អនិច្ចា! ចប់កម្មវិធី សាច់ញាតិឃាត់ តែជនរងគ្រោះលួចចេញ ក៏ជួបគ្រោះអកុសល
- ភ្នំពេញ
បុរសម្នាក់ចេញមកពីកម្មវិធីឡើងគេហដ្ឋានថ្មីរបស់ប្អូន ដោយផឹកស្រាស្រវឹង រួចក៏ជិះម៉ូតូត្រឡប់ទៅផ្ទះ ស្រាប់តែ
រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា បុរសម្នាក់ចេញមកពីកម្មវិធីឡើងគេហដ្ឋានថ្មីរបស់ប្អូន ដោយផឹកស្រាស្រវឹង រួចក៏ជិះម៉ូតូត្រឡប់ទៅផ្ទះ ស្រាប់តែរ៉េចង្កូតទៅបុកជាមួយនឹងរថយន្តចតស្ងៀម បណ្តាលឱ្យស្លា.ប់ភ្លាមៗនៅនឹងកន្លែងកើតហេតុ បង្កឱ្យមានការភ្ញាក់ផ្អើលកាលពីវេលាម៉ោង១និង៥០នាទីរំលងអធ្រាត្រឈានចូលថ្ងៃទី០៧ ខែមិថុនា ឆ្នាំ២០២២ នៅមុខគ្លីនិកសម្រាកព្យាបាល «ឧត្តមភាព» តាមបណ្តោយផ្លូវជាតិលេខ៥ ស្ថិតក្នុងភូមិផ្សារលិច សង្កាត់ព្រែកព្នៅ ខណ្ឌព្រែកព្នៅ ។
សេចក្តីរាយការណ៍បន្តថា ស.ពបុរសរងគ្រោះខាងលើមានឈ្មោះ ផុល សារីម ហៅ ពៅ អាយុ២៨ឆ្នាំ ស្នាក់ម្តុំផ្សារគគីរ ស្រុកកៀនស្វាយ ខេត្តកណ្ដាល មានស្រុកកំណើតនៅភូមិព្រៃរលួស ឃុំចន្ត្រី ស្រុករមាសហែក ខេត្តស្វាយរៀង ចំណែកជិះម៉ូតូជនរងគ្រោះម៉ាកហុងដាឌ្រីម ពណ៌ខ្មៅ ពាក់ស្លាកលេខ ភ្នំពេញ1AM-2987។
យោងតាមសាច់ញាតិស.ពបុរសរងគ្រោះ បានប្រាប់អោយដឹងថា មុនពេលកើតហេតុ ពួកគាត់ រួមទាំងស.ពជនរងគ្រោះបាននាំគ្នាទៅចូលរួមកម្មវិធីឡើងគេហដ្ឋានថ្មីរបស់ប្អូន ដែលមានទីតាំងនៅជិតកន្លែងកើតហេតុនោះ ។ ពេលចប់ការជួបជុំ ជនរងគ្រោះស្រវឹង ពួកគាត់ក៏បានហាមឃាត់ជនរងគ្រោះអោយសម្រាកនៅទីនោះមួយយប់សិន តែជនរងគ្រោះមិនស្តាប់ និងបានលួចចេញទៅផ្ទះមុន ហើយនៅតាមផ្លូវធ្វើដំណើរក៏ជួបគ្រោះថ្នាក់រហូតស្លា.ប់តែម្តង។
បើយោងតាមកាម៉េរាសុវត្ថិភាពទៅមន្ទីរសម្រាកព្យាបាលខាងលើ បានបង្ហាញអោយដឹងថា មុនពេលកើតហេតុ គឺជនរងគ្រោះខាងលើ បានជិះម៉ូតូតែម្នាក់ឯងធ្វើដំណើរតាមបណ្តោយផ្លូវជាតិលេខ៥ ទិសដៅពីជើងទៅត្បូង ក្នុងល្បឿនលឿនខ្លាំង លុះមកដល់ចំណុចកើតហេតុ ក៏រ៉េចង្កូតឡើងឃឿនផ្លូវទៅបុកផ្ទប់ជាមួយនឹងរថយន្តចតស្ងៀមមួយគ្រឿង ម៉ាកកាមរីបាឡែន បណ្តាលឲ្យជនរងគ្រោះស្លា.ប់ភ្លាមៗនៅនឹងកន្លែងកើត ចំណែកម៉ូតូជនរងគ្រោះវិញ បានហោះផ្លោងទៅបុកផ្ទប់នឹងរថយន្តតូយ៉ូតាព្រូសមួយគ្រឿងទៀត បណ្តាលឲ្យរថយន្តទាំងពីរគ្រឿងរងការខូចខាតផងដែរ ។
ក្រោយពេលកើតហេតុ ស.ពបុរសរងគ្រោះត្រូវបានសាច់ញាតិដឹកយកទៅតម្កល់ធ្វើបុណ្យនៅផ្ទះខាងប្រពន្ធ នៅម្តុំផ្សារគគីរ ស្រុកកៀនស្វាយ ខេត្តកណ្ដាល តាមប្រពៃណី ។ ចំណែកម៉ូតូរងគ្រោះ និងរថយន្តទាំង២គ្រឿងវិញ ត្រូវបានសមត្ថកិច្ចធ្វើការវាស់វែង និងយកទៅការិយាល័យផ្លូវគោក ដើម្បីដោះស្រាយតាមផ្លូវច្បាប់៕
ចែករំលែកព័តមាននេះ