ខេត្តបន្ទាយមានជ័យ ៖ មួយរយៈចុងក្រោយនៃខែកក្កដា២០២២នេះ អ្នកដំណើរជាតិនិងអន្តរជាតិដែលឆ្លងកាត់ច្រកទ្វារអន្តរជាតិប៉ោយប៉ែត ខ្លងលឹក ហាក់មានសភាពអ៊ូអរជាងពេលមុនៗ ចាប់តាំងពីច្រកទ្វារខាងលើបានបើកដំណើរការឡើងវិញ កាលពីដើមខែកុម្ភៈ ប៉ុន្តែសម្រាប់កម្មករអូសរទេះវិញ បែរជាថ្ងូរដូចព្រាបរឿងវាយឯកសាចេញ-ចូលឆ្លងព្រំដែន។…
ខេត្តបន្ទាយមានជ័យ ៖ មួយរយៈចុងក្រោយនៃខែកក្កដា២០២២នេះ អ្នកដំណើរជាតិនិងអន្តរជាតិដែលឆ្លងកាត់ច្រកទ្វារអន្តរជាតិប៉ោយប៉ែត ខ្លងលឹក ហាក់មានសភាពអ៊ូអរជាងពេលមុនៗ ចាប់តាំងពីច្រកទ្វារខាងលើបានបើកដំណើរការឡើងវិញ កាលពីដើមខែកុម្ភៈ ប៉ុន្តែសម្រាប់កម្មករអូសរទេះវិញ បែរជាថ្ងូរដូចព្រាបរឿងវាយឯកសាចេញ-ចូលឆ្លងព្រំដែន។
ភ្ញៀវជាតិនិងអន្តរជាតិបានធ្វើដំណើរព្រោងព្រៀតតាមផ្លូវរថភ្លើងមុខកាស៊ីណូ ឆ្ពោះទៅកាន់ច្រកទ្វារ ប៉ុន្តែមិនសូវធ្វើដំណើរតាមផ្លូវជាតិក្នុងច្រកទេ ព្រោះមានសុវត្ថិភាពជាង ។ បើទោះជាបែបនេះក្តី សម្រាប់ពលរដ្ឋដែលគ្មានមុខរបរបានរអ៊ូរទាំថា ពួកគាត់ជួបកាលំបាកផ្នែកជីវភាពខុសពីមុនសម័យកូវីដ ។ រទេះឆាលលី (រទេះដែកតូចៗ)អាចចេញចូលដីថៃរកដឹកទំនិញបាន ខណៈរទេះឈើធំៗមានត្រឹម២ ឬ៣រទេះសម្រាប់ដឹកកាបូបឥវ៉ាន់ឲ្យពលករ ឬភ្ញៀវទេសចរពីចំណុចរង្វង់មូល។
ប៉ុន្តែបានត្រឹមមាត់ខ្លោងទ្វារអន្តរជាតិខ្លងលឹកទឹកដីថៃ គេឲ្យត្រឡប់វិញពោល គឺមិនអាចចូលទៅរកដឹកទំនិញ ឬឥវ៉ាន់នៅផ្សាររុងក្លឿដូចក្រុមរទេះឆាលីបានឡើយ។ ទោះជាយ៉ាងណា ការឆ្លងព្រំដែនចេញ-ចូលដីថៃ តាមច្រកទ្វារអន្តរជាតិប៉ោយប៉ែតខ្លងលឹកមានភាពរលូន សម្រាប់តែភ្ញៀវអន្តរជាតិនិងពលករស្របច្បាប់តែប៉ុណ្ណោះ ។
ផ្ទុយទៅវិញ សម្រាប់ក្រុមកម្មករអូសរទេះបានរអ៊ូរទាំ និងថ្ងូរដូចព្រាបថា នៅមានកាលំបាកព្រោះពេលឆ្លងព្រំដែនម្តងៗត្រូវបំពេញឯកសាបិទបើកម្តង ហើយតម្លៃបំពេញឯកសាចេញចូលនេះម្តងៗដំបូង១០០បាត និងក្រោយមកចុះនៅត្រឹម៥០បាត។ ស្ត្រីអ្នកអូសរទេះឆាលីអាយុ៤២ឆ្នាំម្នាក់រស់នៅសង្កាត់ផ្សារកណ្តាលនិយាយថា បច្ចុប្បន្នមានរទេឆាលីចូលទៅរកដឹកទំនិញនៅផ្សាររុងក្លឿប្រហែលជិត២០ ប៉ុន្តែភាគច្រើនដឹកបានតែឥវ៉ាន់ភ្ញៀវទេសចរបរទេសពោល គឺមិនសូវមានទំនិញឬឥវ៉ាន់របស់ឈ្មួញឬអាជីវករជួលដឹកពីផ្សាររុងក្លឿដូច កាលពីមុនសម័យកូវីដឡើយ ។
ដោយឡែក បុរសវ័យ៤២ឆ្នាំដូចគ្នាម្នាក់លើកឡើងថា ដ្បិតច្រកទ្វារអន្តរជាតិប៉ោយប៉ែតបើកដំណើរការឡើងវិញ ប៉ុន្តែមិនទាន់ទូលំទូលាយហើយកាចេញចូលរកស៊ីនៅផ្សាររុងក្លឿនៅមានភាពលំបាកជាងមុន ព្រោះតែគេតម្រូវឲ្យប្រើប្រាស់លិខិតឆ្លងដែនPass Portនិងប័ណ្ណឆ្លងព្រំដែនBorder Passសម្រាប់ឆ្លងព្រំដែន។
កម្មករអូសរទេះឆាលី២រូបខាងលើ ក៏ដូចជាក្រុមកម្មករផ្សេងៗ និងពលរដ្ឋធ្លាប់ចេញចូលរកស៊ីនៅផ្សាររុងក្លឿអំពាវនាវសុំឲ្យរដ្ឋាភិបាលប្រទេសទាំង២ កម្ពុជា-ថៃអនុញ្ញាតឲ្យប្រើប្រាស់កាតអន្តោប្រវេសន៍ឆ្លងដែនព្រឹកវិលល្ងាចដូចមុនសម័យកូវីដ ទើបជីវភាពពួកគាត់អាចប្រសើរឡើងបាន។
ជុំវិញករណីខាងលើ លោកសេម មករា ប្រធានសេនាធិការនគរបាលអន្តោប្រវេសន៍ច្រកទ្វារអន្តរជាតិប៉ោយប៉ែត មិនអាចទាក់ទងសុំការអត្ថាធិប្បាយបានទេ ដោយទូរស័ព្ទរបស់លោកចុចចូលជាច្រើនដងតែគ្មានអ្នកទទួល ៕
ចែករំលែកព័តមាននេះ