ខេត្តបាត់ដំបង ៖ កសិករមួយចំនួនបាននិយាយថា ការធ្វើស្រែនាពេលបច្ចុប្បន្នមិនចំណេញនោះទេ ដោយការចំណាយច្រើនពេក ។ ធ្វើស្រែបច្ចុប្បន្ន មិនមានសកម្មភាពជាប្រពៃណីដូចមុនដែលកសិករ បង្វាក់ដៃគ្នា ដែលម្តងភូមិខាងកើតចុះដក ហើយភូមិខាងលិចមកជួយ ពេលអ្នកភូមិខាងលិចចុះស្ទូង កសិករខាងកើតមកជួយខាងលិចម្តង ។
នាពេលបច្ចុប្បន្នការធ្វើស្រែពឹងម៉ាស៊ីនទាំងអស់ រួមទាំងតម្លៃសាំង តម្លៃជី កាន់តែឡើងថ្លៃផងនោះ កសិករមួយចំនួនសុខចិត្តទុកដីស្រៃទំនេរ មិនចុះធ្វើស្រែឡើយ ។
លោកសីហា កសិករនៅខេត្តបាត់ដំបង រៀបរាប់ឲ្យដឹងថា ការធ្វើបច្ចុប្បន្នមិនបាច់ប្រើកម្លាំងនោះទេ រាប់ពីការសាបព្រោះ បាញ់ថ្នាំ ច្រូត កាត់ បោកបែនឡើងទៅ គេប្រើម៉ាស៊ីនទាំងអស់ ។
លោកថា បច្ចុប្បន្នមានម៉ាស៊ីនសាបស្រូវ ហើយការបាញ់ថ្នាំកម្ចាត់សត្វល្អិតគេប្រើសុទ្ធតែត្រូន ដែលក្នុងមួយថ្ងៃៗ ដីរាប់ហិកតាគេសាប គេព្រោះ គេបាញ់តែមួយភ្លែតប៉ុណ្ណោះ ។ សាប និងបាញ់ថ្នាំក្នុងមួយហិកតាមានថ្លៃឈ្នួល ចាប់ពី៥ម៉ឺនរៀលឡើងទៅ ដោយពូជ និងថ្នាំជារបស់ម្ចាស់ស្រែ ។
បើតាមលោក សីហា ថា ពីរឆ្នាំជាប់គ្នាហើយ ដែលតម្លៃជីកសិកម្មបានឡើងថ្លៃទ្វេរដង គឺមួយទៅជាពីរ ។ ជីពេលបច្ចុប្បនក្នុងមួយការ៉ុងមានតម្លៃ២០ម៉ឺនរៀល ហើយការធ្វើស្រែក្នុងមួយហិកតាកសិករដាក់ជីមិនតិចជាង៥ការ៉ុងឡើយ ។
លោកសីហាថា នៅឆ្នាំនេះ លោកទុកដីស្រែចំនួន៥ហិកតាឲ្យទំនេរចោលមិនចុះធ្វើទេ ពីព្រោះតែការធ្វើស្រែមិនចំណេញ ។ កសិករខាងលើថា ចំណែកផលស្រូវធ្វើបានវិញមានតម្លៃថោក ដែលតម្លៃបច្ចុប្បន្ននេះ បានតែ៧០០រៀលក្នុងមួយគីឡូក្រាម ហើយមានតែឈ្មួញទិញទៅប្រទេសវៀតណាមមួយផ្លូវប៉ុណ្ណោះ ។
លោកមឿន កសិករនៅជិតអាងទឹកត្រពាំងថ្ម ក្នុងខេត្តបន្ទាយមានជ័យបានសម្រេចចិត្តមិនធ្វើស្រែដែរនៅឆ្នាំនេះ ។ ទោះបីតំបន់លោកមានទឹកហូរហៀមិនខ្វះ ប៉ុន្តែដោយសារជីឡើងថ្លៃម៉ាស៊ីនច្រូតស្រូវ ម៉ាស៊ីនសាប គេយកថ្លៃខ្ពស់ពេក លោកសុខចិត្តមិនធ្វើស្រែទេ ។ កសិកររូបនេះថា អ្នកភូមិគាត់មួយចំនួន ក៏មិនធ្វើស្រែដូចលោកដែរនៅឆ្នាំនេះ ៕
ចែករំលែកព័តមាននេះ