ខេត្តបន្ទាយមានជ័យ ៖ គួរឲ្យសង្វេគណាស់ ស្ត្រីម្នាក់ព្រោះតែជីវភាពលំបាក ក៏អង្គុយឆ្កឹះខ្យងស្ងោរនៅក្រោមដើមព្រីងមុខផ្ទះ ស្រាប់តែត្រូវរន្ទះបាញ់ឆក់យកជីវិតទាំងមានកូនក្នុងផ្ទៃ០៨ខែម្នាក់ទៅជាមួយ។ ហេតុការណ៍គ្រោះបាតុភូតធម្មជាតិនេះ បានកើតឡើងនៅវេលាម៉ោង០៤និង២០នាទីល្ងាច ស្ថិតនៅភូមិសន្តិភាព ឃុំទួលពង្រ ស្រុកម៉ាឡៃ ខេត្តបន្ទាយមានជ័យ ។
លោកវរសេនីយ៍ឯក បេន សំអាត អធិការនគរបាលស្រុកម៉ាឡៃ បានឲ្យដឹងថា ស្ត្រីរងគ្រោះរូបនេះមានឈ្មោះ បាន លី អាយុ៤៤ឆ្នាំ មានប្តីឈ្មោះ ងួន មិត្ត អាយុ៤៥ឆ្នាំ មានកូនប្រុសស្រីចំនួន៥នាក់ (បើរាប់ទាំងក្នុងផ្ទៃអាយុ៨ខែទៀតនោះ គឺមានកូនចំនួន៦នាក់) មុខរបរជាកសិករ មានជីវភាពក្រីក្រ រស់នៅភូមិសន្តិភាព ឃុំទួលពង្រ ស្រុកម៉ាឡៃ ខេត្តបន្ទាយមានជ័យ ។
លោកអធិការបានបញ្ជាក់ថា តាមការបំភ្លឺពីឈ្មោះ មួង មុល ភេទប្រុស អាយុ១២ឆ្នាំ ជាកូន បានរៀបរាប់ប្រាប់ថា នៅមុនពេលកើតហេតុ រូបគេជាមួយនឹងម្តាយបានអង្គុយឆ្កឹះខ្យងស្ងោររួចហើយនៅក្រោមដើមព្រីងមុខផ្ទះ ដើម្បីទុកយកទៅលក់ ស្របពេលនោះមេឃបានធ្លាក់ភ្លៀងលាយឡំជាមួយនឹងផ្គររន្ទះយ៉ាងខ្លាំង ក៏បានបាញ់ចំម្តាយរបស់ខ្លួន ចំណែករូបគេវិញ មិនមានរងគ្រោះថ្នាក់នោះទេ គ្រាន់តែហឹងត្រចៀកតែប៉ុណ្ណោះ។
លោកអធិការនគរបាលស្រុកម៉ាឡៃ បានបញ្ជាក់បន្ថែមថា ស្ត្រីរងគ្រោះបានរងរបួសធ្ងន់ ហើយក៏បានស្លា.ប់ ខណៈពេលបញ្ជូនទៅសង្គ្រោះនៅមណ្ឌលសុខភាពឃុំទួលពង្រ ។ ក្រោយពេលកើតហេតុ មន្ត្រីជំនាញបានធ្វើការពិនិត្យ ហើយប្រគល់ស.ពស្ត្រីរងគ្រោះជូនគ្រួសារសាច់ញាតិ ដើម្បីយកទៅធ្វើបុណ្យតាមប្រពៃណី ៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ