ខេត្តបាត់ដំបង ៖ យ៉ាងហោចណាស់ មនុស្សចំនួន០៣នាក់ បានរងរបួសដោយសាររន្ទះបា.ញ់ និង ផ្ទះរលំប៉ះចំក្បាល រីឯលំនៅឋានរបស់ប្រជាពលរដ្ឋ មានទាំងសាលារៀនផងប្រមាណ៣០ខ្នងបានរងការខូចខាត ខណៈសត្វគោ០២ក្បាល…
ខេត្តបាត់ដំបង ៖ យ៉ាងហោចណាស់ មនុស្សចំនួន០៣នាក់ បានរងរបួសដោយសាររន្ទះបា.ញ់ និង ផ្ទះរលំប៉ះចំក្បាល រីឯលំនៅឋានរបស់ប្រជាពលរដ្ឋ មានទាំងសាលារៀនផងប្រមាណ៣០ខ្នងបានរងការខូចខាត ខណៈសត្វគោ០២ក្បាល បានងា.ប់ដោយសាររន្ទះបាញ់ ដែលកើតឡើងព្រមៗគ្នានៅតាមបណ្ដាស្រុកចំនួន០៥ ក្នុងខេត្តបាត់ដំបង កាលពីរសៀលថ្ងៃទី ២០ មិថុនា។ នេះបើយោងតាមរបាយការណ៏បឋមរបស់មន្ត្រីមូលដ្ឋាន។
តាមសេចក្ដីរាយការណ៍នានា ដែលកោះសន្តិភាពទទូលបាន នៅព្រឹកថ្ងៃទី២១ មិថុនា បានឲ្យដឹងថា ភ្លៀងលាយឡំនឹងខ្យល់កន្ត្រាក់ អមដោយផ្គររន្ទះយ៉ាងខ្លាំងក្លាផង បានកើតឡើងស្ទើរទូទាំងខេត្តបាត់ដំបង តែបានប៉ះទង្កិចធ្ងន់ធ្ងរទៅលើស្រុកចំនួន០៥ ដែលបង្កឲ្យមានមហន្តរាយដល់មនុស្ស សត្វ និងផ្ទះសម្បែង ។
របាយការណ៍បានឲ្យដឹងថា ស្រុកចំនួន០៥ ដែលរងផលប៉ះពាល់ដោយបាតុភូតធម្មជាតិខាងលើនេះមាន៖ ស្រុករតនមណ្ឌល រន្ទះបាញ់សត្វគោងា.ប់០១ក្បាល នៅភូមិផ្លូវមាស ឃុំត្រែង។ ស្រុកឯកភ្នំ រន្ទះបានបា.ញ់មនុស្ស០២នាក់ បណ្ដាលឲ្យរងរបួសនៅចំណុចរាំងត្បាល់ ស្ថិតក្នុងភូមិបាក់ព្រា ឃុំព្រៃចាស់ គឺ ឈ្មោះ ហួន វី ប្រុសអាយុ៣៦ឆ្នាំ របួសធ្ងន់ និង ឈ្មោះ ឃ្លី ជីវ័ន ប្រុសអាយុ១៣ឆ្នាំរបួសស្រាល ខណៈពួកគេកំពុងដើរពេលមេឃភ្លៀង។
ស្រុកមោងឬស្សី ឃុំគារ និងឃុំព្រៃស្វាយ ខ្យល់កន្ត្រាក់វាយប្រហារទៅលើលំនៅឋាន សាលារៀន និង ស្នាក់ការកងរាជអាវុធហត្ថលេខ៥០៤ បណ្ដាលឲ្យខូចខាតសរុបចំនួន២១ខ្នង ក្នុងនោះរលំទាំងស្រុង០២ខ្នង និង រន្ទះបាញ់សត្វគោងា.ប់០១ក្បាលផងដែរ។ ស្រុកថ្មគោល ខ្យល់កន្ត្រាក់ បានវាយប្រហារលំនៅឋានខូចខាតអស់ចំនួន០៤ខ្នង នៅភូមិត្រស់ ឃុំអូរតាគី។ ស្រុកគាស់ក្រឡ ខ្យល់កន្ត្រាក់បានវាយប្រហារលំនៅឋានបណ្ដាលឲ្យខូចខាតចំនួន០៧ខ្នង និង បំណែកផ្ទះធ្លាក់ប៉ះរបួសមនុស្សម្នាក់ នៅភូមិបឹងរាំង ឃុំធិបតិ។
បើយោងតាមរបាយការណ៍ខាងលើនេះ មហន្តរាយដែលបង្កឡើងដោយ បាតុភូមិធម្មជាតិខាងលើនេះ គឺហាក់បានកើតឡើងព្រមៗគ្នាក្នុងពេលតែមួយ ខណៈមានភ្លៀងធ្លាក់គ្រប់ដណ្ដប់ស្ទើរទូទាំងខេត្ត។ ប៉ុន្តែយ៉ាងណា នេះគ្រាន់តែរបាយការណ៏បឋមប៉ុណ្ណោះ ខណៈមន្ត្រីជំនាញ និង អាជ្ញាធរបាននិងកំពុងបន្តចុះពិនិត្យជាក់ស្ដែង ដល់មូលដ្ឋានដែលបានជួបគ្រោះមហន្តរាយនេះ៕
ចែករំលែកព័តមាននេះ