ហួសចិត្ត ! ឥឡូវមាននគរបាលក្លែងក្លាយទៀត
ខេត្តកណ្ដាល ៖ បុរស២នាក់ស្លៀកពាក់ឯកសណ្ឋានជានគរបាលជាតិ ហើយតាំងខ្លួនជា នគរបាលអង្គភាពស្រាវជ្រាវបទល្មើសព្រហ្មទណ្ឌកម្រិតតធ្ងន់ ក្រសួងមហាផ្ទៃ …
ខេត្តកណ្ដាល ៖ បុរស២នាក់ស្លៀកពាក់ឯកសណ្ឋានជានគរបាលជាតិ ហើយតាំងខ្លួនជា នគរបាលអង្គភាពស្រាវជ្រាវបទល្មើសព្រហ្មទណ្ឌកម្រិតតធ្ងន់ ក្រសួងមហាផ្ទៃ ត្រូវបានសមត្ថកិច្ចចាប់ខ្លួនកាលពីវេលាម៉ោង៨ និង៣០នាទីព្រឹក ថ្ងៃទី៨ ខែធ្នូ ឆ្នាំ២០១៦ បន្ទាប់ពីបុរសទាំង២នាក់នោះទៅយកលុយពីការដ្ឋានសំណង់សួនកំសាន្តមួយកន្លែងនៅភូមិគម្ពោធស្បូវ ឃុំបែកចាន ស្រុកអង្គស្នួល ។
នគរបាលស្រុកអង្គស្នួលបានឲ្យដឹងថា ជនសង្ស័យដែលឃាត់ខ្លួនបានម្នាក់ឈ្មោះ មឿន សុផល ភេទប្រុស អាយុ៣៨ឆ្នាំ ជនជាតិខ្មែរ មុខរបរគួកជេរដី ទីលំនៅបច្ចុប្បន្ននៅភូមិក្រូច ឃុំរការ ស្រុកកណ្តាលស្ទឹង ខេត្តកណ្តាល និងម្នាក់ទៀតឈ្មោះ ណុប ប៊ុនធីម ភេទប្រុស អាយុ៣៦ឆ្នាំ ជនជាតិខ្មែរ មុខរបរអ្នកកាសែត ជាតិ សែនជ័យ ទីលំនៅបច្ចុប្បន្ននៅភូមិថ្លើក ឃុំពើក ស្រុកអង្គស្នួល ខេត្តកណ្តាល ។ ចំណែកជនរងគ្រោះឈ្មោះ ទឺ លីហ៊ុយ ភេទស្រី អាយុ៣៩ឆ្នាំ ជនជាតិខ្មែរ មុខរបរ អ្នកបកប្រែ និងជាតំណាងម្ចាស់ការដ្ឋានសំណង់ មានទីលំនៅបច្ចុប្បន្ននៅផ្ទះលេខ៨០ បេអឺ០ ផ្លូវលេខ១៤១ ភូមិ៩ សង្កាត់វាលវង់ ខណ្ឌ៧មករា រាជធានីភ្នំពេញ ។
ខណៈពេលចាប់ខ្លួនសមត្ថកិច្ចដកហូតបានវត្ថុតាងរួមមាន ៖ ឯកសណ្ឋាននគរបាលជាតិ (ឯកសណ្ឋានការងារ)១សម្រាប់, អាយឌី២គ្រឿង, នាមប័ណ្ណឈ្មោះ មឿន សុផល (អង្គភាពស្រាវជ្រាវបទល្មើស ក្រសួងមហាផ្ទៃ ព្រហ្មទណ្ឌកំរិតធ្ងន់ ការិយាល័យទី២) ១ដុំ, ខ្នោះដៃ១ និងស្រោមខ្នោះ១, ស្រោមដៃពណ៌ស១គូ, ម៉ូតូ១គ្រឿង ម៉ាកហុងដាឌ្រីម សេ១២៥ ស៊េរីឆ្នាំ២០១៣ ពណ៌ខ្មៅ គ្មានផ្លាកលេខ លេខតួនិងលេខម៉ាស៊ីន ៨៩០២៣២៥, ទូរស័ព្ទដៃ១គ្រឿង ម៉ាកសាំស៊ុងណូតស្រ៊ី (លេខទូរស័ព្ទ 015880726), ប័ណ្ណព័ត៌មាន២ (ណុប ប៊ុនធីម), មួកប៉ារ៉េ១ ពណ៌ខ្មៅមានអក្សរ POLICE ។
សមត្ថកិច្ចបានឲ្យដឹងថា កាលពីថ្ងៃទី០៥ ខែធ្នូ ឆ្នាំ២០១៦ ជនសង្ស័យទាំង២នាក់បានស្លៀកពាក់បន្លំខ្លួនជានគរ បាលមកការដ្ឋានសំណង់របស់ជនរងគ្រោះ ហើយសុំត្រួតពិនិត្យសំណុំបែបបទ និងច្បាប់នានា ដោយតាំងខ្លួនជា នគរបាលអង្គភាពស្រាវជ្រាវបទល្មើសព្រហ្មទណ្ឌកម្រិតតធ្ងន់ ក្រសួងមហាផ្ទៃ ប៉ុន្តែមិនបានជួបជនរងគ្រោះទេ ដោយគ្រាន់តែទុកលេខទូរស័ព្ទផ្ញើរឲ្យជនរង គ្រោះ ។ លុះស្អែកឡើងថ្ងៃទី៦ធ្នូ ជនរងគ្រោះទូរស័ព្ទទៅជនសង្ស័យ ពេលនោះជនសង្ស័យបានទារលុយពីជនរងគ្រោះចំនួន៣០០ដុល្លារ តែជនរងគ្រោះប្រាប់ថា គ្មានលុយតែ សុំត្រឹម៥០ដុល្លារបានហើយ ។ លុះដល់ពេលកើតហេតុ ជនសង្ស័យបានមកយកលុយពីជនរងគ្រោះដល់ការដ្ឋានសំណង់តាមការណាត់ តែជនរងគ្រោះមិនបានឲ្យលុយទេ គឺបានប្តឹងសមត្ថកិច្ចឲ្យហៅជនសង្ស័យទៅសួរនាំ ទើបដឹងថា ជាជនក្លែងបន្លំជានគរបាលដើម្បីជំរិតទារប្រាក់ ។
សមត្ថកិច្ចឲ្យដឹងទៀតថា កន្លងមកជនសង្ស័យទាំង២នាក់ធ្លាប់ប្រព្រឹត្តបទល្មើសក្លែងបន្លំជា នគរបាលជាតិ ដើម្បីជំរិតទារប្រាក់ជាយូរឆ្នាំមកហើយ (ឈ្មោះ មឿន សុផល ៣ឆ្នាំ ឈ្មោះ ណុប ប៊ុនធីម ៤ឆ្នាំ) ប្រព្រឹត្តនៅភ្នំពេញ ខេត្តកំពង់ស្ពឺ និងខេត្តព្រះសីហនុ និងស្រុកអង្គស្នួល ខេត្តកណ្តាល ២លើក ដោយយកលុយកន្លែងកត់ឆ្នោតនៅផ្សារថ្នល់ទទឹងបាន៥០ដុល្លារ ១លើក និងផ្សារអង្គស្នួលបាន៥ដុល្លារ១លើក ។
ក្រោយពេលឃាត់ខ្លួន ជនសង្ស័យ និងវត្ថុតាងត្រូវបានបញ្ជូនទៅអធិការដ្ឋាននគរបាល ដើម្បីចាត់ការបន្តតាមនីតិវិធីច្បាប់ ៕
ចែករំលែកព័តមាននេះ