រដ្ឋមន្ត្រីអប់រំ ណែនាំឱ្យបុគ្គលិកអប់រំ គ្រូបង្រៀន និងសិស្សានុសិស្ស នៅសាលារៀនរដ្ឋ និងឯកជន ចាក់វ៉ាក់សាំង ដូសជំរុញ
- ភ្នំពេញ
ភ្នំពេញ៖ ក្នុងលិខិតចុះថ្ងៃទី៥ ខែកក្កដា ឆ្នាំ២០២២ លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា…
ភ្នំពេញ៖ ក្នុងលិខិតចុះថ្ងៃទី៥ ខែកក្កដា ឆ្នាំ២០២២ លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា…
ភ្នំពេញ៖ ក្នុងលិខិតចុះថ្ងៃទី៥ ខែកក្កដា ឆ្នាំ២០២២ លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានលើកឡើងថា ដើម្បីចូលរួមបង្កើនភាពស៊ាំក្នុងសហគមន៍ និងទប់ស្កាត់ការរីករាលដាលនៃជំងឺកូវីដ១៩ ក្រសួងអប់រំ យុវជន និងកីឡា សូមជូនដំណឹងដល់គ្រប់គ្រឹះស្ថានឧត្តមសិក្សា គ្រឹះស្ថានបណ្តុះបណ្តាលគ្រូ មន្ទីរអប់រំ យុវជន និងកីឡា រាជធានី ខេត្ត ការិយាល័យអប់រំ យុវជន និងកីឡា នៃរដ្ឋបាលក្រុង ស្រុក ខណ្ឌ គ្រឹះស្ថានសិក្សាសាធារណៈ និងឯកជន និងសិស្សានុសិស្ស និស្សិត សូមជ្រាបថា គណៈកម្មការចំពោះកិច្ចចាក់វ៉ាក់សាំង កូវីដ១៩ ក្នុងក្របខណ្ឌទូទាំងប្រទេស ( គ.វ.ក ១៩ ) នឹងធ្វើយុទ្ធនាការចាក់វ៉ាក់សាំងកូវីដ១៩ ជូនដល់បុគ្គលិកអប់រំ និងអ្នកសិក្សានៅទូទាំងប្រទេស ដែលធ្លាប់បានចាក់វ៉ាក់សាំង កូវីដ១៩ ដូសមូលដ្ឋាន ឬដូសជំរុញរួច និងមានគម្លាត ចាប់ពី ៤ខែឡើងទៅ។
ដូច្នេះក្រសួងអប់រំ បានក្រើនរម្លឹកដល់បុគ្គលិកអប់រំ នាយក នាយិកា និងសិស្សានុសិស្ស និស្សិតទាំងអស់ ទៅទទួលការចាក់វ៉ាក់សាំង នៅតាមមូលដ្ឋានសុខាភិបាល នៅជិតគ្រឹះស្ថានសិក្សា ឬនៅតាមគ្រឹះស្ថានសិក្សាផ្ទាល់ ចាប់ពីថ្ងៃជូនដំណឹងនេះតទៅ។
ជាមួយគ្នានេះ ក្រសួងអប់រំ យុវជន និងកីឡា ក៏បានក្រើនរម្លឹក សូមឱ្យគ្រឹះស្ថានឧត្តមសិក្សា គ្រឹះស្ថានបណ្តុះបណ្តាលគ្រូ មន្ទីរអប់រំ យុវជន និងកីឡា រាជធានីខេត្ត ការិយាល័យអប់រំ យុវជន និងកីឡា នៃរដ្ឋបាលក្រុង ស្រុក ខណ្ឌ និងគ្រឹះស្ថានសិក្សាសាធារណៈ និងឯកជន បំពេញតារាងស្តីពី បច្ចុប្បន្នភាពនៃការចាក់វ៉ាក់សាំងកូវីដ១៩ និងផ្តល់ផែនការចាក់វ៉ាក់សាំងដល់បុគ្គលិកអប់រំ និងអ្នកសិក្សា ដែលបានចាក់វ៉ាក់សាំង ដូសមូលដ្ឋាន និងដូសជំរុញ រួចផ្ញើមកក្រសួងអប់រំ ( នាយកដ្ឋានសុខភាពសិក្សា) ឱ្យបានមុនថ្ងៃទី១១ ខែកក្កដា ឆ្នាំ២០២២ តាមរយៈតេឡេក្រាម លេខ 099 442 400 កុំបីខាន។
សូមរម្លឹកថា គណៈកម្មការចំពោះកិច្ចចាក់វ៉ាក់សាំង បង្ការជំងឺកូវីដ១៩ បានប្រកាសថា នៅថ្ងៃទី៦ ខែកក្កដា ឆ្នាំ២០២២ តទៅ នឹងចាប់ផ្តើមយុទ្ធនាការចាក់វ៉ាក់សាំងដូសជំរុញដល់កុមារអាយុ ៣ឆ្នាំ ដល់ក្រោម ១២ឆ្នាំ ខណៈដែលកុមារអាយុចាប់ពី ១២ឆ្នាំ ដល់ក្រោម ១៨ឆ្នាំ បានចាប់ផ្តើមយុទ្ធនាការចាក់ដូសជំរុញ កាលពីថ្ងៃទី៤ ខែកក្កដា ឆ្នាំ២០២២៕
ចែករំលែកព័តមាននេះ