រាជធានីភ្នំពេញ ៖ តារាចម្រៀងអ្នកនាងម៉េង កែវពេជ្ជតា បានតបតជាមួយមន្ត្រីក្រសួងវប្បធម៌ និងវិចិត្រសិល្បៈមួយរូបតាមហ្វេសប៊ុក នាពេល ថ្មីៗកន្លងមក បន្ទាប់ពីនាងបញ្ចេញមតិពាក់ព័ន្ធនឹងរូបភាពមួយសន្លឹកដែលស្តែងឲ្យឃើញមនុស្សមួយក្រុមស្លៀកពាក់បុរាណនាំគ្នារាំបទសម័យយ៉ាងខុសទំនង ។
អ្នកនាងម៉េង កែវពេជ្ជតា ចាត់ទុកសកម្មភាពនោះ គឺជាការជាន់ឈ្លីតម្លៃវប្បធម៌ខ្មែរយ៉ាងអាម៉ាស់ ។ ដោយឡែករដ្ឋលេខាធិការក្រសួងវប្បធម៌មួយរូបអះអាងថា ពុំគួរផ្តោតការយកចិត្តទុកដាក់ទៅលើរឿងដែលមិនទាន់មានប្រភពច្បាស់លាស់នោះពេកទេ ។
បន្ទាប់ពីការផ្តល់មតិផ្ទុយគ្នានេះធ្វើឲ្យអ្នកនាងម៉េង កែវពេជ្ជតា ហាក់មិនសូវសប្បាយចិត្តចំពោះការលើកឡើងពីមន្ត្រីរូបនេះទេ ទើបមានការឆ្លើយឆ្លងគ្នាជុំវិញបញ្ហានេះ ។
បន្ទាប់ពីមានការចុះផ្សាយតាមសារព័ត៌មានមកលោករដ្ឋលេខាធិការក្រសួងវប្បធម៌បានបញ្ចេញសំណេរបង្ហោះនៅលើហ្វេសប៊ុកថា «មានភ្នាក់ងារនៃគេហទំព័រមួយទូរស័ព្ទមកខ្ញុំសុំសម្ភាសន៍ពីករណីដែលឃើញមានការបង្ហោះរូបភាពមួយ…។ ខ្ញុំបានទទួលទូរស័ព្ទរបស់គាត់ដោយការគួរសមតាមសភាវៈជាធម្មតារបស់ខ្ញុំ ហើយក៏បាននិយាយជាមួយគាត់បន្តិចបន្តួចក្នុងន័យសុជីវធម៌នៃការទទួលភ្ញៀវ ថែមទាំងបានបញ្ជាក់ប្រាប់គាត់ថា នេះមិនមែនជាការផ្តល់សម្ភាសន៍ទេ សុំកុំចាត់ទុកជាផ្លូវការ ឬផ្សព្វផ្សាយអី ហើយក៏ពុំគួរផ្តោតការយកចិត្តទុកដាក់ទៅលើរឿងដែលយើងមិនទាន់មានប្រភពច្បាស់ការណ៍នោះពេកដែរ ។
មានអី ! គាត់មានទទួលសំណូមពរយើងឯណា ! គាត់បានយកទៅចុះផ្សាយ ដែលនាំដល់ការយល់ច្រឡំដ៏ធំមួយពីមហាជនយើង ពិសេសពីអ្នកដែលបានតាំងខ្លួនជាអ្នកចេះដឹងខ្លាំងក្លា និងជាអ្នកស្នេហាវប្បធម៌-ប្រពៃណីខ្មែរ ជាឯកលើលោកនេះ ដោយគាត់បានប្រើវោហារស័ព្ទដែលគាត់នឹកស្មានថា ខ្ញុំអាចពុំយល់ពីរបៀបដែលគាត់រុញបាល់ខ្ញុំឲ្យមហាជនដែលគាំទ្រគាត់ទាត់លេង ឬជាន់ឈ្លីដោយសេរីនោះទេមើលទៅ ! sic ។ អ្នកសរសេរគេហទំព័រក៏លេងសម្តីអស់ទាស់ទៀត ប្រើសុទ្ធតែពាក្យ ទំនើបៗដែលអ្នកចេះដឹងតិចតួចដូចខ្ញុំពិបាកយល់ ដូចជាពាក្យថា (កប់ហើយ ម៉េង…! អត់ដឹងកប់អី ?…ដាក់ចំៗឲ្យលោក… រដ្ឋលេខាធិការក្រសួងវប្បធម៌…ក៏អត់ដឹងដាក់ ចំៗអី ? ហើយថា រដ្ឋមន្ត្រីក្រសួងនេះមិនសមរងថ្មបាក់ពីមន្ត្រីថ្នាក់ក្រោមនោះទេ…) ខ្ញុំមិនយល់ពីពាក្យកប់ហើយ ! នេះជាអ្វី? ដាក់ ចំៗឱ្យ… នេះដាក់ស្អី ? បើខ្ញុំគ្រាន់តែជាអ្នកដែលបាន និងកំពុងរួមចំណែកក្នុងសកម្មភាពគ្រប់យ៉ាងដើម្បីអនុវត្តតាមគោលនយោបាយជាតិវិស័យវប្បធម៌ជាត្រីវិស័យប៉ុណ្ណោះនោះ ? » ។
សំណេរនេះធ្វើឲ្យអ្នកនាងម៉េង កែវពេជ្ជតា ឆ្លើយតបតាមហ្វេសប៊ុកថា «មិននឹកស្មានថា គ្រាន់តែបញ្ចេញមតិដើម្បីចង់ការពារវប្បធម៌មិនឱ្យគេចេះតែយកទៅលេងសើចជាន់ឈ្លីសោះ ក៏ធ្វើឱ្យគាត់ក្តៅក្រហាយរហូតដល់កៀរគរគ្នាសុទ្ធតែ ប្រុសៗសំបូរសាច់ដុំមកព័ទ្ធលើកយករឿងអតីតប្តី-ប្រពន្ធគេមកចំអកយ៉ាងផ្អែម មាត់ ។ ចេះនិយាយដើមមនុស្សស្រីទៅកើត ! សើចយំគេអីុចឹងមានធ្លាប់ឱនឆ្លុះទឹកត្រឡោកមើលមុខខ្លួនឯងទេ ថាវាមានដំបៅឃ្លង់ហៀរទឹករងៃប៉ុន្មានកន្លែងដែរ ? លើកខ្លួនសុទ្ធតែជាបណ្ឌិត តែគំនិតងងឹតឈឹង មិនស្គាល់អ្វីជារឿងជាតិ អ្វីជារឿងផ្ទាល់ខ្លួន ។ ចរិតចេញមកឱ្យគេឃើញថា ជាមនុស្សចូលចិត្តឈ្លោះ កាប់ចាក់ និងធ្វើសង្គ្រាម ។ មិនតែប៉ុណ្ណឹងថែមទាំងចង់ធ្វើជាចោរលួចឆ្នាំងបាយគេទៀតមែនក៏អី ? បានតើ ! បើគិតថាវាអាចសម្រាលកំហឹង និងរំសាយក្តីអាម៉ាស់គាត់បាន សូមធ្វើទៅចុះ ធ្វើឱ្យលឿន តែកុំលាក់មុខលួចខាំក្រោយខ្នងឱ្យសោះ សូមធ្វើដោយក្លាហាន បង្ហាញឱ្យអស់មួយទំហឹងទៅដើម្បីឱ្យសាធារណជនបានជូនមេដាយថា លោកពូពិតជាមានឥទ្ធិពលអាចប្តូរមនុស្សលើលោកបាន ! ពានរង្វាន់ក្តិចត្រួយនឹងបានទៅលើលោកពូ និងគ្នីគ្នាហើយ ! សូមឆាប់ឡើង ក្លាហានឡើង មិនតក់ស្លុត មិនភ្ញាក់ផ្អើល។ កូនស្រីលោកតាហ៊ុនម្នាក់នេះមិនដែលខ្លាចសូម្បីបន្តិច ។ ស៊ាំហើយពាក្យគំរាម, គំរាមទាំងជីវិតផង ធ្លាប់ហើយដែលជនកំសាកទាំងខ្ទើយ ទាំងប្រុសទាំងស្រី ទាំងក្របី ទាំងក្រពើដើរតួស្រីស្លូតស្មោះស្នេហ៍ តែអាស្រូវតពូជលួចប៉ែងជើងនិយាយមួលបង្កាច់ក្រោយខ្នងប៉ងឱ្យគេស្អប់ខ្ញុំ ។
មុននេះប៉ុន្មានឆ្នាំ ខ្ញុំបាត់បង់ច្រើនណាស់…ទ្រព្យសម្បត្តិ ការងារ លុយកាក់ ថែមទាំងបងប្រុសដ៏កម្សត់ម្នាក់របស់ខ្ញុំ ក៏ត្រូវជនតិរច្ឆានផ្តាច់ជីវិតទាំងឥតកំហុសក្នុងចេតនាតែមួយគត់ គឺចង់បំបាក់ទឹកចិត្ត បំបាក់ស្មារតី បំផ្លាញត្រកូលសិល្បៈមួយនេះឱ្យខ្ចាត់ខ្ចាយព្រាត់ប្រាស លែងមានមុខលើឆាកសិល្បៈតទៅទៀតនោះឯង ។ ពេលនោះឃើញថា ពួកគេសប្បាយខ្លាំងណាស់ រហូតផ្ញើពាក្យចំអកផ្ចាញ់ផ្ចាលតាមសារព័ត៌មានថាវាជាកម្មពៀរខ្ញុំទេ ដែលធ្វើឱ្យយីអ៊ុនដាក់ ទាំងដែលពួកគេជាអ្នកធ្វើបាបយើងសោះ ។
កាយវិការដ៏អមនុស្សធម៌ គ្មានសុជីវធម៌ក្នុងនាមជាមនុស្សមកលើគ្រួសារខ្ញុំវាអសីលធម៌ និងឃោរឃៅពេកណាស់ ! យើងពិតជាចងចាំទាំងមនុស្ស ទាំងអំពើទាំងនោះ ហើយបានប្រាប់ខ្លួនឯង ប្រាប់បងប្អូន កូនក្មួយ និង ចៅៗឱ្យរឹងប៉ឹង ក្នុងពេលនេះ និងទៅមុខ ។ ក្តិចត្រួយមួយបែកមួយរយមែក ។ ដូច្នេះពាក្យគំរាមគឺពិតជាមិនមានផ្តល់សញ្ញាបរាជ័យដល់យើងឡើយ ។ អរគុណព្រះដែលបណ្តាលឱ្យមនុស្សខូចបង្ហាញមុខ ។
សមត្ថភាព ទេពកោសល្យ កេរ្តិ៍ឈ្មោះ គឺជីដូនជីតា លោកឪពុកអ្នកម្តាយខ្ញុំជាអ្នកឱ្យ ។ ចំណែកក្តីស្រឡាញ់គាំទ្រ គឺបងប្អូនទស្សនិកជនជាអ្នកឱ្យ មិនមែនព្រោះតែបុគ្គលគ្មានសមត្ថភាពម្នាក់នោះមកជួយរុញខ្ញុំទេ តែផ្ទុយទៅវិញ គឺបុគ្គលទាំងនោះទេ ដែលតែងតែព្យាយាមរុញខ្ញុំទម្លាក់ជ្រោះរហូតមក តែគេធ្វើមិនបាន ។
ដូច្នេះសូមលោកអ្នករង់ចាំតាមដានមើលផងថា តើខ្ញុំនឹងកើតរឿងអ្វីខ្លះ ហើយតើឆ្នាំងបាយរបស់ខ្ញុំត្រូវគេដកហូតដោយសារការបញ្ចេញយោបល់មតិការពារវប្បធម៌ ការពារតម្លៃស្ត្រី និងការពារតម្លៃសិល្បៈនេះ ឬយ៉ាងណា? បើពិតជាអីុងមែននោះ បងប្អូនក៏ត្រូវតែដឹងដែរថា វប្បធម៌ខ្មែរគឺត្រូវរលាយត្រឹមពួកគេនេះហើយ គ្មានបរទេសឯណាមកបំផ្លាញខ្មែរ ក្រៅពីខ្មែរគ្នាឯងនេះទេ ហើយឫស្សីក៏គ្មានទំពាំងស្នងទៀតដែរ ព្រោះត្រឹមតែរឿងបញ្ចេញមតិក៏មិនបាន តែបើស្លៀកដូចស្រាត រាំដូចឆ្កួត និងយកវប្បធម៌ប្រពៃណីមកលេងសើច បែរជាលោកពូថាមិនអីទៅវិញ ។ ដូច្នេះបងប្អូនក៏ត្រូវឈប់ខឹងប្រទេសជិតខាងដែលតែងបន្លំចង់ហែកចែកយកផ្នែកវប្បធម៌ខ្មែរ ម្តងបន្តិចៗ ព្រោះតែធ្វើដល់មន្ត្រីវប្បធម៌ឋានៈរដ្ឋលេខាធិការទៅហើយ បែជាមិនស្គាល់អ្វីដែលជាតួនាទី មិនដឹងថា ចាត់ចែងយ៉ាងមេច តើឱ្យប្រជារាស្ត្រស្រែកតែរហូតបានការអីទៅ ? ជាមន្ត្រី តែធ្វើការក្រោយរាស្ត្ររហូត » ៕
ចែករំលែកព័តមាននេះ