូតវីឡា ផ្ទះបុរាណ សម្លៀកបំពាក់ គ្រឿងប្រើប្រាស់ អាហារ ដន្ត្រី រឿងកុន) គឺស្ងាត់មាត់ដូចគេចុក!»។
ម្ចាស់គណនីហ្វេសប៊ុកដដែលបានបន្តថា «ផ្នត់គំនិតយើងនៅវិលវល់ក្នុង៥០០-៦០០ ឆ្នាំមុនដែលនៅតែយល់ថា ថៃគ្មានអ្វីទេ តែថៃពេលនេះគឺខ្លាំងជាងយើងឆ្ងាយណាស់! យើងឯណេះទេ ដែលដេកស៊ីកេរ្តិ៍ឈ្មោះដូនតារាល់ថ្ងៃ គ្មានបង្កើតអ្វីថ្មីៗ ក្រៅពីនាំចូល និងចំលងពីបរទេស។ ហើយបើរបស់ដូនតាវិញ គឺយកមកដាក់ទាំងដុល សំណង់អគារចាប់ផ្គុំៗមិនប្រើគំនិតច្នៃថ្មីទេ។ សរសេរនេះ មិនមែនមើលងាយខ្មែរ ឬឲ្យតាំងចិត្តស្អប់គេទេ តែត្រូវចេះថ្លឹងថ្លែងចំណុចខ្លាំងខ្សោយរបស់ខ្លួន។
ម្យ៉ាងទៀត គ្រាន់តែចង់ប្រាប់ថាសព្វថ្ងៃ យើងចេះតែតាមដានរឿងរ៉ាវផិតក្បត់ ហែកហួរគ្នា ជេរប្រទេច អនាចារតែប៉ុណ្ណោះ។ បើការងារសាច់ការ ក្លាយជាសាច់កា.ប់អស់ហើយ បើដាក់ប៊ីយែរត្រជាក់ៗទៅ គឺត្រូវគ្នាណាស់។ អ្នចេះមានចំណេះគ្មានអ្នកប្រើ បើប្រើឲ្យតម្លៃថោកដូចព្រលិត បញ្ញវន្ដមួយចំនួនវេចបង្វេចទៅស្រុកគេធ្វើការ អ្នករៀនចប់ក៏មិនវិលវិញ ព្រោះមកដល់ចំណេញតែរឿងខ្លោចផ្សា»។
ចែករំលែកព័តមាននេះ